الاياقتار راسىمدەگەن نەسيە قالاي ەسەپتەن شىعارىلادى
استانا. KAZINFORM – ق ر قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى ولجاس قيزاتوۆ الاياقتار راسىمدەگەن نەسيەلەردى ەسەپتەن شىعارۋ تەتىكتەرىن ءتۇسىندىردى.
قازىر قولدانىستاعى نورماعا سايكەس، الاياقتىق جولمەن راسىمدەلگەن نەسيەلەر تەك سوت شەشىمىمەن عانا ەسەپتەن شىعارىلادى. ال تۇتىنۋشىلار قۇقىعىن قورعاۋ تۋرالى جاڭا زاڭ اياسىندا وزگە ءتارتىپ ەنگىزۋ ۇسىنىلىپ وتىر.
- اتالعان زاڭ جوباسى اياسىندا ءبىز الاياقتىق نەسيەلەردى سوتقا دەيىن ەسەپتەن شىعارۋ تەتىگىن ەنگىزىپ وتىرمىز. ەگەر بانك نەمەسە ميكروقارجى ۇيىمى ازاماتتاردىڭ جەكەلەگەن ساناتتارى ءۇشىن وسى زاڭ جوباسى اياسىندا ەنگىزىلگەن 24 ساعاتتىق كۇتۋ كەزەڭىندە ولاردىڭ مىندەتتى قاتىسۋى تالاپ ەتىلەتىن نورمانى بۇزسا نەمەسە نەسيە الۋ ءۇشىن قوسىمشا كەلىسىم الۋ تالابىن ورىنداماسا، بۇل جاعدايلاردى اكىمشىلەندىرۋ جانە دالەلدەۋ وڭاي. مۇنداي جاعدايدا بانكتەر مەن ميكروقارجى ۇيىمدارى بۇل نەسيەلەردى سوتقا دەيىنگى تارتىپپەن مىندەتتى تۇردە ەسەپتەن شىعارۋى كەرەك، - دەپ ءتۇسىندىردى و. قيزاتوۆ سەناتتا وتكەن بريفينگتە.
سونىمەن بىرگە، و. قيزاتوۆ الاياقتار راسىمدەگەن نەسيەنى تولەپ جاتقاندارعا نەمەسە تولەمدى اياقتاعاندارعا قاراجات قايتارىلمايتىنىن ايتتى.
ايتا كەتەيىك، بۇگىن سەنات تۇتىنۋشىلار قۇقىعىن قورعاۋ زاڭىنا 24 تۇزەتۋ ەنگىزىپ، ماجىلىسكە كەرى قايتاردى.
سونداي-اق، قازاقستان اۋماعىندا فيليالىن اشقىسى كەلگەن شەتەلدىك بانكتەر اكتيۆىنە قويىلاتىن تالاپ 10 ميلليارد دوللارعا دەيىن تومەندەتىلدى.
