الماتى كوشەلەرىندە كوك ءتۇستى جول بەلگىسى پايدا بولدى

الماتى. KAZINFORM - الماتىدا ناۋرىزباي باتىر كوشەسىندە كوك ءتۇستى جول بەلگىسى سىزىلدى. «الماتى پاركينگ» مالىمەتىنشە، كوممۋنالدىق مەكەمەنىڭ اقىلى تۇراق ايماعى كوك تۇسپەن تاڭبالانادى.

بۇل جاڭاشىلدىق كولىك جۇرگىزۋشىلەرىنە تۇراق ايماعىن تەز انىقتاۋعا كومەكتەسەدى. بۇرىن اقىلى اۆتوتۇراقتار تەك 5، 10 جانە 20 ساندارى بار شەڭبەرمەن بەينەلەنگەن اقپاراتتىق تاقتا تۇرىندە كورسەتىلگەن. الايدا مۇنداي بەلگىلەر ءاردايىم اقىلى تۇراق شەكارالارىن ناقتى كورسەتە المايدى.

«كوك ءتۇستى تاڭبا ناۋرىزباي باتىر كوشەسىندە پايدا بولدى جانە ودان ءارى بارلىق كوممۋنالدىق اقىلى اۆتوتۇراقتا قولدانىلادى. تىعىز ترافيك كەزىندە جول بەلگىسى بايقالماۋى مۇمكىن، ال كوك تاڭبا نازار اۋدارتادى. بۇل قالالىق ينفراقۇرىلىمدى جاقسارتۋ جانە الماتى تۇرعىندارى مەن قوناقتارى ءۇشىن جايلىلىق دەڭگەيىن ارتتىرۋ جونىندەگى باعدارلامانىڭ ءبىر بولىگى. كولىك جۇرگىزۋشىلەرى ءقازىردىڭ وزىندە تۇراق ايماعىن انىقتاۋ پروتسەسىن قاراپايىم ءارى تۇسىنىكتى ەتەتىن جاڭا جۇيەنىڭ ارتىقشىلىعىن باعالاي الادى»، - دەلىنگەن «الماتى پاركينگتىڭ» حابارلاماسىندا.

اۆتور
الما مۇقانوۆا