الماتى حالىقارالىق اۋەجايىنا كاسىپكەرلەردەن شاعىم ءتۇستى: تەرگەۋ ءجۇرىپ جاتىر

استانا. KAZINFORM - باسەكەلەستىكتى قورعاۋ جانە دامىتۋ اگەنتتىگىنىڭ ەسكەرتۋىن ەلەمەگەن الماتى حالىقارالىق اۋەجايىنا قاتىستى تەرگەۋ امالدارى جۇرگىزىلىپ جاتىر.

- بىزگە كاسىپكەرلەردەن الماتى حالىقارالىق اۋەجايىنىڭ باسەكەلەستىكتى شەكتەۋىنە قاتىستى شاعىمدار ءتۇستى. اۋەجاي اۋماعىندا قىزمەت كورسەتەتىن جەتكىزۋشىلەردى تاڭداۋ پروتسەسىندە مونوپولياعا قارسى زاڭنامانى بۇزۋ بەلگىلەرى انىقتالدى. انىقتالعان فاكتىلەر بويىنشا اگەنتتىك ەسكەرتۋ شىعاردى، الايدا ول ورىندالمادى، - دەدى باسەكەلەستىكتى قورعاۋ جانە دامىتۋ اگەنتتىگى ءتوراعاسىنىڭ ورىنباسارى بولات سامبەتوۆ سەنات قابىرعاسىندا وتكەن ءىس-شارا بارىسىندا.

ونىڭ ايتۋىنشا، قازىر اۋەجايعا قاتىستى تەرگەۋ شارالارى ءجۇرىپ جاتىر.

ايتا كەتسەك، مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى قازاقستان حالقىنا جولداۋىن ىسكە اسىرۋ شەڭبەرىندە سەناتتا «قازاقستان رەسپۋبليكاسىندا ازاماتتىق اۆياتسيانى دامىتۋ» تاقىرىبىنا ارنالعان دوڭگەلەك ۇستەل ءوتتى.

ەسكە سالا كەتەيىك، بىلتىر ماۋسىمدا الماتى اۋەجايىنىڭ جاڭا تەرمينالى العاشقى رەيستەردى قابىلداي باستادى.

وتكەن جىلى كۇزدە الماتى اۋەجايىنىڭ ەسكى جانە جاڭا تەرمينالى اراسىندا كوپىر اشىلدى.

بيىل اقپاندا الەۋمەتتىك جەلىلەردە الماتىنىڭ جاڭا حالىقارالىق تەرمينال عيماراتتارىنىڭ بىرىندە سۋ اعىپ جاتقانى بەينەلەنگەن ۆيدەو تاراعان ەدى.

اۆتور

داۋلەت ىزتىلەۋ