الاياقتار جىل باسىنان بەرى الماتىلىقتاردى 12 ميلليارد تەڭگەگە الداعان
الماتى. KAZINFORM - الماتى پوليتسياسىنىڭ باستىعى ارىستانعاني زاپپاروۆ قالالىق قوعامدىق كەڭەستە جىل باسىنان بەرى شاھاردا 6 مىڭنان استام الاياقتىق تىركەلگەنىن حابارلادى.
الاياقتاردىڭ ارەكەتتەرىنەن قالا تۇرعىندارىنا 12 ميلليارد تەڭگەدەن استام شىعىن كەلتىرىلگەن.
«قابىلدانعان شارالار ينتەرنەت-الاياقتىقتى %14,5 عا تومەندەتۋگە مۇمكىندىك بەردى. زياتكەرلىك مەنشىك قۇقىقتارىن بۇزۋمەن بايلانىستى قىلمىستاردىڭ الدىن الۋ مەن كۇرەستى كۇشەيتۋگە باعىتتالعان جۇمىستار اتقارىلدى. جەدەل جاعدايدى تۇراقتاندىرۋ ماقساتىندا پوليتسەيلەر نەگىزگى كريتەرييلەر بويىنشا حالىقپەن جۇمىس جۇرگىزىپ جاتىر. بۇل، ەڭ الدىمەن، حالىقتىڭ قۇقىقتىق ساۋاتتىلىعى، باق دەڭگەيىندە قولجەتىمدى جانە تۇسىنىكتى اقپاراتتىق جۇمىس، كوشەلەردە، قوعامدىق ورىنداردا، الاياقتىقتىڭ تۇرلەرى مەن ادىستەرى تۋرالى جارنامالىق بۋكلەتتەر. سونداي-اق، الاياقتىقتىڭ جاڭا تۇرلەرى، ولاردىڭ جاسالۋ جولدارى جانە الدىن الۋ شارالارىنىڭ دەر كەزىندە قابىلدانۋى قاداعالانىپ جاتىر»، - دەدى ارىستانعاني زاپپاروۆ.
سپيكەردىڭ ايتۋىنشا، قالاداعى ساۋدا ورتالىقتارى مەن سۋپەرماركەتتەردە ينتەرنەت-الاياقتىقتىڭ الدىن الۋ بويىنشا پلاكاتتار ءىلىنىپ، قالانىڭ ورتالىق كوشەلەرىندەگى ەلەكتروندى بيلبوردتاردا ينتەرنەت-الاياقتىقتىڭ ادىستەرى مەن تۇرلەرى تۋرالى ەسكەرتپە بەينەروليكتەر كورسەتىلەدى.
ەسكە سالايىق، بۇعان دەيىن الاياقتىق سيپاتتاعى جارناماعا بايلانىستى قازاقستاندا Canva سەرۆيسى ۋاقىتشا بۇعاتتالعانىن جازعانبىز.
