الاياقتار ق ر پرەمەر-ءمينيسترىنىڭ اتىنان جالعان مالىمدەمە تاراتۋدا

الەۋمەتتىك جەلىلەردە ق ر پرەمەر-ءمينيسترى ءاليحان سمايىلوۆ ينتەرنەت-الاياقتاردىڭ ارەكەتىنەن زارداپ شەككەندەرگە وتەماقى تولەنەتىنى تۋرالى ايتقان ۆيدەو تاراپ جاتىر. stopfake.kz مالىمەتىنشە - بۇل فەيك، دەپ حابارلايدى kazinform.

«ۆيدەودا قازاقستاندا «ۇرلانعان قاراجاتتى قايتارۋ جانە وتەۋ جونىندەگى» كوميتەت قۇرىلعانى ايتىلادى. بۇل - جالعان. ەلىمىزدە مۇنداي كوميتەت جوق جانە بولعان ەمەس. الاياقتار اتالعان جارنامانى الدانعان ادامدارعا كومەكتەسەمىز دەپ تاراتىپ جاتىر. الايدا كەيىن اقشانى «قايتارۋ» قىزمەتتەرى تۋرالى جازىلعان سايتقا ءوتۋدى ۇسىنادى. ناتيجەسىندە، الاقول ينۆەستورلار يەمدەنگەن اقشانى قايتارۋ ءۇشىن تاعى دا اقشا تولەۋ كەرەك بولادى.

وسىلايشا الاياقتارعا ءبىر كەزدەرى الدانعان ادامدار تاعى دا قۇرىققا تۇسەدى»، - دەلىنگەن مالىمەتتە.

مۇنداي حابارلاندىرۋلار قازاقستاندا جانە رەسەيدە بۇعان دەيىن دە تاراعانى انىقتالدى. ول كەزدە قارجى پيراميدالارىنان زارداپ شەككەن ازاماتتارعا وتەماقى تولەۋ تۋرالى ايتىلعان.

«ەستەرىڭىزگە سالا كەتەيىك، اقشادان ايىرىلىپ، كيبەرقىلمىسكەرلەردىڭ قۇرىعىنا تۇسپەۋ ءۇشىن كۇماندى سىلتەمەلەر بويىنشا وتپەڭىز جانە ءۇشىنشى تاراپ رەسۋرستارىندا جەكە جانە بانكتىك دەرەكتەردى جازىپ، قالدىرماڭىز. تەك رەسمي جانە سەنىمدى اقپارات كوزدەرىنە سەنۋ قاجەت»، - دەپ تۇيىندەيدى stopfake.kz.