الاياقتاردان زارداپ شەككەندەردىڭ 1,6 ميلليارد تەڭگەدەن استام نەسيەسى كەشىرىلدى
استانا. KAZINFORM - باس پروكۋرور بەرىك اسىلوۆ ءماجىلىس دەپۋتاتىنىڭ ساۋالىنا جولداعان جاۋاپتا الاياقتاردان زارداپ شەككەن جابىرلەنۋشىلەردىڭ 1,6 ميلليارد تەڭگەدەن استام بورىشى كەشىرىلگەنىن ءمالىم ەتتى.
- جابىرلەنۋشىلەردىڭ قۇقىقتارىن قورعاۋ ءۇشىن 2024-جىلعى ماۋسىمدا «بانكتەر جانە بانك قىزمەتى تۋرالى» زاڭعا قارجى ۇيىمدارىنا الاياقتىق ارەكەتتەردىڭ سەبەپتەرى مەن سالدارىن جويۋعا؛ تەرگەۋ كەزەڭىندە وسىنداي قارىزدار بويىنشا بەرەشەكتى ءوندىرىپ الۋعا جانە تالاپ-ارىز جۇمىستارىن توقتاتا تۇرۋعا؛ كليەنتتىڭ قاتىسۋىنسىز كرەديت الۋ كەزىندە كليەنتتىڭ قارىزىن ەسەپتەن شىعارۋعا، سونداي-اق كليەنتكە وسىنداي قارىز بويىنشا بۇرىن ۇستالعان (تولەنگەن) سومالاردى قايتارۋعا باعىتتالعان جانە ت. ب. تالاپتاردى ەنگىزۋدى كوزدەيتىن تۇزەتۋلەر قابىلداندى. بۇل مەحانيزم كيبەرالاياقتىقتان زارداپ شەككەن قارىز الۋشىلاردىڭ شوتتارىن بۇعاتتاۋعا مۇمكىندىك بەرمەيدى. وسىنىڭ ارقاسىندا 2,5 مىڭنان استام جابىرلەنۋشىدەن 3,4 ميلليارد تەڭگەدەن استام سوماعا كرەديتتى ءوندىرىپ الۋ توقتاتىلدى. جابىرلەنۋشىلەردىڭ 1,6 ميلليارد تەڭگەدەن استام سوماداعى قارىزدارى ەسەپتەن شىعارىلدى، - دەپ جازىلعان جاۋاپتا.
باس پروكۋروردىڭ مالىمەتىنشە، ۇلتتىق بانك جانىنان قۇرىلعان انتيفرود-ورتالىق ىسكە قوسىلعاننان بەرى 2,2 ميلليارد تەڭگەدەن استام سومانىڭ كۇدىكتى قارجى وپەراتسياسى بۇعاتتالعان.
- ازاماتتىق كودەكستىڭ 953-بابىنا سايكەس جابىرلەنۋشىلەردەن تۇسكەن 1,5 مىڭ تالاپ-ارىز نەگىزىندە «دروپپەرلەردەن» 2,4 ميلليارد تەڭگە ءوندىرىپ الىندى، - دەپ جازادى بەرىك اسىلوۆ.
ەسكە سالساق، ناۋرىز ايىندا الماتى وبلىسىندا 600 ميلليون تەڭگەگە الاياقتىق جاساعان دروپپەرلەر توبى ۇستالعان بولاتىن.
