الماتى قالاسى مەن ستەپنوگورسكىدە ۇيىمداسقان قىلمىستىق توپ مۇشەلەرى ۇستالدى
استانا. KAZINFORM - ىشكى ىستەر مينيسترلىگى ۇيىمداسقان قىلمىستىق توپتاردىڭ قىزمەتىن انىقتاۋ جانە جولىن كەسۋ بويىنشا جۇمىستى جۇيەلى تۇردە جۇرگىزۋدە، - دەپ حابارلايدى Polisia.kz.
ولاردىڭ كريمينالدىق قىزمەتى تۋرالى دالەلدەردى جيناۋ ارقىلى قىلمىستىق توپتاردىڭ جەتەكشىلەرى مەن بەلسەندى مۇشەلەرىن قوعامنان وقشاۋلاۋ جونىندە كەشەندى شارالار قابىلدانىپ جاتىر.
جىل باسىنان بەرى ۇيىمداسقان قىلمىستىق توپ قۇرۋ، وعان باسشىلىق ەتۋ جانە قاتىسۋ بويىنشا 15 فاكتى انىقتالىپ، تىركەلدى.
ءارتۇرلى قىلمىستار جاساعانى ءۇشىن قىلمىستىق توپتاردىڭ 30 دان استام جەتەكشىلەرى مەن بەلسەندى مۇشەلەرى ۇستالدى.
ماسەلەن، 7-اقپاندا ىشكى ىستەر مينيسترلىگى مەن ۇلتتىق قاۋىپسىزدىك قىزمەتى وكىلدەرى الماتى قالاسىندا قۇرامىندا بەلگىلى «ايشۋاق- جانتۇگەل» ۇيىمداسقان قىلمىستىق توبىنىڭ مۇشەلەرى بار توپتى قۇرىقتادى. جەدەل- تەرگەۋ ءىس-شارالارىنىڭ ناتيجەسىندە 14 ادام ۇستالدى. 7 اتىس جانە تراۆماتيكالىق قارۋ، 4 گراناتا، 200 دەن استام وق-ءدارى، ەسىرتكى زاتى، سونداي-اق باسقا دا سۋىق قارۋ تاركىلەندى.
توپ مۇشەلەرى كاسىپكەرلەرگە وزدەرىنىڭ كريمينالدىق «قامقورلىعىن» كورسەتە وتىرىپ، ولاردى بوپسالاۋمەن اينالىسقانى انىقتالدى. ولار الماتى قالاسىنىڭ تەمىر جول ۆوكزالدارى اۋماعىندا، سونداي-اق بازارلارىندا ءوز ىقپالىن جۇرگىزگەن.
- ۇستالعان ادامدارعا قاتىستى الماتى قالاسى پوليتسيا دەپارتامەنتى تەرگەۋ باسقارماسى بوپسالاۋ جانە باس بوستاندىعىنان زاڭسىز ايىرۋ فاكتىلەرى بويىنشا بىرنەشە قىلمىستىق ءىستى تەرگەۋدى باستادى، - دەدى ق ر ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.
سول كۇنى پوليتسيا كۇشىمەن ستەپنوگورسك قالاسىندا وسىعان ۇقساس وپەراتسيا جۇرگىزىلدى. جەدەل جۇمىستىڭ ناتيجەسىندە قورقىتۋ جانە كۇش كورسەتۋ ارقىلى قالانىڭ تۇرعىندارىن بوپسالاۋمەن اينالىسقان جەرگىلىكتى قىلمىستىق توپتىڭ جولى كەسىلدى.
- قىلمىستىق توپتىڭ بارلىق مۇشەلەرى ۇستالىپ، ۋاقىتشا ۇستاۋ يزولياتورىنا قامالدى. ولارعا قاتىستى اقمولا وبلىسى پوليتسيا دەپارتامەنتى تەرگەۋ باسقارماسى بوپسالاۋ فاكتىلەرى بويىنشا 6 قىلمىستىق ءىستى تەرگەپ جاتىر. كورسەتىلگەن فاكتىلەر بويىنشا وزگە مالىمەتتەر تەرگەۋ مۇددەسىندە جاريالانبايدى، - دەدى قۋاندىق الپىس.
