الەمگە تانىمال جۇلدىز حابي لەيم ا ق ش-تان شىعارىلدى
استانا. قازاقپارت - TikTok جەلىسىندە 160 ميلليوننان اسا جازىلۋشىسى بار تانىمال ۆيدەوبلوگەر حابي لەيم ا ق ش ۆيزاسىنىڭ مەرزىمى ءوتىپ كەتكەنى ءۇشىن اۋەجايدا ۇستالدى، دەپ حابارلايدى Euronews.
TikTok جۇلدىزى حابي لەيم ۆيزاسىنىڭ مەرزىمى ءوتىپ كەتكەنىنە بايلانىستى لاس-ۆەگاستا يمميگراتسيالىق قىزمەت وكىلدەرىمەن ۇستالعاننان كەيىن ا ق ش-تان كەتتى.
ونىڭ شىن ەسىمى - سەرينگە حابانە لامە. ول - يتاليا مەن سەنەگال ازاماتتىعىنا يە. ونى جۇما كۇنى گارري ريد اتىنداعى حالىقارالىق اۋەجايدا ۇستاعان، ءبىراق ا ق ش-تىڭ يمميگراتسيالىق جانە كەدەندىك باقىلاۋ قىزمەتىنىڭ (ICE) وكىلى ونىڭ دەپورتاتسيا تۋرالى شەشىمسىز ەلدەن شىعۋىنا رۇقسات بەرىلگەنىن راستادى.
ICE مالىمەتىنشە، 25 جاستاعى لەيم ەلگە 30 -ساۋىردە كەلگەن، ول ۆيزاسىنىڭ مەرزىمىن وتكىزىپ العان.
ەرىكتى تۇردە ەلدەن شىعۋ - ەلدەن شىعارىلۋ قاۋپى تونگەن ادامدارعا دەپورتاتسيا تۋرالى رەسمي شەشىمنىڭ ءوز ىستەرىنە ەنگىزىلۋىنەن قۇتىلۋعا مۇمكىندىك بەرەدى. مۇنداي شەشىم، ادەتتە، ا ق ش-قا 10 جىلعا دەيىن قايتا كىرۋگە تىيىم سالادى.
حابي لەيم سەنەگالدا دۇنيەگە كەلگەن، بالا كەزىندە يتالياعا قونىس اۋدارىپ، تۋرين ماڭىنداعى كيۆاسسو قالاسىنىڭ كەدەي اۋدانىندا وسكەن.
پاندەميا باستالعان كەزدە 22 جاستاعى جىگىت جەرگىلىكتى زاۋىتتاعى جۇمىسىنان ايىرىلىپ، ميلليونداعان يتاليالىق سياقتى ۇيدە وتىرۋعا ءماجبۇر بولدى.
سول كەزدە الەۋمەتتىك جەلىلەردە ۋاقىت وتكىزە باستاعان لەيم قىسقا ۋاقىتتا الەمدىك تانىمالدىققا يە بولدى. ونىڭ ۆيدەولارىندا بىردە-ءبىر ءسوز ايتىلمايدى - تەك بەت-الپەتى مەن ىم-يشاراسى ارقىلى ول ابسۋردتى ءارى كۇردەلى «لايفحاك» جاساۋشىلاردى كەلەمەجدەيدى. تەك TikTok-تاعى جازىلۋشىلارىنىڭ سانى 162 ميلليوننان اسادى.
2022 -جىلى ول Hugo Boss ءسان برەندىمەن كوپجىلدىق كەلىسىمشارتقا وتىردى - سول جىلى يتاليا ازاماتتىعىن الدى.
2025 -جىلدىڭ قاڭتارىندا ب ۇ ۇ بالالار قورى - يۋنيسەف-ءتىڭ ىزگى نيەت ەلشىسى بولىپ تاعايىندالدى.
بۇعان دەيىن پوليتسيا فورماسىمەن تىكەلەي ەفيرگە شىققان شىمكەنتتىك تيكتوكەر جاۋاپقا تارتىلعانىن جازعان ەدىك.
اۆتور
اينۇر تۋماكبايەۆا
