الداعى 5 جىلدا وتىن-ەنەرگەتيكا سالاسىندا 83 مىڭنان استام جۇمىس ورنى قۇرىلادى

استانا. قازاقپارات - 2030 -جىلعا دەيىن وتىن-ەنەرگەتيكا كەشەنى سالالارىندا 99 جوبا جۇزەگە اسادى جانە 83 مىڭنان استام ساپالى جۇمىس ورنى قۇرىلادى. بۇل تۋرالى ەنەرگەتيكا ءمينيسترى الماسادام ساتقاليەۆ ايتىپ بەردى.

ونىڭ ايتۋىنشا، قازىر وتىن-ەنەرگەتيكا كەشەنىندە 1671 كاسىپورىندا 303 مىڭنان استام ءارتۇرلى كاسىپتەگى جۇمىسكەرلەر ەڭبەك ەتۋدە.

- وتىن- ەنەرگەتيكا كەشەنىنىڭ سالالارىندا 2030 -جىلعا دەيىنگى كەزەڭدە 99 جوبانى جۇزەگە اسىرۋ كوزدەلگەن، جوبالار ارقىلى قۇرىلىس جانە پايدالانۋ كەزەڭدەردە 83 مىڭنان استام ساپالى جۇمىس ورنى قۇرىلادى. ماسەلەن، مۇناي- گاز جوبالاردى ىسكە اسىرۋ ارقىلى مۇناي-گاز جانە دە ارالاس سالالاردىڭ تەحنيكالىق ماماندىقتارى بويىنشا 22 مىڭعا جۋىق جۇمىس ورنىن قۇرۋعا مۇمكىندىك بەرەدى، - دەدى ا. ساتقاليەۆ

مۇناي- گاز- حيميا سالاسىنداعى 6 ءىرى جوبادا 21 مىڭنان استام جۇمىسكەر تارتىلادى، ونىڭ 18 مىڭى قۇرىلىس كەزەڭىندە جانە 3 مىڭنان استامى تۇراقتى جۇمىس ورنىنا الىنادى.

ەلەكترەنەرگەتيكا سالاسىندا 72 جوبا، ونىڭ ىشىندە 32 جاڭارتىلاتىن ەنەرگەتيكا جوباسىندا 41 مىڭنان استام جۇمىس ورنى قۇرىلادى، سونىڭ ىشىندە 35 مىڭنان استام ۋاقىتشا جانە 6 مىڭعا جۋىعى - تۇراقتى جۇمىس ورنى.

بۇعان دەيىن الماسادام ساتقاليەۆ قازاقستاندا ەنەرگەتيكتەردىڭ جالاقىسى جىل سايىن %15 ءوسىپ وتىرتىنىن حابارلاعان ەدى.

سونداي-اق، جۇمىسشى كادرلارعا ارنالعان يپوتەكالىق باعدارلامانى ىسكە قوسۋ تاپسىرىلدى.

ايجان سەرىكجان قىزى

اۆتور