الاياقتار اتىڭىزدان نەسيە راسىمدەسە، نە ىستەۋ كەرەك

تۇركىستان. KAZINFORM - بۇگىندە الاياقتاردىڭ اككى ارەكەتى ەل حالقىن الاڭداتىپ وتىر. ءتىپتى، تەلەفون ارقىلى نەسيە راسىمدەيتىنىن ەستىگەندەر تانىس ەمەس نومىردەن شالىنعان قوڭىراۋدى الۋعا دا قورقىپ قالعان جايى بار.

الاياقتار اتىڭىزدان نەسيە راسىمدەسە نە ىستەۋ كەرەك؟ ەندى سول جاعىنا توقتالايىق.

1. كرەديت الىنعان ۇيىمدى انىقتاڭىز.

الدىمەن قاي بانك نەمەسە ۇيىم ءسىزدىڭ اتىڭىزعا نەسيە راسىمدەگەنىن ءبىلىڭىز. بۇل ۇيىم ق ر قارجى نارىعىن رەتتەۋ جانە دامىتۋ اگەنتتىگىنىڭ باقىلاۋىندا ما - سونى تەكسەرىڭىز. مۇنى اگەنتتىكتىڭ سايتىنداعى «رۇقساتتار جانە حابارلامالار ءتىزىلىمى» بولىمىنەن كورۋگە بولادى.

2. پوليتسياعا جۇگىنىڭىز:

جاقىن جەردەگى قۇقىق قورعاۋ ورگاندارىنا بارىپ، رەسمي تۇردە شاعىم ءتۇسىرىڭىز. قولتاڭبا ساراپتاماسى جۇرگىزىلىپ، قۇجاتتاعى قول سىزگە تيەسىلى ەمەس ەكەنىن انىقتاۋعا كومەكتەسەدى.

3. كرەديت ۇيىمىنا ءوتىنىش جازۋ كەرەك:

الاياقتار قارىزدى قاي ۇيىمنان العانىن انىقتاپ، سول جەرگە جازباشا ءوتىنىش بەرىڭىز. بارلىق بىلگەن اقپاراتىڭىزدى كورسەتىپ، ىشكى تەكسەرۋ جۇرگىزۋدى تالاپ ەتىڭىز. ءوتىنىش مىندەتتى تۇردە تىركەلۋى ءتيىس. تىركەۋ ءنومىرى مەن ءوتىنىش قابىلدانعان كۇندى وزىڭىزدە قالاتىن كوشىرمەگە جازدىرىپ الىڭىز.

4. مىنا قۇجاتتاردى تالاپ ەتىڭىز:

كرەديتتىك ۇيىم نەمەسە بانك سىزگە شارتتىڭ، قوسىمشالاردىڭ، جەكە كۋالىك كوشىرمەسىنىڭ جانە اقشا اۋدارىلعان شوت تۋرالى مالىمەتتەردىڭ كوشىرمەسىن بەرۋى ءتيىس. سونىمەن قاتار، وسى شارتتى راسىمدەگەن قىزمەتكەر تۋرالى اقپاراتتى ناقتىلاڭىز. ەگەر ۇيىم قۇجاتتاردى بەرمەسە، قارجى نارىعىن رەتتەۋ جانە دامىتۋ اگەنتتىگىنە شاعىم تۇسىرە الاسىز.

5. بانكومات نەمەسە ونلاين نەسيە بولسا:

ەگەر نەسيە بانكومات ارقىلى الىنعان بولسا، وندا بەينەباقىلاۋ كامەرالارىنداعى جازبالار الۋشىنى انىقتاۋعا كومەكتەسەدى.

ەگەر ونلاين الىنعان بولسا، پوليتسيا IP- ادرەس ارقىلى كىم ەكەنىن انىقتاي الادى. الاياقتار تەك بەيتانىس ەمەس، كەيدە ءوز تانىستارىڭىز، دوستارىڭىز نەمەسە تۋىستارىڭىز دا بولۋى مۇمكىن. سوندىقتان قۇجاتتارىڭىزدى جانە بانك دەرەكتەرىڭىزدى ەشكىمگە بەرمەڭىز.

6. سوتقا جۇگىنۋ:

ەگەر كرەديت ۇيىمى بۇل ءىستىڭ الاياقتىق ەكەنىن مويىنداماسا، وندا ءوز تۇرعىلىقتى جەرىڭىز بويىنشا سوتقا بارىپ، مامىلەنى جارامسىز دەپ تانۋ جونىندە تالاپ ارىز بەرەسىز.

سوت ءسىزدىڭ پايداڭىزعا شەشىم شىعارسا، كرەديت ۇيىمى:

سىزدەن قارىز ءوندىرۋدى توقتاتادى؛

بەرەشەكتى ەسەپتەن شىعارادى؛

كرەديتتىك بيۋروعا بۇل اقپاراتتى ءسىزدىڭ كرەديت تاريحىڭىزدان ءوشىرۋ تۋرالى حات جولدايدى.

كرەديت ەسەبىن قايدان الۋعا بولادى؟

كرەديت ەسەبىن مىنا جەرلەردەن ونلاين الۋعا بولادى:

- كرەديت بيۋروسىنان

- ەلەكتروندى ۇكىمەت پورتالى (eGov.kz) ارقىلى.

جوعالعان جەكە كۋالىك ارقىلى الاياقتار ءسىزدىڭ اتىڭىزعا نەسيە راسىمدەپ جىبەرۋى مۇمكىن. سوندىقتان كرەديت تاريحىڭىزدى باقىلاۋ - ءوز قاۋىپسىزدىگىڭىز.

كرەديت ەسەبىن قانشالىقتى جيى تەكسەرۋ كەرەك؟

كەمىندە توقسانىنا ءبىر رەت (3 ايدا 1 رەت) تەكسەرىپ وتىرعان ءجون. جىلىنا 1 رەت كرەديت ەسەبىن تەگىن الۋعا قۇقىعىڭىز بار.

كرەديت الۋ كەزىندە بانك نەىستەيدى؟

بانك ءسىزدىڭ كرەديت ەسەبىڭىزدى تەك رۇقساتىڭىزبەن عانا سۇراتا الادى. ءبىراق بانك سىزگە كرەديت بەرەدى مە، جوق پا - بۇل شەشىمدى ءوزى قابىلدايدى. كرەديتتىك بيۋرو بۇل شەشىمگە ارالاسپايدى.

كرەديت تاريحى قانشا ۋاقىت ساقتالادى؟

سوڭعى جاڭارتىلعان كۇننەن باستاپ كرەديت تاريحى كەمىندە 10 جىل ساقتالادى.

كرەديتتىك ەسەپ - قۇپيا قۇجات. بۇل ەسەپ تەك سىزگە ارنالعان. ءۇشىنشى ادامدارعا ونى بەرۋگە نەمەسە جاريالاۋعا بولمايدى.

قارجى الاياقتارىنان قالاي ساقتانۋعا بولادى؟

جەكە دەرەكتەرىڭىزدى ەشكىمگە بەرمەڭىز

بەيتانىس ادامدارعا جەكە كۋالىك، جسن نەمەسە باسقا دا جەكە دەرەكتەرىڭىزدى ايتپاڭىز. قۇجاتتارىڭىزدىڭ كوشىرمەسىن الەۋمەتتىك جەلى ارقىلى جىبەرمەڭىز، ءتىپتى فوتو نەمەسە سكانەرلەنگەن ءتۇرىن دە.

بانكتىك كارتا تۋرالى اقپاراتتى قۇپيا ۇستاڭىز

كارتا ءنومىرى، جارامدىلىق مەرزىمى، ەكىنشى بەتىندەگى CVC/CVV- كود سياقتى دەرەكتەردى ەشكىمگە ايتپاڭىز. بۇل اقپاراتتى الەۋمەتتىك جەلىدە دە جاريالاماڭىز.

تەلەفون قوڭىراۋلارىنا ساق بولىڭىز

الاياقتار ءسىزدىڭ داۋىسىڭىزدى جازىپ الۋى مۇمكىن، سوندىقتان «ءيا» دەپ جاۋاپ بەرمەي، اباي بولىڭىز. ولار ءسىزدىڭ داۋىسىڭىزدى پايدالانىپ، اتىڭىزعا نەسيە راسىمدەۋى مۇمكىن.

تەك قاۋىپسىز سايتتارعا عانا تىركەلىڭىز

كۇماندى سايتتار مەن پاراقشالارعا سەنبەڭىز.

ەگەر سايت نەمەسە الەۋمەتتىك جەلىدەگى پاراقشا سىزگە جالعان سياقتى كورىنسە، سول ۇيىممەن تىكەلەي حابارلاسىپ، ناقتىلاڭىز.

كۇدىكتى قوڭىراۋلارعا جاۋاپ بەرمەڭىز

ءوزىن بانك نەمەسە باسقا ۇيىم قىزمەتكەرى دەپ تانىستىرعان بەيتانىس ادامدارعا سەنبەڭىز. ولار سۇراعان اقپاراتتى ايتپاڭىز، اڭگىمەنى دەرەۋ توقتاتىڭىز.

قۇجاتتارعا قول قويماس بۇرىن مۇقيات وقىڭىز

ءاربىر تارماعىن قاراپ شىعىڭىز، دەرەكتەردىڭ دۇرىس جازىلعانىنا كوز جەتكىزىڭىز.

ايتا كەتەيىك، بۇدان بۇرىن نەسيەگە العان پاتەردى جالعا بەرۋ تالاپتارىن بۇزۋعا ءارى ايىپپۇل ارقالاۋعا تۇرتكى بولاتىنىن جازعان بولاتىنبىز.