الەم كوشباسشىلارى ترامپ ەنگىزگەن تاريفتەرگە قالاي قارايدى

استانا. KAZINFORM – ا ق ش پرەزيدەنتى دونالد ترامپ ەلدىڭ بارلىق ساۋدا سەرىكتەسىنە 10 پايىزدىق باج سالىعىن ەنگىزەتىنىن، سونداي-اق ونداعان باسقا ەلگە باج سالىعىن ارتتىراتىنىن حابارلادى. Reuters ترامپتىڭ بۇل ساياساتىنا الەم كوشباسشىلارى نە دەيتىنىن زەردەلەدى.

جاپونيا پرەمەر-ءمينيسترى سيگەرۋ يسيبا

- جاپونيا – ا ق ش- قا ەڭ كوپ ينۆەستيتسيا سالاتىن ەل، سوندىقتان بىزدە (ۆاشينگتون ءۇشىن) بارلىق ەلگە بىركەلكى تاريف قولدانۋدىڭ ءمانى قانشالىقتى دۇرىس دەگەن سۇراق تۋىندايدى. ءبىز جاپونيانىڭ ۇلتتىق مۇددەسى ءۇشىن نە جاقسى ەكەنىن قاراستىرۋىمىز كەرەك. ءبىز ەڭ ءتيىمدى جاۋاپ تابۋ ءۇشىن بارلىق نۇسقانى قاراستىرىپ جاتىرمىز.

كانادا پرەمەر-ءمينيسترى مارك كارني

- (ترامپ) كانادا مەن ا ق ش اراسىنداعى ماڭىزدى قاتىناستاردى ساقتاپ قالدى. الايدا بولات پەن اليۋمينييگە سالىناتىن باج سالىعى سياقتى، فەنتانيل سالىعى ساقتالىپ قالدى. ءبىز بۇل تاريفتەرگە قارسى شارالار قولدانۋ ارقىلى كۇرەسەمىز، جۇمىسشىلارىمىزدى قورعايمىز جانە G7 ەلدەرىندەگى ەڭ كۇشتى ەكونوميكانى قۇرامىز.

وڭتۇستىك كورەيا پرەزيدەنتىنىڭ مىندەتىن اتقارۋشى حان دوك سۋ

- جاھاندىق ساۋدا سوعىسى شىندىققا اينالدى. ۇكىمەت داعدارىستى ەڭسەرۋ ءۇشىن بارلىق رەسۋرستى پايدالانۋى كەرەك.

شۆەيتساريا پرەزيدەنتى كارين كەللەر-زۋتتەر

- فەدەرالدى كەڭەس الداعى قادامداردى تەز ارادا انىقتايدى. ەلدىڭ ەكونوميكالىق مۇددەلەرى باسىمدىق، ال ەركىن ساۋدا - باستى قۇندىلىق بولىپ قالا بەرەدى.

يتاليا پرەمەر-ءمينيسترى دجوردجا مەلوني

- ءبىز ا ق ش- پەن كەلىسىمگە كەلۋ جانە باتىستى باسقا ويىنشىلاردىڭ پايداسىنا السىرەتەتىن ساۋدا سوعىسىن بولدىرماۋ ءۇشىن قولدان كەلگەننىڭ ءبارىن جاسايمىز.

بۇعان دەيىن قىتاي ا ق ش تاريفتەرىنە بايلانىستى جاۋاپ شارالارىن دايىنداپ جاتقانى حابارلانعان.