اپەللياتسيالىق سوت ارىستانبەك مۇحامەدي ۇلىنا قاتىستى ۇكىمدى قايتا قارادى

استانا. قازاقپارات - 2024 -جىلعى 21-تامىزدا استانا قالالىق سوتىنىڭ قىلمىستىق ىستەر جونىندەگى سوت القاسى بۇرىنعى مينيستر ارىستانبەك مۇحامەدي ۇلى جانە باسقالارىنا قاتىستى قىلمىستىق ءىستى اپەللياتسيالىق تارتىپتە قارادى. بۇل تۋرالى استانا قالالىق سوتى حابارلايدى.

ەسكە سالا كەتەيىك، بيىل اقپاندا ەكس-شەنەۋنىك ارىستانبەك مۇحامەدي ۇلى 11 جىلعا باس بوستاندىعىنان ايرىلعان ەدى.

«قورعاۋشىلار، سوتتالعاندار جانە ولاردىڭ ادۆوكاتتارى سوت ۇكىمىمەن كەلىسپەي، شاعىم ءتۇسىردى. استانا قالالىق سوتىنىڭ سوت القاسى شاعىمداردىڭ دالەلدەرىن زەردەلەپ، پروتسەسكە قاتىسۋشىلاردى تىڭداپ، قىلمىستىق ءىستىڭ ماتەريالدارىن زەرتتەپ، سوتتالعانداردىڭ كىناسىنىڭ دالەلدەنگەنى تۋرالى سوت قورىتىندىلارىمەن كەلىستى. ءبىرىنشى ساتىداعى سوت ۇكىمىنىڭ كۇشىن جويۋ نەمەسە وزگەرتۋ ءۇشىن نەگىزدەر انىقتالمادى»، - دەيدى قالالىق سوتتان.

ا. مۇحامەدي ۇلى لاۋازىمدىق وكىلەتتىكتەرىن تەرىس پايدالانا وتىرىپ، كىنالىگە سەنىپ تاپسىرىلعان بوتەننىڭ مۇلكىن تالان-تاراجعا سالۋ ارقىلى اسا ءىرى مولشەردە ۇرلاۋدى ۇيىمداستىرعانى، رەيدەرلىك ارەكەتكە باعىتتالعانى، وكىلەتتىكتەرىن تەرىس پايدالانۋدى ۇيىمداستىرعانى ءۇشىن (ق ك 28-بابىنىڭ 3-بولىگى - 189-بابى 4-بولىگىنىڭ 2) تارماعى، 361-بابى 4-بولىگىنىڭ 3) تارماعى، 24-بابىنىڭ 3-بولىگى - 249-بابىنىڭ 1-بولىگى، 28-بابىنىڭ 3-بولىگى - 250-بابىنىڭ 1-بولىگى) مەملەكەتتىك قىزمەتتە قىزمەت اتقارۋعا ءومىر بويىنا تىيىم سالا وتىرىپ، 11 جىلعا باس بوستاندىعىنان ايىرۋعا؛

ا. نۇرازحان كىنالىگە سەنىپ تاپسىرىلعان بوتەننىڭ مۇلكىن تالان- تاراجعا سالۋ جولىمەن، اسا ءىرى مولشەردە ۇرلاۋعا قاتىسقانى ءۇشىن (ق ك 28-بابىنىڭ 2-بولىگى - 189-بابى 4-بولىگىنىڭ 2) تارماعى) مەملەكەتتىك قىزمەتتە قىزمەت اتقارۋعا ءومىر بويىنا تىيىم سالا وتىرىپ، 7 جىل 1 ايعا باس بوستاندىعىنان ايىرۋعا؛

ا. قوشەنوۆ جانە ا. ءسادۋاقاسوۆا كىنالىگە سەنىپ تاپسىرىلعان بوتەننىڭ مۇلكىن اسا ءىرى مولشەردە، تالان-تاراجعا سالۋ جولىمەن ۇرلاۋعا جاردەمدەسكەنى ءۇشىن (ق ك 28-بابىنىڭ 5-بولىگى - 189-بابى 4-بولىگىنىڭ 2) تارماعى) كوممەرتسيالىق جانە وزگە دە ۇيىمداردا 10 جىل مەرزىمگە ماتەريالدىق- جاۋاپتى لاۋازىمدارمەن اينالىسۋ قۇقىعىنان ايىرىلا وتىرىپ، 7 جىل 1 ايعا باس بوستاندىعىنان ايىرۋعا، سونداي- اق، ا. ءسادۋاقاسوۆاعا ۇكىمنىڭ ورىندالۋىن 5 جىلعا كەيىنگە قالدىرۋ قولدانىلدى؛

ا. ساتۋبالدين مەن ل. كوچەتوۆ كىنالىگە سەنىپ تاپسىرىلعان بوتەننىڭ مۇلكىن اسا ءىرى مولشەردە، تالان- تاراجعا سالۋ جولىمەن ۇرلاۋعا قاتىسقانى ءۇشىن (ق ك 28-بابىنىڭ 2-بولىگى - 189-بابى 4-بولىگىنىڭ 2) تارماعى) مەملەكەتتىك قىزمەتتە قىزمەت اتقارۋعا ءومىر بويىنا تىيىم سالا وتىرىپ، 7 جىلعا باس بوستاندىعىنان ايىرۋعا؛

گ. جۋاسپايەۆا وكىلەتتىگىن اسىرا پايدالانعانى جانە كورىنەۋ جالعان قۇجاتتى پايدالانعانى ءۇشىن (ق ك 250-بابىنىڭ 1-بولىگى، 385-بابىنىڭ 3-بولىگى) 2 جىلعا باس بوستاندىعىنان ايىرۋعا سوتتالعان.

سونداي- اق، گ. جۋاسپايەۆا «ق ر تاۋەلسىزدىگىنىڭ 30 جىلدىعىنا وراي راقىمشىلىق جاساۋ تۋرالى» ق ر زاڭىنىڭ نەگىزىندە نەگىزگى جازادان، ق ك 385-بابى 3-بولىگى بويىنشا قك 71-بابى 1-بولىگىنىڭ 1) تارماعى بويىنشا ەسكىرۋ مەرزىمىنىڭ وتۋىنە بايلانىستى قىلمىستىق جاۋاپتىلىقتان بوساتىلدى.

مادەنيەت جانە سپورت مينيسترلىگىنىڭ تالابى قاناعاتتاندىرىلىپ، 3,5 ميلليارد تەڭگەدەن استام سومادا كەلتىرىلگەن زالال ءوندىرىلدى.

ۇكىم زاڭدى كۇشىنە ەندى.

ايتا كەتەيىك، ۇلتتىق مۋزەيدىڭ بۇرىنعى ديرەكتورى ارىستانبەك مۇحامەدي ۇلى 2022 -جىلى 28-مامىردا قاماۋعا الىنعان ەدى.

انتيكور مۋزەي باسشىسىنا «التىن ادامنىڭ الەم مۋزەيلەرىنە شەرۋى» حالىقارالىق كورمەسىن وتكىزۋ بارىسىندا قارجى جىمقىردى دەگەن ايىپ تاقتى.