الەم چەمپيونى ريزابەك ايتمۇحاننىڭ جۇرت بىلە بەرمەيتىن قىرلارى

قازاق بالۋانى ريزابەك ايتمۇحان 19 جاسىندا ەركىن كۇرەستەن الەم چەمپيونى اتاندى. جاي اتانىپ قويعان جوق، وسى سپورت تۇرىنەن جەڭىس تۇعىرىنا كوتەرىلگەن العاشقى سپورتشىمىز.

بۇعان دەيىن گرەك-ريم كۇرەسىنەن توپ جارعان بالۋاندارىمىز بولعانمەن، ەركىن كۇرەستە ەسە جىبەرىپ كەلگەن ەدىك.

ريزابەك ايتمۇحان سولتۇستىك قازاقستان وبلىسى، ءۋاليحانوۆ اۋدانىنىڭ تۋماسى. كىشكەنەكول دەگەن اۋىلدا تۋعان. بۇل اۋىلدىڭ بۇرىنعى اتى - قىزىل تۋ. باستاپقىدا بالۋان تۋعان ولكەسىنىڭ اتىنان جارىستارعا قاتىسىپ جۇرگەن. كەيىننەن الماتى قالاسىنا اۋىسقان. ونىڭ دا سەبەبى بار.

بالۋاننىڭ اكەسى قانات جولداسباي دا كۇرەس سالاسىنداعى مامان ءارى جاتتىقتىرۋشى. اناسى - گۋليار جولداسباي. ول مەكتەپتە ورىس ءتىلى ءپانىنىڭ مۇعالىمى بولىپ ىستەيدى. وتباسىندا 6 بالا. ريزابەك ۇلداردىڭ ىشىندە ۇلكەنى. ودان كەيىنگى ءىنىسى الىشەر دە ەركىن كۇرەسپەن شۇعىلدانادى. كۇرەسكە كەلۋلەرىنە اكەلەرىنىڭ جول كورسەتۋى سەپ بولعان. ريزابەكتىڭ كەنجە ءىنىسى اتاجان - 1,5 جاستا.

نەگە جارىستارعا سولتۇستىك قازاقستان اتىنان قاتىسپايدى؟

بالۋاننىڭ نە سەبەپتى وزگە ءوڭىر اتىنان جارىستارعا قاتىسىپ جۇرگەنىن ونىڭ جەكە باپكەرى ءارى اكەسى قانات جولداسباي ءبىر سۇحباتىندا ايتا كەتكەن.

ۇلىم مەكتەپتە وقىپ جۇرگەندە وبلىستىق جارىستارعا ءجيى قاتىسىپ تۇردى. ءبىراق رەسپۋبليكالىق جانە حالىقارالىق دودالارعا كەلگەندە جەرگىلىكتى سپورت باسقارماسى قولدامادى. باسشىلىق قاراجاتتىڭ جوقتىعىن ايتتى. «ءوزىڭىز تابىڭىز» دەيدى. سپورتشىنىڭ جولىنا، قوناق ۇيىنە، ءجۇرىپ-تۇرۋىنا، تاماقتانۋىنا قىرۋار اقشا قاجەت. مەندە مۇنداي قوماقتى قارجى جوق. ءالى كۇنگە دەيىن ەسىمدە، ريزابەك الەم بىرىنشىلىگىنە وبلىس اتىنان قاتىسۋى ءتيىس ەدى. ءبىراق باسقارما تاعى ءۇنسىز قالدى. ءبىر كۇنى الماتىدان جىگىتتەر حابارلاسىپ، قارجى بولەتىندەرىن ايتىپ، وزدەرىنە شاقىردى. بالامدى الىپ، الماتىعا جول تارتتىم. بىردەن ينتەرناتقا قابىلداپ، دۇنيەجۇزىلىك جارىسقا قاتىستىردى. ارينە، بۇل مۇمكىندىكتى پايدالاندىق، - دەيدى قانات جولداسباي.

ريزابەك 2010-جىلى استاناداعى قاجىمۇقان مۇڭايتپاسوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىندە ءتالىم العان، 2019-جىلى الماتىداعى «شاڭىراق» شاعىن اۋدانىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنە قابىلدانعان.

ريزابەك - ەڭبەكقور بالۋان

ريزابەك ايتمۇحان - بيىل ەلىمىزدىڭ عانا ەمەس، الەمدىك كۇرەس ماماندارىنىڭ جوعارى باعاسىن العان بوزكىلەم شەبەرى. ول جىلدىڭ باسىندا الماتىدا وتكەن كۇرەستەن ق ر- نىڭ VI جازعى سپارتاكياداسىندا چەمپيون اتاندى. وسىدان كەيىن كوكتەمدە استانادا وتكەن ەرەسەكتەر اراسىنداعى ازيا چەمپيوناتىندا كۇمىس جۇلدەگە يە بولدى. سونداي-اق اممان قالاسىندا وتكەن جاستار اراسىنداعى الەم چەمپيوناتىندا 2-ورىن الدى.

ريزابەك كۇرەسپەن اينالىسا باستاعان كەزدەن بەرى تارتىپپەن ءجۇردى. ءالى دە سولاي، تارتىپپەن جۇرەدى. تاڭەرتەڭ ساعات 6:30 دا تۇرىپ، جاتتىعادى. كەشكى 22:00 دە ۇيىقتايدى. بوس ءجۇرىس، بوس قىدىرىس دەگەن جوق. ءبارى ساعاتتاي ءتارتىپ. وسى ءتارتىپ پەن ەڭبەكتىڭ ارقاسىندا مىنە، الەم چەمپيونى اتاعىن جەڭىپ الىپ وتىر. ول بالا كەزىنەن «اۆتوريتەتتەردى» مويىندامايتىن. وزىنە سەنىمدى بولىپ ءوستى. بۇل جەڭىس وڭاي كەلگەن جوق. بۇل 9 جىل ەڭبەكتىڭ، قارا تەردىڭ ارقاسىندا كەلگەن جەڭىس، - دەيدى بالۋاننىڭ اكەسى حالىق ءۇنى سايتىنا بەرگەن سۇحباتىندا.

الەم چەمپيوناتىندا ۆولونتەر بولعان

كۇرەس تۇرلەرىنەن 2019-جىلعى الەم چەمپيوناتى استانا قالاسىندا ءوتتى. سول كەزدە ريزابەك ۆولونتەر بولعان. جۇمىسى بوز كىلەمدى تازالاپ، بالۋاندارعا جاعداي جاساعان. اراعا 4 جىل سالا الەم مىقتىلارى باس قوسقان جارىستا جەڭىس تۇعىرىنا كوتەرىلدى.

وليمپيادالىق سالماققا اۋىسادى

92 كيلوعا دەيىنگى سالماق وليمپيادا باعدارلاماسىندا جوق. سوندىقتان دا ريزابەك الداعى جارىستارعا 97 كيلو سالماقتا بارعىسى كەلەدى. بۇل سالماقپەن وليمپياداعا قاتىسۋعا بولادى.

وسى الەم چەمپيوناتىنان كەيىن جوعارى سالماققا اۋىسۋ جايلى شەشىم قابىلدادىق. 97 كيلوعا دەيىنگى وليمپيادالىق سالماققا اۋىسامىن. وليمپيادا ويىندارىنا بارۋ ءۇشىن بارىمدى سالامىن. وليمپيادا چەمپيونى اتانعىم كەلەدى، - دەيدى بالۋان.

«جاتتىعۋ جاساعىم كەلمەگەن...»

ريزابەك پەن ءىنىسى الىشەردىڭ كۇرەسكە قاتىسۋىنا اكەسىنىڭ قولداۋى سەبەپ بولعان. ارعى اتاسى قايىربەك تۇرجان ۇلى جولداسباي دا بالۋان بولعان.

9 جىل بۇرىن اكەم مەنى كۇرەسكە سۇيرەپ الىپ كەلدى. مەن مۇلدە جاتتىعۋ جاساعىم كەلمەيتىن، اكەم قيناپ ءجۇرىپ ۇيرەتتى. ودان كەيىن وزىمە دە ۇناپ كەتتى. مىنە، 9 جىلدان كەيىن قازاقستان تاريحىنداعى تۇڭعىش الەم چەمپيونى اتاندىم. 19 جاس ءۇشىن جاقسى جەتىستىك دەپ ويلايمىن، - دەيدى ريزابەك بۇكىلالەمدىك كۇرەس قاۋىمداستىعىنا بەرگەن سۇحباتىندا.

ريزابەك - ۇلتتىق ۇلان ساربازى

وسى جىلدىڭ جازىندا الماتى قالاسىنداعى قازاقستان رەسپۋبليكاسى ۇلتتىق ۇلانىنىڭ قاتارىنا مەرزىمدى اسكەري قىزمەتكە شاقىرىلعان.

ايتا كەتەيىك، ريزابەك ايتمۇحان بەلگرادتاعى الەم چەمپيوناتىنىڭ 1/8 فينالىندا ماجار ەلىنىڭ سپورتشىسى بالاش يۋحاشتى 13:3 ەسەبىمەن جەڭدى. ودان كەيىن تۇرىك بالۋانى فەيزۋللا اقتۇرىكتەن 11:0 ەسەبىمەن ايلاسىن اسىردى. ال جارتىلاي فينالدا گرۋزين بالۋانى ميريان مايسۋرادزەنى 8:2 ەسەبىمەن ايقىن ۇتىپ شىقتى. فينالدا ازەربايجاندىق سپورتشى وسمان نۇرموگامەدوۆتى جەڭدى.

massaget.kz