الاياقتار ەندى مەديتسينا مەكەمەلەرىنىڭ اتىن جامىلىپ ارەكەت ەتە باستادى

استانا. KAZINFORM - دەنساۋلىق ساقتاۋ مينيسترلىگى ازاماتتاردى سكرينينگتىك تەكسەرۋگە شاقىرۋعا قاتىستى الاياقتىق ارەكەتتەر تۋرالى ەسكەرتتى.

- الاياقتار مەديتسينالىق ۇيىمداردىڭ اتىنان قوڭىراۋ شالىپ، سكرينينگكە جازىلۋدى راستاۋدى سۇراپ، SMS ارقىلى كەلگەن كودتى ايتۋىڭىزدى تالاپ ەتەدى. مەملەكەتتىك مەديتسينالىق مەكەمەلەر ەشقاشان سكرينينگكە جازىلۋدى SMS ارقىلى كەلگەن كودپەن راستاۋدى تالاپ ەتپەيدى. مۇنداي كود، ادەتتە، سيفرلىق سەرۆيستەرگە كىرۋ نەمەسە بەلگىلى ءبىر وپەراتسيالاردى راستاۋ ءۇشىن قولدانىلادى جانە ولاردى ءۇشىنشى تۇلعاعا ەشقانداي جاعدايدا بەرۋگە بولمايدى، - دەپ ەسكەرتەدى ۆەدومستۆو.

وسى ورايدا مينيسترلىك الاياقتار كود ارقىلى جەكە مالىمەتتەرگە، تسيفرلىق قۇجاتتارعا، سونىڭ ىشىندە eGov ،Kaspi بانك قوسىمشالارى جانە باسقا دا سەرۆيستەرگە قول جەتكىزۋى مۇمكىن ەكەنىن ايتىپ وتىر.

- ازاماتتاردى قىراعى بولۋعا شاقىرامىز. SMS ارقىلى كەلگەن كودتى ەشكىمگە، ونىڭ ىشىندە ءوزىن مەديتسينا قىزمەتكەرى رەتىندە تانىستىرعان ادامعا دا ايتپاڭىز. اقپاراتتى رەسمي دەرەككوزدەردەن، ياعني ەمحانادا، eGov پورتالىندا نەمەسە مەديتسينالىق اقپاراتتىق جۇيەلەر ارقىلى انىقتاڭىز. الاياقتىققا كۇماندانساڭىز، قۇقىق قورعاۋ ورگاندارىنا جۇگىنىڭىز، - دەلىنگەن حابارلامادا.

اي باسىندا بەلگىلى بولعانداي، ەلىمىزدە شۇعىل تۇردە كيبەر الاياقتىقپەن كۇرەستى كۇشەيتەتىن زاڭ جوباسىن ازىرلەۋ قولعا الىنادى.

ايتا كەتسەك، ءماجىلىس دەپۋتاتى رينات زايىتوۆ ونلاين الاياقتىقتان كەلگەن شىعىندى بانكتەر ءوزى وتەۋى تيىستىگىن ايتىپ، دەپۋتاتتىق ساۋال جولدادى.

اۆتور

داۋلەت ىزتىلەۋ