الداعى كۇندەرى اۋا رايى قانداي بولادى

استانا. KAZINFORM - «قازگيدرومەت» ر م ق الداعى كۇندەرگە ارنالعان اۋا رايى بولجامىن جاريالادى.

سينوپتيكتەردىڭ بولجامىنشا، الداعى كۇندەرى رەسپۋبليكا اۋماعى اتلانت مۇحيتىنان كەلەتىن تسيكلوننىڭ اسەرىندە بولادى. ول ەلىمىزدىڭ باسىم بولىگىندە جاڭبىر مەن جەلدىڭ كۇشەيۋىن تۋدىرادى. تەك 30-قازاندا سولتۇستىك پەن ورتالىقتا، 30-31-قازاندا رەسپۋبليكانىڭ شىعىسىندا جاۋىن-شاشىنسىز اۋا رايى ساقتالادى.

وڭتۇستىك وڭىرلەردە دە اتموسفەرالىق فرونتتاردىڭ وتۋىنە بايلانىستى جاڭبىر جاۋادى، ال تاۋلى ايماقتاردا تۇندە جاڭبىر مەن قار تۇرىندە جاۋىن- شاشىن كۇتىلەدى.

رەسپۋبليكا بويىنشا تۇنگى جانە تاڭعى ساعاتتاردا تۇمان تۇسەدى دەپ بولجانادى.

اۋا تەمپەراتۋراسىنىڭ بىرتىندەپ تومەندەۋى كۇتىلەدى: كۇندىز باتىستا +5…+10°س، سولتۇستىك پەن ورتالىقتا 2+…10+ گرادۋس، وڭتۇستىك پەن وڭتۇستىك- شىعىستا 8+…17+ گرادۋس، شىعىستا 8+…18+ گرادۋس شاماسىندا بولادى.