الەم ەلدەرىن قازاقستاننان ۇلگى الۋعا شاقىرامىز - دۇنيەجۇزىلىك يسلام ليگاسى
دۇنيەجۇزىلىك يسلام ليگاسى باس حاتشىسىنىڭ ورىنباسارى ابدۋراحمان ابدۋللا ءال- زايد الەم ەلدەرىن قازاقستاننان ۇلگى الىپ، يادرولىق قارۋدان ارىلۋعا شاقىردى، دەپ حابارلايدى Kazinform.
«ءبارىمىزدىڭ باسىمىزدى كەزەكتى مارتە قوسقان وسىناۋ زاماناۋي قالادا ءبىز بۇكىل الەمدە بەيبىتشىلىكتى قالايتىن نيتەمىزدى سان مارتە ناقتىلاعان ەدىك. قوعامدىق كەلىسىمگە قول جەتكىزۋگە دەگەن ۇمتىلىسىمىز بىزدەردىڭ پىكىر قاراما- قايشىلىعىمىزدى دا ەڭسەرىپ وتىر. جالپى ادامي قۇندىلىقتارىمىزدى نىعايتۋ جانە ولاردى ءتيىمدى جوبالارعا اينالدىرۋ ءۇشىن قازىرگى زامانعى كوپتەگەن سىن- تەگەۋرىنگە قاتىستى كوزقاراسىمىز بەن ۇستانىمىمىزدى جاقىنداستىرا تۇسۋگە ءتيىسپىز» ، - دەدى ول الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ وتىرىسىندا.
وسى ورايدا ءدىن قايراتكەرى الەمدە ادامداردىڭ ءولىم- جىتىمىنە سەبەپ بولىپ وتىرعان قانتوگىستەردى توقتاتۋعا ۇندەدى.
«ءبىز الەم ەلدەرىن جويقىن قارۋدان ءوز ەركىمەن باس تارتقان قازاقستان رەسپۋبليكاسىنان ۇلگى الىپ، يادرولىق الەۋەتتەرىنەن ارىلۋعا شاقىرامىز. قازاقستان قارۋدىڭ ورنىنا جانجالداردى شەشۋدىڭ قۇرالى رەتىندە ديالوگ پەن ءوزارا تۇسىنىستىك جولىن تاڭداپ وتىر. سول ءۇشىن قازاق ۇكىمەتى مەن حالقىنا شىنايى ريزاشىلىعىمىزدى بىلدىرەمىز»، - دەدى ابدۋراحمان ابدۋللا ءال- زايد.
