الداعى ءۇش جىلدا ۇلتتىق قور اكتيۆتەرى 90 ميلليارد ا ق ش دوللارىنان اسۋى مۇمكىن
بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ ۇلتتىق قورىنان 2024- 2026-جىلدارعا ارنالعان كەپىلدەندىرىلگەن ترانسفەرت تۋرالى» زاڭى قابىلداندى، دەپ حابارلايدى Kazinform.
«زاڭ جوباسىنىڭ ەرەجەلەرى ۇلتتىق قوردىڭ جيناق فۋنكتسياسىن قامتاماسىز ەتۋ جونىندەگى بيۋجەت كودەكسىنىڭ تالاپتارىن ەسكەرە وتىرىپ ايقىندالعان. بۇل رەتتە ۇكىمەت كەپىلدەندىرىلگەن ترانسفەرتتىڭ مولشەرىن ەكىنشى جىل بيۋجەتتىك قاعيدالاردى قولدانا وتىرىپ انىقتادى. بۇل قاعيدالار ۇلتتىق قور قاراجاتىنىڭ ساقتالۋىن قامتاماسىز ەتۋگە جانە ونىڭ ۆاليۋتالىق اكتيۆتەرىن 2030-جىلعا قاراي 100 ميلليارد ا ق ش دوللارىنا دەيىن جەتكىزۋگە ىقپال ەتەدى. زاڭ جوباسىندا مۇنايدىڭ كەسىمدى باعاسى 2024-جىلى باررەلىنە 43,4 ا ق ش دوللارى، 2025-2026-جىلدارى باررەلىنە 40,2 - 41,8 ا ق ش دوللارى دەڭگەيىندە بەلگىلەنگەن. وسىنى ەسكەرە وتىرىپ، ۇلتتىق قوردان كەپىلدەندىرىلگەن ترانسفەرتتىڭ مولشەرى 2023-جىلى 2,2 تريلليون تەڭگەدەن 2024-2026-جىلدارى جىل سايىن 2 تريلليون تەڭگەگە دەيىن تومەندەۋمەن ايقىندالدى»، - دەدى ۇلتتىق ەكونوميكا ءمينيسترى الىبەك قۋانتىروۆ.
ونىڭ ايتۋىنشا، جوسپارلى كەزەڭدە ۇلتتىق قوردىڭ ۆاليۋتالىق اكتيۆتەرى 2024-جىلى 68 ميلليارد ا ق ش دوللارىنا دەيىن قالپىنا كەلتىرىلىپ، ودان ءارى 2025-2026-جىلدارى 80,7 - 93,3 ميلليارد ا ق ش دوللارىنا دەيىن وسەدى دەپ ەسكەرىلگەن.
«جالپى، ۇلتتىق قوردى ورتا جانە ۇزاق مەرزىمدى پەرسپەكتيۆادا قالىپتاستىرۋ جانە پايدالانۋ ساياساتى ۇلتتىق قوردىڭ قاراجاتىن بولاشاق ۇرپاق ءۇشىن ساقتاۋعا باعىتتالعان»، - دەدى مينيستر.
