اللەرگيالىق رينيت نەدەن پايدا بولادى، ونىمەن قالاي كۇرەسۋ كەرەك
استانا. KAZINFORM - رينيتتىڭ ەڭ كوپ تارالعان «ارانداتۋشىلارى»: وسىمدىك توزاڭى، ءۇي شاڭى، جانۋارلاردىڭ ءجۇنى، زەڭ مەن ساڭىراۋقۇلاقتار، پارفيۋمەريا، تۇرمىستىق حيميا.
اللەرگيالىق رينيت - بۇل اللەرگيادان تۋىنداعان مۇرىن شىرىشتى قابىعىنىڭ ينفەكتسيالىق ەمەس قابىنۋى. يممۋندىق جۇيە توزاڭمەن، ءۇي شاڭىمەن، جانۋاردىڭ شاشىمەن بەلسەندى كۇرەسە باستايدى، ناتيجەسىندە ءىسىنۋ، مۇرىننان سۋ اعۋ، تۇشكىرۋ جانە قىشۋ پايدا بولادى. قاراپايىم تىلمەن ايتقاندا بۇل مۇرىندا «ءومىر سۇرەتىن» اللەرگيا.
رينيتتىڭ ەڭ كوپ تارالعان «ارانداتۋشىلارى»: وسىمدىك توزاڭى، ءۇي شاڭى، جانۋارلاردىڭ ءجۇنى، زەڭ مەن ساڭىراۋقۇلاقتار، پارفيۋمەريا، تۇرمىستىق حيميا. تۇقىم قۋالاۋشىلىق تا ۇلكەن ءرول اتقارادى.
- ەگەر مۇرىننان سۋ اعا بەرسە، ءبىراق تەمپەراتۋرا بولماسا، تاماق اۋىرماي، جاعدايى قالىپتى بولسا - بۇل اللەرگيا بولۋى مۇمكىن. سۋىق تيگەن كەزدە ءسىز از تۇشكىرەسىز. ەگەر مۇرىن، كوز، ءتىپتى قۇلاق قىشىسا، بۇل اللەرگيانىڭ ادەتتەگى بەلگىسى. ەگەر كوكتەم سايىن نەمەسە كۇزدە مۇرىننان سۋ اعا باستالسا، بۇل اللەرگيا. سۋىق تيگەندە ادەتتە 5-7 كۇندە كەتەدى، اللەرگيا بىرنەشە ايعا سوزىلۋى مۇمكىن، - دەيدى كارديولوگيا جانە ىشكى اۋرۋلار ع ز ي رەسپۋبليكالىق اللەرگولوگيا ورتالىعىنىڭ باسشىسى، اللەرگولوگ-يممۋنولوگ دارىگەر اراي باتىربايەۆا.
ەمدەلمەگەن اللەرگيالىق رينيت سوزىلمالى سينۋسيتكە اكەلۋى مۇمكىن، ۇيقىنىڭ بۇزىلۋى جانە شارشاۋ، كونسەنتراتسيا مەن ءومىر ساپاسىنىڭ تومەندەۋى، برونح دەمىكپەسى پايدا بولادى. بۇل اسىرەسە بالالار ءۇشىن قاۋىپتى: ناشار ۇيقى، تۇندە تىنىس الۋ پروبلەمالارى، اشۋلانشاقتىق، مەكتەپتەگى ۇلگەرىمنىڭ تومەندەۋى.
نە نارسەگە اللەرگياڭىز بار ەكەنىن قالاي تۇسىنۋگە بولادى؟
ءبىرىنشى قادام - اللەرگولوگ نەمەسە وتورينولارينگولوگقا بارۋ كەرەك. ءارى قاراي دارىگەر ارنايى IgE انتيدەنەلەرىنە تەرى سىنامالارى مەن قان تالداۋىن تاعايىنداي الادى.
ودان ءبىرجولا قۇتىلۋعا بولادى ما؟
ءيا، باقىلاۋدا ۇستاۋعا بولادى، ال كەيبىر جاعدايلاردا اللەرگەنگە سەزىمتالدىقتى نولگە دەيىن تومەندەتۋگە بولادى:
- مۇمكىندىگىنشە اللەرگەندەردەن اۋلاق بولىڭىز،
- توزاڭ ماۋسىمى كەزىندە تەرەزەلەردى جابىق ۇستاڭىز،
- كىردى بالكونعا ەمەس، ۇيدە جايىڭىز،
- اۋا تازارتقىشتار مەن شاڭسورعىشتاردى قولدانىڭىز،
- ەگەر جانۋارلارعا رەاكتسيا بولسا، ولارمەن بايلانىستى شەكتەڭىز،
- اپتاسىنا كەمىندە 2 رەت ءۇيدى تازالاپ تۇرىڭىز.
جاڭا بۋىن انتيگيستاميندەرى قىشۋدى، مۇرىننان سۋ اعۋىن، تۇشكىرۋدى جەڭىلدەتەدى، مۇرىنعا ستەرويدتى سپرەيلەر ءىسىنۋ مەن قابىنۋدى جەڭىلدەتەدى، تامىردى تارىلتاتىن تامشىلاردى تەك 3-5 كۇن قولدانۋعا بولادى، ايتپەسە تاۋەلدىلىك پايدا بولادى.
- اللەرگەنگە ءتان يممۋنوتەراپيا «اللەرگياعا قارسى ۆاكسينا» سياقتى. ورگانيزم ميكرودوزالاردىڭ كومەگىمەن اللەرگەنگە بىرتىندەپ ۇيرەنەدى. كۋرس 3-5 جىلعا سوزىلادى، ءبىراق ناتيجە وعان تۇرارلىق: كوپتەگەن ناۋقاستا سيمپتومدار جوعالادى نەمەسە ايتارلىقتاي تومەندەيدى.
ەگەر سىزدە جىل سايىن ءبىر ۋاقىتتا «سۋىق تيۋ» باستالسا، دارىگەرگە بارۋدى كەيىنگە قالدىرماڭىز. ءوز-ءوزىڭىزدى ەمدەمەڭىز. ءتىپتى مۇرىن تامشىلارى دۇرىس پايدالانباعان جاعدايدا زيان كەلتىرۋى مۇمكىن. ۇيدە كىلەم، جۇمساق ويىنشىقتار، ەسكى جيھاز سياقتى «شاڭ توزاڭدارى» جوق ەكەنىنە كوز جەتكىزىڭىز.
اللەرگيالىق رينيتتى ەمدەۋگە بولادى جانە قاجەت. زاماناۋي ادىستەر پاتسيەنتتەردىڭ كوپشىلىگىنە تولىققاندى بەلسەندى ءومىر سۇرۋگە مۇمكىندىك بەرەدى. ەگەر ءسىز نەمەسە بالاڭىز بىرنەشە اپتاعا سوزىلاتىن تۇسىنىكسىز مۇرىن بىتەلۋمەن زارداپ شەگەتىن بولسا، بۇل دارىگەرگە قارالۋعا سەبەپ بولادى. دۇرىس دياگنوز ءومىر ساپاسىن تولىعىمەن وزگەرتە الادى، - دەلىنگەن د س م حابارلاماسىندا.
