الداعى 25 جىلدا ادامعا انتيبيوتيك اسەر ەتپەي قالۋى مۇمكىن

استانا. قازاقپارات -  الداعى 25 جىلدا ادامعا انتيبيوتيك اسەر ەتپەي قالۋى مۇمكىن. بۇل 39 ميلليون ادامنىڭ ولىمىنە سەبەپ بولادى دەگەن بولجام بار. ادامدار انتيوبيوتيكتى اۋرۋدان ايىعۋ ءۇشىن ىشەدى ارينە.

 ءبىراق زەرتتەۋلەر كورسەتىپ وتىرعانداي ونىڭ قاۋىپى دە كوپ. قازىردە انتيبيوتيكتىڭ ءتۇر-ءتۇرى بار. ونىڭ جىل سايىن 139 ميلليون دوزاسى تۇتىنىلادى. ءتىپتى كەيىنگى جىلدارى اسەرى كۇشتى تۇرلەرى، تانىمال پەنيتسيليننىڭ ورنىن الماستىرعان. الايدا وعان باكتەريالار ءۇيىر بولادى. ناتيجەسىندە ءدارىنىڭ اعزاداعى قاۋىپتى دەنەلەردى جويۋعا كۇشى جەتپەي قالادى. ءسويتىپ اۋرۋدىڭ بەتىن قايتاراتىن انتيبيوتيكتىڭ ءوزى ادامزاتقا قاۋىپتى سۋپەرۆيرۋستار مەن سۋپەرباكتەريالاردىڭ پايدا بولۋىنا اكەلەدى.

 2018 -جىلعى كورسەتكىش بويىنشا ادامزات تۇتىنعان انتيبيوتيكتەردىڭ جالپى كولەمى جىلىنا 6500 توننادان استى. بۇل ورتاشا ەسەپپەن، ءار مىڭ ادامنىڭ 18- ءى كۇن سايىن انتيبيوتيككە تاۋەلدى دەگەندى بىلدىرەدى. انتيبيوتيكتى رەتى كەلسە ىشپەگەن ءجون. دارىگەرلەر قولدانعان جاعدايدا از تۇتىنۋعا كەڭەس بەرەدى.

 كيەۆين يكۋتا، كاليفورنيا ۋنيۆەرسيتەتى كلينيكالىق مەديتسينا كافەدراسىنىڭ دوتسەنتى:

- ءبىز انتيبيوتيكتەردىڭ شەكتەن تىس جانە دۇرىس قولدانباۋىن ءجيى بايقايمىز. بۇل باكتەريالارعا قوسىمشا قىسىم ءتۇسىرىپ، ولاردىڭ ۋاقىت وتە كەلە انتيميكروبتىق پرەپاراتتارعا توزىمدىلىگىن ارتتىرادى. ەلدەر سۋپەرباكتەريامەن كۇرەسۋگە قاۋقارسىز كەلەشەكتە سۋپەر باكتەرياعا قارسى ءتيىمدى قۇرال تابىلماسا، ونىڭ ەكونوميكالىق جانە مەديتسينالىق سالدارى اۋىر بولۋى مۇمكىن. اسىرەسە ا ق ش، ۇلى بريتانيا جانە ەۋروپا ەلدەرىندە.

قاۋىپتىڭ باستى سەبەبىن جاھاندىق دامۋ ورتالىعىنىڭ ساراپشىلارى حالىقارالىق كومەك پەن زەرتتەۋ جۇمىستارىنىڭ ازايۋىمەن بايلانىستىرادى. ماسەلەن، لوندونداعى فلەمينگ قورى قارجىلاندىرۋدى قىسقارتپاق. بۇل قور، دامۋشى ەلدەردە انتيميكروبتىق پرەپاراتتارعا توزىمدىلىك ماسەلەسىمەن اينالىسىپ كەلەدى. ال ا ق ش 9 ميلليارد دوللاردى ۇنەمدەۋدى ۇيعاردى. حالىقارالىق دامۋ اگەنتتىگىنىڭ جابىلۋى دا ۇلكەن سوققى بولىپ وتىر. ويتكەنى USAID الەمدەگى بارلىق گۋمانيتارلىق كومەك پەن كوپتەگەن زەرتتەۋلەردىڭ جارتىسىنا جۋىعىن قامتاماسىز ەتىپ كەلدى.

 ەنتوني ساكدوننەلل، جاھاندىق دامۋ ورتالىعىنىڭ زەرتتەۋ جەتەكشىسى:

- ءبىز باكتەريالاردىڭ ءدارى-دارمەكتەرگە توزىمدىلىك دەڭگەيى ايتارلىقتاي وزگەرىسسىز قالادى دەپ بولجاعان ەدىك. الايدا ا ق ش، ۇلى بريتانيا، فرانسيا، گەرمانيا جانە باسقا ەلدەردىڭ كومەكتى كۇرت قىسقارتۋى جاعدايدى ودان سايىن ۋشىقتىرماق. ەگەر دەر كەزىندە شارالار قابىلدانباسا، بۇل ميلليونداعان ادامنىڭ ولىمىنە اكەلەدى.

 سۋپەرباكتەريالار سالدارىنان قايتىس بولاتىن ادامداردىڭ سانى قاتەرلى ىسىكتەن كوز جۇماتىنداردان اسىپ كەتۋى مۇمكىن. دۇنيەجۇزىلىك دەنساۋلىق ساقتاۋ ۇيىمى وسىلاي دەپ دابىل قاقتى. ايتسە دە، قازىر سۋپەرباكتەريامەن كۇرەستىڭ بىرنەشە جولى زەرتتەلىپ جاتىر. سولاردىڭ ءبىرى - باكتەريوفاگتار ارقىلى ەمدەۋ. جالپى بۇل باكتەريوفاگتىڭ ءوزى ۆيرۋس. ءبىراق ول باكتەريا سەكىلدى ميكرواعزالاردى ىدىراتادى. ياعني ۋدى ۋ قايتارادى. الايدا ونى مەديتسيناعا ەنگىزۋگە ءالى ەرتە، دەيدى ماماندار.