الەمگە كەرەك ۋراننىڭ 40 پايىزىن قازاقستان شىعارىپ وتىر

қазатом
Фото: Қазатомөнеркәсіп АҚ

استانا. KAZINFORM - بىلتىر دۋبايدا وتكەن بىرىككەن ۇلتتار ۇيىمىنىڭ COP28 كليماتتىق وزگەرىستەر جونىندەگى كونفەرەنتسياسىندا 20 دان استام مەملەكەت 2050 -جىلعا قاراي اتوم ەنەرگەتيكاسى قۋاتىن ءۇش ەسە ارتتىرۋ تۋرالى دەكلاراتسياعا قول قويدى.

ماڭىزدى قۇجات اتوم ەنەرگەتيكاسى بۇكىل الەمدە نولدىك شىعارىندىلارعا قول جەتكىزۋ ءۇشىن ماڭىزدى ءرول اتقاراتىنىن راستايدى.

وسى ورايدا «قازاتومونەركاسىپ» ا ق باسقارما ءتوراعاسى مەيىرجان يۋسۋپوۆ بىلتىر اتقارىلعان جۇمىستارعا توقتالىپ، كومپانيانىڭ الداعى جوسپارىمەن ءبولىستى.

- اتوم ەنەرگەتيكاسى ەلەكتر قۋاتىن ۇلكەن كولەمدە ۇزدىكسىز قامتاماسىز ەتۋ مۇمكىندىگىنە يە بولعاندىقتان، ول تۇراقتى، ەكولوگيالىق تازا جانە ورنىقتى ەنەرگيا بالانسىنا ۇمتىلاتىن ەلدەر ءۇشىن تاپتىرماس قۋات كوزى دەپ سانالادى. قازاقستان الەم بويىنشا ەنەرگەتيكالىق قاجەتتىلىكتەر ءۇشىن وتىندى قامتاماسىز ەتە وتىرىپ، جىل سايىن الەمدىك ۋران ءوندىرىسىنىڭ شامامەن 40 پايىزىن شىعارىپ كەلەدى. بۇل - الەمدەگى ءاربىر ءۇشىنشى يادرولىق رەاكتور قازاقستاندىق ۋرانمەن جۇمىس ىستەيتىنىن بىلدىرەدى. الەمدەگى ەڭ ءىرى ۋران ءوندىرۋشى رەتىندە ءبىز بۇكىل الەم بويىنشا اتوم ەلەكتر ستانتسيالارى ءۇشىن ۋراندى تۇراقتى جانە سەنىمدى جەتكىزۋدى قامتاماسىز ەتۋگە دايىنبىز، - دەدى م. يۋسۋپوۆ.

مەملەكەت باسشىسى وتكەن جىلدىڭ قىركۇيەك ايىنداعى ءوز جولداۋىندا رەتتەلەتىن ساتىپ الۋدا وتاندىق تاۋار كولەمىن ۇلعايتۋدىڭ جانە وفتەيك جۇيەسىن تولىققاندى ىسكە قوسۋدىڭ ماڭىزىن اتاپ وتكەن بولاتىن.

— «قازاتومونەركاسىپ» كومپانياسىندا 2019 -جىلدان باستاپ يمپورتتى الماستىرۋ جونىندەگى جەرگىلىكتى جوبالاۋ كەڭسەسى جۇمىس ىستەيتىنىن اتاپ وتكىم كەلەدى. ونىڭ قىزمەتىنە جاڭا وندىرىستەر قۇرۋ جونىندەگى جوبالاردى قاراۋ جانە وتاندىق تاۋار وندىرۋشىلەردى قولداۋ كىرەدى. بىلتىر «قازاتومونەركاسىپتىڭ» ەنشىلەس جانە تاۋەلدى ۇيىمدارى جالپى سوماسى 1,2 ميلليارد تەڭگەگە 50 وفتەيك-شارت جاساستى. پرەزيدەنت سونداي- اق مينەرالدى- شيكىزات بازاسىن تولىقتىرۋ قاجەتتىگىن اتاپ كورسەتتى. بۇل ماسەلە بىزدەگى باسىمدىقتاردىڭ ءبىرى بولىپ تابىلادى. كومپانيا جاڭا كەن ورىندارىن اشۋعا باعىتتالعان اۋماقتاردى باعالاۋ ءۇشىن گەولوگيالىق بارلاۋ جۇمىستارىنىڭ اۋقىمدى باعدارلاماسىن ىسكە قوسۋدى جوسپارلاپ وتىر، - دەدى باسقارما ءتوراعاسى.

الەمدەگى تۇراقسىز گەوساياسي جانە تاۋەكەلدەر جاعدايىندا «قازاتومونەركاسىپ» تابيعي ۋراندى سەنىمدى جەتكىزۋشى رەتىندە ءوزىنىڭ كوشباسشىلىق ورنىن ساقتاپ كەلە جاتقانىن اتاپ وتكەن ءجون.

سوڭعى جاڭالىقتار