الەم بويىنشا ەڭ جوعارى ايلىق تولەنەدى - شۆەيتساريادا وقيتىن قازاقستاندىق ستۋدەنت

استانا. KAZINFORM - رامازان قۇربانبايەۆ قوناق ءۇي ءىسى ماماندىعى بويىنشا شۆەيتساريا مەملەكەتىندەگى Cesar Ritz Colleges ۋنيۆەرسيتەتىندە ءبىلىم الىپ جاتىر. بيىل 4-كۋرستا وقيتىن ول اتالعان وقۋ ورنىندا پرەزيدەنت بوپ سايلانعان. الەمدەگى وتە قىمبات ەلدەردىڭ قاتارىنا ەنەتىن شۆەيتسارياعا وقۋ ءتۇسۋدىڭ ارتىقشىلىعى، ءومىر ءسۇرۋ سالتى تۋرالى ماسساگەت رامازان قۇربانبايەۆپەن سۇحباتتاستى.

«اتا-انام مەنى قولدادى»

رامازان - جاڭاوزەن قالاسىنىڭ تۋماسى. وقۋعا IELTS ەمتيحانىنىڭ ناتيجەسىمەن تۇسكەن.

«جاسىم – 20 دا. ءبىلىم-يننوۆاتسيا ليتسەيىنىڭ تۇلەگىمىن. قازىر شۆەيتساريا مەملەكەتىندەگى الەمدەگى الدىڭعى قاتارداعى ۋنيۆەرسيتەتتەردىڭ بىرىندە «تۋريزم، قوناق جايلىلىق جانە قوناق ءۇي ىستەرى» ماماندىعىنا وقىپ جاتىرمىن. ۋنيۆەرسيتەتكە IELTS تاپسىرۋ ارقىلى جانە اتەستاتتاعى ءبىلىم كورسەتكىشتەرىمەن ءتۇستىم. نەلىكتەن شۆەيتساريانى تاڭدادىم؟ سەبەبى شۆەيتساريا تۋريزم جانە قوناقجايلىلىق بويىنشا ۇلگى تۇتاتىنداي ەلدەردىڭ ءبىرى. بىلسەڭىزدەر، كوپتەگەن العاشقى الەمگە تانىمال قوناقۇي ىسكەرلەرى وسى ەلدەن شىققان»، - دەدى ول.

ونىڭ ايتۋىنشا، ەلىمىزدە تۋريزم باستى قۇندىلىققا اينالۋى كەرەك.

«شۆەيتسارياعا 2021 -جىلى جازدا كەلدىم. نەگىزگى ماقساتىم - قوناقجايلىلىقتىڭ قىر-سىرىن ۇيرەنۋ ەدى. اتا انام بۇل شەشىمىممەن تولىقتاي كەلىسىپ، مەنى جان جاقتى قولدادى. جالپى تۋريزم ماماندىعى مەملەكەتتىڭ باستى قۇندىلىعىنا اينالۋى كەرەك. سوندىقتان دا شەتەلدە وسى ماماندىقتى وقىپ، وزگە مادەنيەتتەردى ۇيرەنىپ، ءوز ەلىمە ەڭبەگىمدى سىڭىرگىم كەلەدى»، - دەدى رامازان.

«ستۋدەنتتەرگە جاقسى جاعداي جاسالعان»

ول بۇل ەلدە وقۋدىڭ ارتىقشىلىقتارىن اتاپ ءوتتى.

«مۇندا 3 جىل وقيمىز. 6 اي سايىن ەكى رەت تاجىريبەدەن وتۋگە جىبەرەدى. الەمنىڭ كەز كەلگەن ەلىنە جۇمىسقا، تاجىريبەدەن وتۋىمىزگە كومەكتەسەدى. ساباقتا سوڭعى سۇرانىسقا يە ترەندتەرمەن قوسا، تاريحي مالىمەتتەردى ۇيرەنەمىز. ستۋدەنتتەرگە جاقسى جاعداي جاسالعان. بىزدە 2 كامپۋس ەكى ءتۇرلى قالادا ورنالاسقان. ءبىرىنشى كامپۋس باستاۋىش دەۋگە كەلەدى. وندا تاڭعى، تۇسكى جانە كەشكى اس بەرىلەدى. اپتا سوڭىندا تۇسكى جانە كەشكى اس بەرىلەدى. ال ەكىنشى كامپۋستا تۇسكى جانە كەشكى اس بەرىلەدى، ال اپتا سوڭىندا اس ۇيىندە ءوزىمىز تاماق جاساپ جەيمىز. ودان بولەك، ءار ءتۇرلى سپورتتىق جانە ونەرلى كلۋبتار، ستۋدەنتتىك كوميتەتتەر بار»، - دەدى رامازان.

سۋرەت جەكە ارحيۆتەن

ونى ۋنيۆەرسيتەت باسشىلىعى وقۋ ورنىنىڭ پرەزيدەنتى ەتىپ سايلاعان.

«ءوزىم ستۋدەنتتىك ومىردە بەلسەندىلىك كورسەتىپ ءجۇردىم. ءار ءتۇرلى كلۋبتارعا قاتىستىم. سونداي-اق، مۋزىكا، فوتو جانە ۇستەل تەننيسى كلۋبىن اشتىم. كەيىن 3 مارتە ستۋدەنتتىك كوميتەتتە بولىپ، ءارتۇرلى پوزيتسيالاردا جۇمىس جاسادىم. ياعني ءىس-شارا ۇيىمداستىرۋمەن اينالىستىم. سودان سوڭ مەنى پرەزيدەنت ەتىپ سايلادى. قازىرگى تاڭدا كوماندامەن ءىس-شارالار ۇيىمداستىرىپ جاتىرمىز»، - دەدى ول.

رامازان فرانسۋز ءتىلىن مەكتەپ كەزىنەن مەڭگەرگەن.

«بىزگە كامپۋستا جاتاقحانادان بولمە بەرىلدى. ءبىر بولمەدە ءبىر ادامنان ورنالاستىق. بولمەدە بارلىق قاجەتتىلىكتەر بار. مۇندا فرانسۋز ءتىلىن ءبىلۋ مىندەتتى. ءوزىم فرانسۋز ءتىلىن قوسىمشا مەكتەپ كەزىندە وقىپ باستادىم. ءتىل بىلگەنىم، ساباقتا، پراكتيكادا كوپ كومەك بەردى»، - دەدى ول.

«پرەزيدەنت جىل سايىن اۋىسادى»

شۆەيتسارياداعى جالاقى الەمدەگى ەڭ جوعارى ايلىق بولىپ ەسەپتەلەدى.

«راسىمەن، شۆەيتساريا - وتە قىمبات ەل. ءبىراق ستۋدەنتتىك جەڭىلدىكتەر كوپ. حالىقتىڭ جاعدايى جوعارى دەپ ايتا الامىن. مۇندا تولەنەتىن جالاقى الەمدەگى ەڭ جوعارى ايلىق دەپ ەسەپتەلەدى»، - دەدى ول.

رامازان مۇندا بارلىعى ۋاقىتىلى، ءبارى ءتارتىپ بويىنشا جۇرەتىنىن ايتتى.

«تۇنگى ءومىرى وتە تىنىش، ءتىپتى ۇلكەن قالالاردا ادامدار ءجيى كەزدەسپەيدى. جەكسەنبى كۇندەرى بارلىق ورتالىقتار، دۇكەن جانە ءدارىحانالار جابىق بولادى. حالىقتىڭ كوپشىلىگى كەمىندە 2 تىلدە سويلەيدى. جالپى شۆەيتساريادا رەسمي 4 ءتىل بار: نەمىس، فرانسۋز، يتاليان جانە رۋمىن ءتىلى. مەملەكەتتىڭ 60 پايىزى تاۋلى ورتادا ورنالاسقان. سوعان قاراماستان ينفراسترۋتۋراسى الدىڭعى قاتاردا. سونداي-اق، ەرەكشەلىگى - ەل پرەزيدەنتى جىل سايىن اۋىسىپ وتىرادى»، - دەدى ول.

«وتباسىلىق ەرەجەلەرى بار»

شۆەيتساريالىقتار قوناققا بارسا تۇنگى 12 گە دەيىن قايتىپ كەتەدى. بۇل - ولاردىڭ اينىماس وتباسىلىق ەرەجەلەرىنىڭ ءبىرى.

«مۇنداعى وتباسىلىق داستۇرلەردى ونشا بىلە بەرمەيمىن. دەگەنمەن مەن بىلەتىن ەرەجەلەردىڭ ءبىرى - قوناققا كەشكى اسقا كەلگەندە تۇنگى 12 بولماي قايتۋ كەرەك. سونداي-اق، حالقى بالالارعا كىشى ەرەسەك ادام رەتىندە قارىم قاتىناس جاسايدى»، - دەدى ول

جۇمىسشىلارعا جاقسى جاعداي جاسالىپ، جوعارى جالاقى تولەنەدى.

«وسىعان دەيىن ءارتۇرلى جۇمىس جاساپ كوردىم. داياشى، رەسەپشن جانە ساتۋشى. كەيدە ءتىل جاعىنان قيىندىق بولىپ تۇرادى. ءار جەردىڭ ءوزىنىڭ ديالەكتىمەن سويلەگەندە تۇسىنبەي قالاتىنىم بار. مۇندا زاڭ بويىنشا اپتاسىنا جۇمىس ساعاتى 40-45 تەن اسپاۋى كەرەك. ورتاشا ساعاتىنا - 23 فرانكتان باستاپ تولەنەدى. نەگىزى بۇنىڭ بارلىعى جۇمىسشىعا جاقسى جاعداي دەپ ەسەپتەلەدى»، - دەدى ول.

«قازاقشا اسحانا جوق»

ول قازاقتار بولىپ، باس قوساتىنىن ايتتى.

«بۇل جاقتا ءار ەلدىڭ اسحاناسىن تاڭداپ جەيمىز. ءوزىمىز وقۋ ورنىندا دا جاقسى تاماقتاندىرادى. ءار اپتا ءار ءتۇرلى ەلدىڭ تاماقتارى دايىندالادى. قازاقشا اسحانا جوق. سوندىقتان اندا-ساندا قازاقتار بولىپ جينالىپ، ەت اسىپ، مانتى مەن پالاۋىمىزدى دايىنداپ، باس قوسامىز»، - دەدى ول.

رامازاننىڭ ايتۋىنشا، مەملەكەتتىڭ مەديتسيناسى جاقسى دامىعان.

«شۆەيتساريادا مەديتسينالىق ساقتاندىرۋ ماڭىزدى جانە بۇل مەملەكەتتەن تالاپ ەتىلەدى. سەبەبى ساقتاندىرۋ كوپتەگەن دارىگەرگە كەتەتىن شىعىنداردى جابادى. جالپى مەديتسيناسى، فارماتسيەۆتيكاسى جاقسى دامىعان. وسى جاقتا كوپتەگەن ءدارى شىعارادى»، - دەدى ول.

«2 اپتادا ءتورت مەملەكەتكە باردىم»

رامازان شۆەيتسارياداعى قازاقتار قاۋىمداستىعى تۋرالى دا ايتىپ بەردى.

«مۇندا نەگىزى قازاقتار بار. ماسەلەن، مەن تۇراتىن قالادا ءبىر قازاق وتباسى بار. ولار سول فارماتسيەۆتيكا سالاسىندا جۇمىس جاسايدى. ودان بولەك شۆەيتساريادا «بىرلىك» اتتى قازاقتار قاۋىمداستىعى بار. وسى قاۋىمداستىقپەن قوسىلىپ، ۇلتتىق مەرەكەلەر مەن توي-دۋمانداردى بىرگە تويلايمىز. باسقا ۇلتتاردان اراب، قىتاي جانە ورىستار كوپ. ءبىرىنشى كۇننەن باستاپ اينالامداعىلارمەن دوستاسىپ، جاقسى ارالاسىپ كەتتىم»، - دەدى ول.

ول ەكى اپتادا 4 مەملەكەتتى ارالاپ، ساياحاتتاعان.

«ساياحاتتاعاندى جاقسى كورەمىن. اينالامىزدا وتە ادەمى، كەرەمەت ەلدى مەكەندەر ورنالاسقان. فرانتسيا، گەرمانيا جانە يتاليا مەملەكەتتەرىنە بارىپ تۇرامىز. ءبىر جولى ەكى اپتاعا 4 ءتۇرلى ەلدى ارالاۋعا ءبىر ءوزىم شىعىپ كەتكەنمىن. سول ساپار قاتتى ۇنادى. ءار ءتۇرلى ادامدارمەن تانىسىپ، جاقسى اسەر الدىم»، - دەدى رامازان.

«جالاقىسى ءومىر ءسۇرۋ باعاسىنا ساي»

رامازان شەتەلدە العان بىلىمىمەن ۇشتاستىرىپ، ەلىمىزدەگى تۋريزم بويىنشا دامىتۋى ءتيىس سالالاردى اتاپ ءوتتى.

«بىرىنشىدەن ءبىزدىڭ ەلگە ينفراسترۋكتۋرانى دامىتۋ كەرەك. قانشاما كەرەمەت ەلدىمەكەندەر بار، ءبىراق جەتۋ قيىن. ەكىنشىدەن، ءبىر تۋريستىك مەكەن مەن ەكىنشىسىنىڭ ارالارى الىس ورنالاسقان. سوندىقتان تۋريستتەردىڭ جان-جاقتى، ءجيى كەلۋى ءۇشىن وسىلاي ءارتۇرلى ترانپورت تۇرلەرىن دامىتۋ قاجەت. ۇشىنشىدەن، جەرگىلىكتى حالىقتى، اسىرەسە تۋريستتىك مەكەن-جايدىڭ ماڭىندا تۇراتىن حالىقتىڭ تۋريسستەرگە ۇيرەنىسۋى ماڭىزدى»، - دەدى ول.

سونداي-اق، بۇل جاققا وقۋعا، ۇزاق ۋاقىتقا تۇرۋعا كەلەتىندەر ءۇشىن ەسكەرۋگە ءتيىس ەرەجەلەردى ايتتى.

«شۆەيتساريادا ايلىق جوعارى بولعانىمەن، ءومىر ءسۇرۋ باعاسى دا سوعان ساي. مۇندا ۇزاق ۋاقىتقا كەلەتىندەرگە جەرگىلىكتى تۇرعىنعا ارنالعان ءار ءتۇرلى ابونەمەنت الۋعا كەڭەس بەرەر ەدىم. ەرەجەلەر قاتاڭ ساقتالادى. كورشىلەرمەن جاقسى قارىم-قاتىناستا بولعان ءجون»، - دەدى ول.