الماتى حايۋاناتتار باعىنداعى جانۋارلار جەر سىلكىنىسى كەزىندە قانداي مىنەز كورسەتتى

  الماتى. KAZINFORM - الماتى حايۋاناتتار باعى جەر سىلكىنىسى كەزىندە جانۋارلار قانداي كۇيدى باستان كەشكەنى جايلى الەۋمەتتىك جەلىگە جازدى.

«تۇنگى ۋاقىتتا زووباقتا كۇزەت قىزمەتكەرلەرى مەن كەزەكشى ۆەتەرينارلاردان باسقا ادام بولمايدى. قىزمەتكەرلەردىڭ ايتۋىنشا، جەر سىلكىنىسىنە دەيىن جانۋارلاردا ەشقانداي ەرەكشە ءىس- قيمىلدار بايقالماعان. جەر سىلكىنىسى بولعان سوڭ، قاسقىرلار ۇلىپ، تىرنا، بۇركىت، قاز، ۇيرەك سەكىلدى قۇستار شۋلاي باستاعان. تاڭەرتەڭ قىزمەتكەرلەرىمىز زووباقتاعى جالپى جاعدايدى تەكسەرىپ، بارلىق قورشاۋلاردى باقىلاپ شىقتى. ولار قورىققاننان ءبىرىن- ءبىرى قۇشاقتاپ، بۇرىشتا تىعىلىپ وتىرعان پاشا مەن لولا اتتى شيمپانزەلەردىڭ جۇبىن كورەدى»،- دەپ جازدى زووباق ۇجىمى.

سونداي- اق زووباقتىڭ مالىمەتىنشە، وتكەن عاسىردىڭ 80-90 -جىلدارى قازسسر عىلىم اكادەمياسىنىڭ سەيسمولوگيا ينستيتۋتى ماماندارىنىڭ جەتەكشىلىگىمەن الماتى حايۋاناتتار باعىنىڭ عىلىمي كەڭەسى جەر سىلكىنىسىن بولجاۋعا قاتىستى زووباق جانۋارلارى اراسىندا ارنايى زەرتتەۋلەر جۇرگىزگەن.

«ماماندار جانۋارلاردىڭ جەر سىلكىنىسى الدىندا جانە ودان كەيىنگى ءىس- ارەكەتتەرىن، مىنەز- قۇلىقتارىنداعى وزگەرىستەردى زەرتتەگەن. سول كەزەڭدەردە قالادا ادامدارعا سەزىلگەن 15 جەر سىلكىنىسى بولعان ەكەن. 6 ءتۇرلى جانۋار جەر سىلكىنىسى الدىندا ادەتتەن تىس ءىس- قيمىلدار جاساعان. كوپ جاعدايدا جەر سىلكىنىسىن الدىن الا جىلاندار سەزىپ، بەلسەندى قيمىلداعانى بايقالعان»، - دەپ جازدى الماتى حايۋاناتتار باعى.