الماتى مەكتەپتەرىنە 200 پسيحولوگ جەتىسپەيدى
الماتى. KAZINFORM - الماتىدا ينكليۋزيانى جاقسارتۋ ءۇشىن پسيحولوگتەر مەن دەفەكتولوگتەردى دايارلاۋ باعدارلاماسى ەنگىزىلەدى. بۇل تۋرالى ەربولات دوسايەۆ تۇركسىب اۋدانىنىڭ تۇرعىندارىمەن كەزدەسۋ بارىسىندا ايتتى.
تۇركسىب اۋدانى تۇرعىندارى قالا اكىمىنە 61-مەكتەپتە بىلىكتى پسيحولوگتەردىڭ جوقتىعىن ايتتى.
قالا باسشىسىنىڭ ايتۋىنشا، الماتىدا شامامەن 200 پسيحولوگ مامانعا سۇرانىس بار.
بۇل ماسەلەنى شەشۋ ءۇشىن پسيحولوگتەر، دەفەكتولوگتەر جانە لوگوپەدتەردى دايارلاۋ باعدارلاماسى باستالدى. وسى ماقساتتا زاماناۋي تاجىريبەلەردى زەرتتەۋ بويىنشا ءارتۇرلى ينستيتۋتتارمەن ىنتىماقتاستىق ماسەلەلەرى تالقىلانىپ جاتىر. باعدارلامانىڭ ماقساتى - جاڭا سىن-قاتەرلەردى ەسكەرە وتىرىپ، پسيحولوگتەردىڭ نەگىزگى ءبىلىمىن جاڭا تالاپتارعا سايكەس كوتەرۋ.
«ءبىز ەڭبەكاقى تولەۋدىڭ جەكە جۇيەسىن ەنگىزۋدى جوسپارلاپ وتىرمىز، سونداي-اق بالالارمەن جۇمىس ىستەۋگە جاستاردى تارتۋىمىز كەرەك. باعدارلامادا ينكليۋزياعا ەرەكشە كوڭىل بولىنەدى، بۇل ماسەلەنى تەرەڭىرەك تۇسىنۋگە جانە بولاشاقتا ولاردى شەشۋ بويىنشا جۇمىستاردى ۇيىمداستىرۋعا كومەكتەسەدى. بيىل ءبىز دايىندىق جۇمىستارىن اياقتايمىز، ال كەلەسى جىلى 61-مەكتەپ پيلوتتىق جوبا بولادى، وندا بالالار اراسىنداعى قارىم-قاتىناستاردى وزگەرتۋ مەن بۋللينگپەن كۇرەسۋدىڭ ادىستەرىن كورسەتەمىز»، - دەدى ەربولات دوسايەۆ.
