الماتى ءبىرىڭعاي تۋريستىك كەڭىستىك قۇرۋدى جوسپارلاپ وتىر
الماتى. KAZINFORM - پرەمەر-مينيستر ولجاس بەكتەنوۆ الماتىعا جۇمىس ساپارى بارىسىندا شىمبۇلاق، وي-قاراعاي، پيونەر، قيماسار جانە بۋتاكوۆكاعا كىرەتىن ورتالىق ايماقتى دامىتۋ جوسپارىمەن تانىستى.
فرانسۋزدىق Stem International كومپانياسىنىڭ باس ديرەكتورى ۆينسەنت تاسسار قىسقى تۋريزممەن قاتار جازعى ينفراقۇرىلىمدى دامىتۋعا - ۆەلو جانە جاياۋ جۇرگىنشىلەر جولدارىن قالىپتاستىرۋعا، بەلسەندى دەمالىس ورىندارىن، گلامپينگ، ەتنو-قوناقۇيلەر نىساندارىن سالۋعا جانە ەكولوگيالىق تازا كولىكتى ىسكە قوسۋعا باسا نازار اۋدارىلعانىن اتاپ ءوتتى.
- الماتى تاۋ كلاستەرىنىڭ ورتالىق ايماعى ەكى جەتەكشى: شىمبۇلاق جانە Oi-Qaragai كۋرورتتىق ايماقتى قامتيدى. بۇل ەكى كۋرورت تا جىل بويى جۇمىس ىستەيتىن دەمالىس ورنى رەتىندە تانىلعان. جوبانى ىسكە اسىرۋ ەكى كۋرورتتى اسپالى جول، ۆەلوسيپەد جانە جاياۋ جۇرگىنشىلەر جولدارى، سونداي-اق ەلەكتر شاتتلدارى ارقىلى تىكەلەي قوسۋعا مۇمكىندىك بەرەدى. بۇل تۋريستەردىڭ ورتاشا بولۋ ۇزاقتىعى مەن كوبىرەك قارجى شىعارۋىنا ىقپال ەتەتىن ءبىرتۇتاس تۋريستىك كەڭىستىك جاسايدى. جوبا جىل بويىنا لايىقتالعان. ودان بولەك، قىس مەزگىلىندە بولاتىن ۇسىنىس تا بارىن اتاپ ءوتۋ ماڭىزدى، - دەدى ول.
ايتۋىنشا، دۇنيەجۇزىلىك تۋريستىك ۇيىمنىڭ مالىمەتى بويىنشا، ول ۇلكەن ەكونوميكالىق قايتارىمدىلىعىمەن ەرەكشەلەنەدى - ءبىر ادامعا 334 دوللار جانە وتكىزۋ مۇمكىندىگىن بۇگىنگى 6 مىڭنان بولاشاقتا كۇنىنە 24 مىڭعا دەيىن ارتتىرۋ كوزدەلگەن.
ايتا كەتەيىك، بۇگىن پرەمەر-مينيستر ولجاس بەكتەنوۆ الماتىعا جۇمىس ساپارى بارىسىندا مەگاپوليستىڭ تاۋ كلاستەرى اۋماعىن تىكۇشاقپەن ارالاپ كوردى.
