الماتى- قاسكەلەڭ اراسىنداعى كەپتەلىس: 4 جولاقتى جولدار قاشان سالىنادى
الماتى. KAZINFORM - الماتى ماڭىنداعى كەپتەلىس ماسەلەسى الداعى جىلى قالاي شەشىلەدى؟ Kazinform ءتىلشىسى انىقتاپ كوردى.
الماتىعا كۇن سايىن وبلىستان مىڭداعان كولىك كىرەدى. بۇل قالا كىرەبەرىسىندەگى جولداردا كۇندەلىكتى ۇزىن-سونار كەپتەلىستىڭ قالىپتاسۋىنا اكەلەدى. سولاردىڭ ءبىرى - الماتى- بىشكەك اۆتوجولى، ونىڭ ىشىندە قاسكەلەڭ مەن التىن وردا اراسىنداعى اۋماقتى ەرەكشە اتاپ وتۋگە بولادى.
بۇل ماسەلەنىڭ قوزعالىپ جۇرگەنىنە از ۋاقىت بولعان جوق. بىلتىر «التىن وردا» ماڭىنداعى كەپتەلىستى جويۋ ءۇشىن قانداي جۇمىستار ىستەلەتىنىن جازعانبىز.
الايدا ول ۋاقىتتان بەرى اۆتوجولدا ايتارلىقتاي وزگەرىس بولعان جوق. سوندىقتان قازاۆتوجول الماتى وبلىستىق فيليالىنا ساۋال جولداپ، 2026 -جىلى ناقتى نە ىستەلەتىنىن سۇرادىق.
- قازىرگى ۋاقىتتا اپاتتىق جاعدايلار سانىن تومەندەتۋ جانە كەپتەلىستى ازايتۋ ماقساتىندا رەسپۋبليكالىق ماڭىزى بار «الماتى- بىشكەك» اۆتوموبيل جولىنىڭ 19-27 ك م (قاسكەلەڭ - ۇلكەن الماتى اۆتوموبيل اينالما جولى) ۋچاسكەسىن كۇردەلى جوندەۋ جوبالاۋ-ىزدەستىرۋ جۇمىستارى جۇرگىزىلىپ جاتىر. وسى جوبا اياسىندا قوزعالىس جولاقتارىن 4 تەن 8 گە دەيىن كەڭەيتۋ، «تاعا» ءتيپتى ەكى كولىك ايرىقتارى، سونداي-اق جەرۇستى جاياۋ جۇرگىنشىلەر وتكەلى قۇرىلىسى قاراستىرىلعان، - دەپ حابارلادى قازاۆتوجول.
رەسمي جاۋاپقا سايكەس، جوبالاۋ- ىزدەستىرۋ جۇمىستارىن اياقتالۋ مەرزىمى - 2025 -جىلدىڭ جەلتوقسان ايى، مەملەكەتتىك ساراپتامانىڭ وڭ قورىتىندىسىن الۋ - 2026 -جىلدىڭ اقپان ايىنا كوزدەلگەن.
- 2026 -جىلعا قارجى قاراستىرىلعان جاعدايدا قۇرىلىس- مونتاجداۋ جۇمىستارىنا مەردىگەر مەكەمە انىقتاۋ ماقساتىندا بايقاۋ جاريالانىتىن بولادى. اتالعان جوبانى جۇزەگە اسىرۋ ءۇشىن قۇرىلىس- مونتاجداۋ جۇمىستارى كەزىندە قوزعالىسقا شەكتەۋ قويىلمايدى، كولىك قوزعالىسى كەزەك- كەزەڭىمەن ءبىر باعىتپەن ۇيىمداستىرىلادى، - دەلىنگەن جاۋاپتا.
سونىمەن قاتار كومپانيانىڭ الماتى وبلىستىق فيليالى كەپتەلىستەردى ازايتۋ جانە كولىك قوزعالىسىن رەتتەۋ قازىر جاڭا باعدارشامداردى ورناتۋ جۇمىستارى ءجۇرىپ جاتقانىن اتاپ ءوتتى.
ەسكە سالايىق، بۇعان دەيىن Kazinform ءتىلشىسى ۇزىناعاش پەن الماتى اراسىندا قاربالاس ۋاقىتتاردا جول ءجۇرىپ، كەپتەلىس ماسەلەسىن ءوز كوزىمەن كورىپ قايتتى.
