الەم ەلدەرىندە بالالار جازعى دەمالىستى قالاي وتكىزەدى؟
استانا. قازاقپارات - ەڭبەك ءتۇبى - بەرەكە. وسىلاي دەگەن جاپون وقۋشىلارى جازعى دەمالىس كەزىندە دە تىنىم تاپپايدى، دەپ حابارلايدى 24kz.

مۇعالىمدەردىڭ بەرگەن تاپسىرمالارىن ورىندايدى. وڭتۇستىك كورەيادا دا وسىعان ۇقساس جاعداي. بالالاردىڭ جۇكتەمەسى جوعارى. جازعى دەمالىس تا قىسقا. شامامەن ءبىر ايعا عانا سوزىلادى. وڭتۇستىك كورەيا وقۋشىلارى ۇزدىكتەردىڭ قاتارىنا كىرەدى. مۇنىڭ ءبىر سەبەبى جازعى دەمالىستىڭ قىسقا بولۋىمەن دە بايلانىستى دەيدى كەيبىر ساراپشىلار. ال باسقالار فينليانديانى مىسالعا كەلتىرەدى. مۇندا جازعى دەمالىس 10 اپتاعا جالعاسادى. ءبىراق سونىڭ وزىندە دە ەلدىڭ ءبىلىم بەرۋ جۇيەسى وزىق سانالادى.
ا ق ش پەن ەۋروپادا بالالار قالاي دەمالادى؟
ا ق ش پەن ەۋروپادا وقۋشىلاردىڭ دەمالىس كەزىندە ۋاقىتىن قىزىقتى وتكىزۋگە ەرەكشە كوڭىل بولىنەدى. مۇندا ءبىلىم بەرۋ ماقساتىنداعى ساياحات ۇيىمداستىرىلادى. تانىمدىق ەكسكۋرسيالار دا قاراستىرىلعان. بالالار ۇلتتىق ساياباققا نە تاريحي مۇراجايلارعا بارادى. سوسىن جازعى لاگەرلەر بار. كوبى اقىلى. ولار ادەتتە سپورت، اسكەري دايىندىق نە شەت ءتىلىن ۇيرەنۋ سەكىلدى ناقتى ءبىر باعىتتار بويىنشا جۇمىس ىستەيدى.
سيۋزي لۋپەرت، ا ق ش لاگەرلەر قاۋىمداستىعىنىڭ اتقارۋشى ديرەكتورى:
- لاگەر - بۇل بالالاردىڭ قاۋىپسىز ورتاسى. مۇندا وقۋشىلار ءتۇرلى ءىس-شارالار مەن سايىستار ۇيىمداستىرىپ، ۋاقىتىن قىزىقتى وتكىزەدى. ولاردىڭ تاعى ءبىر ارتىقشىلىعى، بالالار گادجەتتەردى پايدالانبايدى. ءار جەردەن كەلگەن ءوزى قاتارلاس قۇربى-قۇرداستارىمەن جاقىن ارالاسىپ تانىسادى. اتا-اناسىنان الشاقتا ءار مەزەتتى باعالاي ءبىلۋدى ۇيرەنەدى.
«اكادەميالىق لاگەر» ماماندىق تاڭداۋعا كومەكتەسەدى بۇدان بولەك، ءىرى ۋنيۆەرسيتەتتەر ۇيىمداستىراتىن «اكادەميالىق لاگەرلەر» بار. ولار 13 پەن 17 جاس ارالىعىنداعى جەتكىنشەكتەرگە ارنالعان. جاسوسپىرىمدەر جوعارى وقۋ ورىندارىندا ءدارىس تىڭدايدى، سەمينارلار مەن تاجىريبەلىك زەرتتەۋلەرگە قاتىسادى. مۇنداي «اكادەميالىق لاگەرلەردىڭ» كەلەشەكتە ماماندىق تاڭداۋدا كوپ كومەگى ءتيىپ جاتادى. سوسىن ەۋروپا مەن امەريكادا دەمالىس كەزىندە جۇمىس ىستەيتىن جاسوسپىرىمدەر دە از ەمەس. ولار بالالاردى قارايدى، قارتتارعا جاردەمدەسەدى، ساياباقتارداعى اعاشتار مەن گۇلدەردى باعىپ كۇتەدى، فەرمالاردا جەمىس-جيدەك تەرەدى.
ەۋروپا مەن ا ق ش- تا جازدا بالالار ەكى ايداي تىنىقسا، وڭتۇستىك كورەيادا ەڭ قىسقا جازعى دەمالىستىڭ ءبىرى سانالادى. ول نەبارى 4 اپتاعا عانا جالعاسادى. شىلدەنىڭ اياعىنان تامىزدىڭ ورتاسىنا دەيىن سوزىلادى. ءبىراق بيلىك سونىڭ ارقاسىندا وقۋشىلارى ۇلگەرىم بويىنشا ۇزدىكتەردىڭ قاتارىنا كىرەتىنىن ايتادى. دەسە دە، قاتاڭ جۇيەگە قاتىستى سىن ايتاتىندار دا كوپ. ولار تاڭنان كەشكە دەيىن ساباقتان قولدارى بوسامايتىن بالالاردىڭ شارشايتىنىن العا تارتادى. ءتىپتى دەمالىس كەزىندە دە وقۋشىلار مەكتەپ باعدارلاماسى بويىنشا قوسىمشا ساباقتارعا بارادى.
جاپونيادا دەمالىس كەزىندە كوپ تاپسىرما بەرىلەدى
جاپون بالالارى دا از دەمالادى. مۇندا وقۋ جىلى بىزدىكىندەي قىركۇيەكتە ەمەس، ساۋىردە باستالادى. ول 3 سەمەسترگە بولىنگەن. ءار سەمەستر اياقتالعاندا وقۋشىلار دەمالىسقا شىعادى. جازعى دەمالىس شىلدەنىڭ سوڭىنان باستالىپ، ءبىر ايعا عانا جالعاسادى. ءبىراق سونىڭ وزىندە بالالار ساباق وقۋمەن بولادى. ويتكەنى كوپ تاپسىرما بەرىلەدى. سونىڭ ىشىندە «ەركىن زەرتتەۋلەر» دەگەن بار. ونىمەن باستاۋىش جانە ورتا مەكتەپ بالالارى اينالىسادى. سوسىن بالالار ساباقتان بوس كەزدە ۋاقىتىنىڭ كوبىن ەمتيحانعا دايىندىقپەن وتكىزەدى. وسىلايشا، وسكەلەڭ ۇرپاق از دەمالىپ، كوپ ەڭبەكتەنۋگە ۇيرەنەدى. مامانداردىڭ ايتۋىنشا، سونىڭ ناتيجەسىندە بالالاردىڭ جاۋاپكەرشىلىگى ارتىپ، ەرەسەك ومىرگە تەز بەيىمدەلىپ كەتەدى.