الپاۋىت Nvidia كومپانياسى ميللياردتاعان دوللار شىعىنعا باتۋى مۇمكىن
استانا. KAZINFORM - قىتايعا ەكسپورتقا قويىلعان شەكتەۋلەر Nvidia كومپانياسىنا ميللياردتاعان دوللار شىعىن اكەلمەك، دەپ جازدى BBC.
امەريكالىق ميكروچيپ ءوندىرۋشى Nvidia قىتايعا ەكسپورت ەرەجەلەرىنىڭ قاتاڭداۋىنا بايلانىستى 5,5 ميلليارد دوللار كولەمىندە شىعىنعا ۇشىرايتىنىن رەتتەۋشى ورگاندارعا حابارلادى.
جاڭا ەرەجەلەرگە سايكەس، جاساندى ينتەللەكت تەحنولوگياسىنىڭ باستاۋىندا تۇرعان جانە الەمدەگى ەڭ قىمبات كومپانيالاردىڭ ءبىرى سانالاتىن بۇل الپاۋىت ەندى قىتايعا كەڭىنەن تانىمال H20 چيپتەرىن ەكسپورتتاۋ ءۇشىن ارنايى ليتسەنزيا الۋى كەرەك.
وتكەن اپتادا ا ق ش بيلىگى چيپتەردىڭ سۋپەركومپيۋتەرلەردە پايدالانىلۋى مۇمكىن دەگەن الاڭداۋشىلىققا بايلانىستى ليتسەنزيا قاجەت ەكەنىن Nvidia-عا حابارلاعان. بۇل تۋرالى كومپانيا ا ق ش- تىڭ قور نارىعىن رەتتەۋ كوميسسياسىنا (SEC) مالىمدەدى. اتالعان تالاپ بەلگىسىز ۋاقىتقا دەيىن كۇشىندە بولماق.
Nvidia چيپتەرى بۇكىل الەم بويىنشا جاساندى ينتەللەكت جۇيەلەرىن وقىتۋدا كەڭىنەن قولدانىلادى. مىسالى، وسى چيپتەردىڭ كومەگىمەن قىتايدىڭ DeepSeek كومپانياسى جىل باسىندا ءوز جي مودەلىن وقىتىپ، ول ءوز كەزەگىندە Nvidia اكتسيالارىنىڭ كۇرت تومەندەۋىنە سەبەپ بولعان. Nvidia نىڭ نەگىزگى چيپتەرىنەن ايىرماشىلىعى، H20 ۇلگىلەرى ارنايى ەكسپورت ءۇشىن جاسالعان جانە ولاردىڭ ونىمدىلىگى باستاپقىدا-اق ەكسپورتتىق شەكتەۋلەرگە سايكەس ەتىپ تومەندەتىلگەن.
ەسكە سالا كەتەيىك، امەريكانىڭ ەنگىزگەن سالىعىنا جاۋاپ رەتىندە قىتاي 12-ساۋىردەن باستاپ ا ق ش تاۋارلارىنا سالىناتىن باج سالىعىن %84 دان %125عا دەيىن كوتەرەدى.
