الداعى جىلدارى قازاقستاندا مەملەكەتتىك ءبىلىم گرانتتارى ارتادى

استانا. KAZINFORM - قازاقستاندا مەملەكەتتىك ءبىلىم گرانتتارى ارتادى.

بۇگىن ءماجىلىستىڭ جالپى وتىرىسىنان كەيىن تىلشىلەر دەپۋتات اسحات ايماعامبەتوۆكە «كەلەشەك» باعدارلاماسىنا قاتىستى سۇراق قويدى.

«كەلەشەك» ءبىرىڭعاي ەرىكتى جيناقتاۋ جۇيەسىنىڭ ەنگىزىلۋى مەملەكەتتىك گرانتتاردىڭ جويىلۋىنا اكەلمەيدى. كەلەر ءۇش جىلدىڭ بيۋدجەتىن بەكىتتىك. سول بيۋدجەتتە گرانتتىڭ كوبەيۋى قاراستىرىلعان. سوندىقتان جىل سايىن مەملەكەتتىك گرانت ارتا تۇسەدى»، - دەدى ا. ايماعامبەتوۆ.

ايتا كەتەيىك، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپارات، قوعامدىق دامۋ، مادەنيەت جانە ارحيۆ ءىسى سالالارىنداعى نورمالاردىڭ ارتىق زاڭنامالىق رەگلامەنتتەلۋىن بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى. مەملەكەت باسشىسىنىڭ تاپسىرماسىن ورىنداۋ ماقساتىندا زاڭ جوباسىنا «كەلەشەك» ءبىرىڭعاي ەرىكتى جيناقتاۋ جۇيەسىنىڭ قىزمەتىن رەگلامەنتتەيتىن ق ر عىلىم جانە جوعارى ءبىلىم مينيسترلىگىنىڭ تۇزەتۋلەرى ەنگىزىلدى.

ەسكە سالساق، بيىل جازدا ق ر عىلىم جانە جوعارى ءبىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم كوميتەتى «كەلەشەك» باعدارلاماسىنا قاتىستى تۇسىنىك بەردى.

«كەلەشەك» جۇيەسى مەملەكەتتەن باستاپقى ءبىلىم بەرۋ كاپيتالىن، مەملەكەتتىك سىيلىق اقىنى جىل سايىن تولەۋدى، ينۆەستيتسيالىق تابىستى كوزدەيدى. بۇل جيناقتار «ۇلتتىق قور - بالالارعا» جوباسى اياسىندا قالىپتاستىرىلعان قاراجاتپەن بىرگە بالالارعا ساپالى ءبىلىم الۋعا مۇمكىندىك بەرەدى.

اۆتور

رۋسلان عابباسوۆ