المات كەبىسپايەۆ قازاق سپورتشىلارىن دوپينگ بويىنشا كىم ۇستاپ بەرەتىنىن ايتتى
استانا. KAZINFORM - گرەك-ريم كۇرەسىنەن الەم چەمپيوناتىنىڭ بەس مارتە جۇلدەگەرى المات كەبىسپايەۆ وليمپياداعا قاتىسۋ ءۇشىن دايىندىق جۇمىستارى قانشا ۋاقىت جالعاساتىنى تۋرالى ايتتى.
ول «Aqjaiyq» تەلەارناسىنداعى سۇحبات بارىسىندا سپورتتاعى قامقورلىق، دايىندالۋ جانە دوپينگ ماسەلەسى بويىنشا جاعدايدىڭ قالاي ءوربيتىنىن اڭگىمەلەدى.
«سپورتشى ءۇش اي ىستەيتىن جۇمىستى ەكى ايدا ىستەي المايدى. كوكتەمدە سالعان جەمىستى جازدا الا المايسىڭ. سول سياقتى بىزدە دە وليمپيادا جاقىنداعاندا جانتالاسىپ، «نە كەرەك، نە ىشەسىڭ» دەپ اۋزىڭا تىقپالاۋ ەش پايدا بەرمەيدى. ول ءتورت جىل بويى جۇيەمەن ىستەلەتىن جۇمىس. ءۇش جىل بويى كوڭىل بولىنبەي، ءبىر جىل قالعاندا ءولىپ-تالعاننان ناتيجە بولمايدى. جالپى، قازىر اتقارىلىپ جاتقان جۇمىستى جوققا شىعارۋعا بولمايدى. سپورتتا ءبىراز كوڭىل ءبولۋ بار. ءبىراق سونى جۇيەلى تۇردە جەتكىزسە، سوندا ناتيجە بولادى»، - دەدى ول سۇحبات بارىسىندا.
سونداي-اق، بەلگىلى بالۋان دوپينگ داۋىنا ىلىنگەن سپورتشىلاردىڭ قالاي ايىپتالاتىنىن دا اشىق جەتكىزدى. بۇل ماسەلە بويىنشا ەلىمىزدەگى سپورتشىلاردىڭ تىيىم سالىنعان پرەپاراتتاردى قولدانۋىنىڭ سىرىن كوپ جاعدايدا ءوز ادامدارىمىز اشكەرەلەيتىن كورىنەدى.
«بىزدە دوپينگ دەگەن ماسەلە بار. بىلاي قاراساڭىز، ءوزىمىزدىڭ سپورتشىنى ءوزىمىز ۇستاپ بەرىپ جاتامىز. مۇنداي ماسەلە ەشقانداي ەلدە جوق»، - دەدى المات كەبىسپايەۆ.
سونداي-اق، «دالا قىراندارى» جاستار قوعامدىق بىرلەستىگىنىڭ كورديناتورى اسەت سۇلتان ۇلى باسقا ەلدەردەگى دوپينگكە قارسى ۇيىمداردىڭ سپورتشىلارمەن اتقاراتىن جۇمىستارى قالاي جۇزەگە اساتىنىن العا تارتتى.
«باسقا ەلدەردەگى دوپينگ ۇيىمدارى وزدەرىنىڭ سپورتشىلارىنا پرەپاراتتاردىڭ قايسىسىن قولدانۋ كەرەكتىگىن ۇيرەتەدى. نەمەسە قولدانعاننان كەيىن نەنى تازارتۋ كەرەكتىگىن ايتادى. ولار وزدەرىنىڭ سپورتشىلارىن باتپاققا باتىرۋ ءۇشىن قۇرىلماعان. سپورتشىلارىنىڭ دوپينگ بويىنشا ساۋاتىن اشۋ ءۇشىن جۇمىس ىستەيدى. بۇل ورايدا دۇنيەجۇزىندە قازاقستان ءوز سپورتشىلارىن ۇستاپ بەرىپ جاتقانى ءجيى ايتىلادى»، - دەدى اسەت سۇلتان ۇلى.
