الاياق 6-سىنىپ وقۋشىسىن الداپ، 2 ميلليون تەڭگە العان

شىمكەنتتە وقۋشىنى الداعان الاياق ۇستالدى، دەپ حابارلايدى turkystan.kz.

پوليتسيا دەپارتامەنتىنىڭ كيبەرپول قىزمەتكەرلەرى «Anti-fraud» ءىس-شاراسى اياسىندا ينتەرنەت-الاياقتىق جاساعان ەر ادامدى ۇستادى.

ول «Free Fire» موبيلدى ويىنىنىڭ جەتىلدىرىلگەن اككاۋنتىن ساتامىن دەپ وزگەنىڭ 2 ميلليون تەڭگەدەن استام قاراجاتىن يەمدەنگەن.

6-سىنىپ وقۋشىسى ۇسىنىسقا قىزىعىپ، كۇدىكتىنىڭ نۇسقاۋى بويىنشا اناسىنىڭ بانك كارتاسىن سۋرەتكە ءتۇسىرىپ، كارتا دەرەكتەرى مەن اۋدارىم جاساۋعا ارنالعان كودتى جولداعان.

شوتىندا اقشانىڭ جوعالعانىن بايقاعان اناسى پوليتسياعا جۇگىندى. جەدەل-ىزدەستىرۋ شارالارى بارىسىندا كۇدىكتى انىقتالىپ، ۇستالدى.

پوليتسيا اتا-انالارعا بالالارىنا ينتەرنەتتەگى قاۋىپسىزدىك ەرەجەلەرى تۋرالى ءجيى ەسكەرتىپ وتىرۋعا كەڭەس بەرەدى.