الماتى ايالدامالارى الداعى 2 جىلدا تولىق جاڭارادى
استانا. KAZINFORM - الماتى قالاسىنىڭ اكىمى ەربولات دوسايەۆ اۋەزوۆ اۋدانىنىڭ تۇرعىندارىمەن كەزدەستى.
اۋدان تۇرعىنى قالاداعى ەسكىرگەن ايالدامالارعا شاعىمدانىپ، ولاردى ۇلتتىق ويۋ-ورنەكپەن ارلەپ جاڭارتۋدى ۇسىندى.
- قالا باعدارلاما ازىرلەدى. بيىل كۇزدە جۇمىستاردى باستاپ، الداعى 2 جىلدىڭ ىشىندە كەزەڭ-كەزەڭمەن ايالداما كەشەندەرىن جاڭارتامىز. وندا ءتيىستى اۆتوبۋس مارشرۋتتارى بويىنشا اقپاراتتىق تاقتا بولادى. قالانىڭ سولتۇستىك بولىگىندەگى تەمىر ايالدامالاردى الماستىرۋعا تىرىسامىز. ادەمى ايالدامالاردىڭ كوبى ينۆەستورلار ەسەبىنەن ىستەلدى. قالا وزگەرىپ كەلەدى، سوندىقتان ينۆەستورلارعا ايالداماعا جارناما ورنالاستىرۋ تەك وڭتۇستىك بولىكتە ەمەس، باسقا ايماقتاردا دا قىزىق بولادى دەپ ويلايمىن. ول بولماسا قالا الەۋمەتتىك جارناما ورنالاستىرادى، - دەدى ەربولات دوسايەۆ.
قالا اكىمى جوبالاۋ- سمەتالىق قۇجاتتاما دايىن بولعان جاعدايدا جۇمىس قىركۇيەك- قازان ايىندا باستالاتىنىن ناقتىلادى. سونداي-اق ول ادام كوپ جۇرەتىن ايالدامالار ۇلكەيىپ، ال جولاۋشىلارى ازدارى كىشىرەيەتىنىن اتاپ ءوتتى.
ەسكە سالايىق، بۇعان دەيىن الماتىنىڭ ايالداما كەشەندەرىنە ءبىرىڭعاي ديزاين-كود جاسالىپ جاتقانىن جازعانبىز. جوبامەن «الماتى باس جوسپارى» ع ز ي مەكەمەسى اينالىسىپ جاتىر.
