العاشقى مەديتسينالىق كومەكتىڭ جاڭا مودەلى: نە وزگەرىپ جاتىر
استانا. KAZINFORM - قازىرگى تاڭدا ەلىمىزدە 677 العاشقى مەديتسينالىق-سانيتاريالىق كومەك نىسانى جۇمىس ىستەيدى. ونىڭ 62 پايىزى قالادا، 38 پايىزى اۋىلدىق جەرلەردە ورنالاسقان. سوڭعى جىلدارى مەديتسينا سالاسىنداعى قىزمەتتىڭ ساپاسىن جوعارىلاتۋ ءۇشىن باسقارۋ جۇيەسىنە ءبىرقاتار زاماناۋي ءتاسىل ەنگىزىلدى. بۇل وزگەرىستەر تۋرالى «العاشقى مەديتسينالىق-سانيتارلىق كومەك جۇيەسىن جاڭعىرتۋ» تاقىرىبىندا وتكەن باسپا ءسوز كونفەرەنتسياسىندا دەنساۋلىق ساقتاۋ مينيسترلىگىنىڭ مامانى بايانداپ بەردى.
- سوڭعى جىلدارداعى نەگىزگى جەتىستىكتەردىڭ ءبىرى - نورماتيۆتىك بازانى جاڭارتۋ جانە العاشقى مەديتسينالىق كومەكتىڭ باسقارۋ جۇيەسىنە زاماناۋي تاسىلدەردى ەنگىزۋ. ەڭ الدىمەن، بۇل نورماتيۆتىك-قۇقىقتىق اكتىلەردى جەتىلدىرۋ. دەنساۋلىق ساقتاۋ مينيسترلىگى بيىل ءبىرقاتار ماڭىزدى قۇجاتتى، بۇيرىقتى جاڭارتۋ بويىنشا جۇيەلى جۇمىس ىستەپ جاتىر. بۇل قۇجاتتار مەديتسينالىق كومەكتىڭ ساپاسى مەن قولجەتىمدىلىگىن ارتتىرۋعا باعىتتالعان، - دەيدى «رەسپۋبليكالىق مەديتسينالىق-سانيتاريالىق العاشقى كومەك ورتالىعى» ش ج ق ر م ك ديرەكتورى ايگۇل قاسىموۆا.
ەندى دارىگەرلەردىڭ ناۋقاستى قابىلدايتىن ۋاقىتى 6 ساعاتقا دەيىن ۇزارماق.
- بۇعان دەيىن قابىلداۋ 4-5 ساعات بولسا، ەندى بۇل ۋاقىت 6 ساعاتقا دەيىن ۇزارتىلىپ وتىر. بۇل دارىگەرگە پاتسيەنتتى جان-جاقتى قاراپ، ءتيىمدى ەم تاعايىنداۋعا، ديناميكالىق باقىلاۋدى ساپالى جۇرگىزۋگە جانە جاڭا باعىتتاردى ىسكە اسىرۋعا مۇمكىندىك بەرەدى، - دەيدى مينيسترلىك وكىلى.
مەديتسينا ماماندارى بيىلدان باستاپ تەك اۋرۋدىڭ سالدارىمەن عانا ەمەس سەبەبىمەن دە الدىن الا كۇرەسۋگە دەن قويادى.
- العاشقى مەديتسينالىق كومەكتەگى ماڭىزدى باعىتتاردىڭ ءبىرى - اۋرۋلاردىڭ الدىن الۋ جانە ولاردى ەرتە انىقتاۋ. سونىمەن قاتار، ناۋقاستاردى ەمدەۋدىڭ باعىت-باعدارى قايتا قارالدى جانە مەديتسينالىق كومەك كورسەتۋ اكسەنتتەرى وزگەرتىلدى. مەدبيكەنىڭ پاتسيەنتتى جەكە قابىلداۋ جۇيەسى ەنگىزىلدى، ديناميكالىق باقىلاۋداعى پاتسيەنتتەردىڭ بەيىندى ماماندارعا وزدىگىنەن جازىلۋىنا مۇمكىندىك بەرىلدى، - دەيدى ايگۇل قاسىموۆا.
ەندى مەديتسينا قىزمەتكەرلەرىنىڭ جۇكتەمەسى ازايىپ، ىنتالاندىرۋ شارالارى كەڭەيتىلەدى.
- 278-بۇيرىق اياسىندا كاپيتاتيۆتىك نورماتيۆتىك تولەم مولشەرلەمەسى بويىنشا ىنتالاندىرۋ كومپونەنتىن ەسەپتەۋدىڭ جاڭا ادىستەمەسى ەنگىزىلدى. 49-ستاندارت جوباسىن ىسكە اسىرۋ باستالدى، وندا ۇيگە شاقىرتۋ بويىنشا كورسەتىلىمدەر وڭتايلاندىرىلدى. موبيلدى بريگادالاردىڭ ءرولى كەڭەيتىلىپ جاتىر، شۇعىل مەديتسينالىق كومەك كورسەتەتىن كابينەتتەر اشىلىپ، سونداي-اق كەيبىر وكىلەتتىكتەردى بەيىندى مامانداردان جالپى پراكتيكا دارىگەرلەرىنە، ال دارىگەرلەردەن مەدبيكەلەرگە بەرۋ بويىنشا جۇمىس ىستەلىپ جاتىر، - دەيدى سپيكەر.
ايتا كەتەيىك، بۇعان دەيىن كۇز بەن كوكتەم مەزگىلىندە ينسۋلت الۋ قاۋپى جوعارى ەكەنىن جازعان ەدىك.
