الماتى ماڭىندا اپاتقا ۇشىراعان ۇشاق اۋكتسيوندا ساتىلدى
استانا. KAZINFORM - ان-26 تەحنيكالىق ۇشاعىنىڭ سىنىعى اۋكسيوندا ساتىلدى.
e-qazyna.kz سايتى مالىمەتىنشە، باستاپقى باعاسى 1351494,75 تەڭگە بولعان. اۋكسيونعا قاتىسۋ ءۇشىن 810897 تەڭگە كەپىلدىك جارنا تولەۋ قاجەت بولعان.
ساۋدا قورىتىندىسى بويىنشا ساتىپ الۋشى ۇشاق سىنىعىن 1416200 تەڭگەگە العان. ان-26 ۇشاعىنىڭ سىنىعىن ساتىپ الۋشىنىڭ اتى-ءجونى بەلگىسىز.
اۋكسيوندا ساتۋشى رەتىندە «قازارناۋلى ەكسپورت» رەسپۋبليكالىق مەملەكەتتىك كاسىپورنى قاتىسقان. ال نىساننىڭ بالانس يەسى «ۇ ق ك اۆياتسيالىق قىزمەتىنىڭ» اۆياتسيا باسقارماسى بولعان.
ساتىپ الۋشى بارلىق شىعىندى ءوزى كوتەرۋگە ءتيىس، ونىڭ ىشىندە تيەۋ، ولشەۋ، سۇرىپتاۋ، كەسۋ جانە مەتال سىنىقتارىن شىعارۋ شىعىندارى بار.
ۇشاق سىنىعى الماتى وبلىسى بورالداي اۋىلىندا تۇر. قۇجاتتارعا سايكەس ساتىلعان ۇشاق 1978-جىلى شىعارىلعان، ونىڭ سالماعى - 14,6 توننا.
ەسكە سالايىق، 2021-جىلعى 13-ناۋرىزدا الماتى اۋەجايىنىڭ ماڭىندا ۇ ق ك اۆياتسيالىق قىزمەتىنىڭ ان-26 اسكەري ۇشاعى اپاتقا ۇشىراعان بولاتىن. بورتتا التى ادام بولعان. اپات سالدارىنان ءتورت اسكەري قىزمەتكەر، ياعني دوسجان بايمۇراتوۆ، ەۆگەني ۆاسيلكوۆ، مۇحتار ساعىنبايەۆ جانە عابيت بارلىقبايەۆ قازا تاپتى.
