الداعى 4-5 جىلدا سۋ شارۋاشىلىعى سالاسىنا 2 مىڭداي مامان قاجەت
استانا. KAZINFORM - قازاقستاندا سۋ شارۋاشىلىعى سالاسىن كادرمەن قامتۋ ءىس-شاراسى قاي دەڭگەيدە ءجۇرىپ جاتىر؟ بۇل ساۋالعا سۋ رەسۋرستارى جانە يرريگاتسيا مينيسترلىگى عىلىم جانە يننوۆاتسيالار دەپارتامەنتىنىڭ ديرەكتورى ءلاززات ءجۇسىپوۆا جاۋاپ بەردى.
- بۇگىندە مينيسترلىككە ۆەدومستۆولىق باعىنىستى مەكەمەلەردە، ياعني سۋ قويمالارى، گيدروتەحنيكالىق قۇرىلىسجاي جانە باسسەيندىك ينسپەكسيا كاسىپورىندارىندا 10000-عا جۋىق مامان جۇمىس ىستەيدى. جاڭا قۇرىلىس نىساندارىنىڭ سالىنۋىنا بايلانىستى جانە سۋ شارۋاشىلىعى سالاسى جۇمىسشىلارىنىڭ جاس ەرەكشەلىگىنە جۇرگىزىلگەن تالداۋ ناتيجەسىندە الداعى 4-5 جىلدا سالاعا 2000-داي مامان قاجەت دەپ بولجانىپ وتىر. وسىعان بايلانىستى، مينيسترلىك تاراپىنان سۋ سالاسىنا ءبىلىمدى كادرمەن قامتاماسىز ەتۋ، سونىمەن قاتار سۋ شارۋاشىلىعى قىزمەتكەرلەرىنىڭ بىلىكتىلىگىن ارتتىرۋ مەن قايتا دايارلاۋ ماسەلەسى كۇن تارتىبىندە تۇر، - دەدى ءلاززات ءجۇسىپوۆا ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، ەۋروپالىق قايتا قۇرۋ جانە دامۋ بانكى قارجىلاندىراتىن سۋ شارۋاشىلىعى نىساندارىن رەكونسترۋكسيالاۋ جوبالارى اياسىندا 120 تۇراقتى جۇمىس ورنىن قۇرۋ جوسپارى بار.
- يسلام دامۋ بانكىنىڭ قولدانىستاعى جانە جاڭا نەسيەسى اياسىندا 260 تۇراقتى جۇمىس ورنى اشىلادى. حالىقارالىق قايتا قۇرۋ جانە دامۋ بانكى قارجىلاندىراتىن «سۋارۋ جانە درەناج جۇيەلەرىن جەتىلدىرۋ، 2-فازا» جوباسى اياسىندا 270 تۇراقتى جۇمىس ورنى اشىلادى. رەسپۋبليكالىق بيۋدجەتتەن بولىنگەن نىسانالى ترانسفەرت ەسەبىنەن تۇركىستان وبلىسىنداعى «بايدىبەك اتا» سۋ قويماسىن سالۋ جوباسى اياسىندا 70، ال «قاراقۋىس» سۋ قويماسىن سالۋ جوباسى اياسىندا 12 تۇراقتى جۇمىس ورنىمەن قامتىلادى. ودان بولەك، تۇركىستان وبلىسىنداعى ۋگام وزەنىندە كاسكادتى گيدروەلەكتروستانساسى سۋ قۇبىرىن سالۋ جوباسى اياسىندا كەمىندە 660 جۇمىس ورنىن (500 ۋاقىتشا، 160 تۇراقتى) قۇرۋ جوسپارلانىپ وتىر. بۇل ءوڭىردىڭ الەۋمەتتىك-ەكونوميكالىق دامۋىنا وڭ اسەر ەتەدى، - دەيدى مينيسترلىك وكىلى.
ايتا كەتەيىك، مينيسترلىكتىڭ مالىمەتىنشە، اۋىلدا جۇمىس ىستەيتىن سۋ سالاسى ماماندارىنا 7,8 ميلليون تەڭگەگە دەيىن جاردەماقى بەرىلەدى.
سونداي-اق بريفينگ بارىسىندا نەلىكتەن قازاقستان كورشى ەلدەرمەن سۋ ماسەلەسىن شەشە الماي وتىر دەگەن ماسەلە كوتەرىلدى.
اۆتور
داۋلەت ىزتىلەۋ
