الاكولدەگى زاڭسىز قوقىس پوليگونى تۋريستەردى شوشىتتى

سەمەي. KAZINFORM - الاكولدەگى ءۇيىندى قوردالى ماسەلەگە اينالدى. جاعالاۋدان نەبارى 12 شاقىرىم جەردە ورنالاسقان قوقىس پوليگونى جەرگىلىكتى تۇرعىندار مەن دەمالۋشىلاردىڭ مازاسىن قاشىرىپ، ءجۇرىپ-تۇرۋىن قيىنداتقان.

دينارا سادىربايەۆا جىل سايىن جۇمىس بابىمەن الاكولگە ءجيى كەلەدى. سانيتارلىق تالاپتاردىڭ ساقتالماۋى مەن بەيبەرەكەت تاستالعان قوقىسقا كوزى ۇيرەنىپ كەتكەنىمەن بيىلعى جاعداي بۇرىنعىدان دا اۋىر.

ونىڭ ايتۋىنشا، پوليگوننان تاراعان يىستەن دەمالۋ مۇمكىن ەمەس. بىرنەشە رەت جۇك كولىكتەرىنىڭ لەك-لەگىمەن قوقىس توگىپ جاتقان ساتىنە دە كۋا بولعان.

— الاكولدەگى ءتۇرلى دەمالىس ورىندارىنىڭ قوقىسى تۇگەل وسى پوليگونعا توگىلەدى. سۇمدىق كورىنىس. ءشىرىپ جاتقان قوقىس بىرنەشە شاقىرىمعا سوزىلىپ جاتىر. پوليگونعا جاقىن ورنالاسقان ەلدى مەكەندەر ءۇشىن بۇل - وتە ۇلكەن پروبلەما. مۇنداي ەكولوگيالىق جاعدايدا ءومىر ءسۇرىپ جاتقان ادامداردىڭ دەنساۋلىعى نە بولماق؟ قاجەتتى شارالاردى شۇعىل قابىلداۋ كەرەك، - دەيدى تۋريست.

اباي وبلىسىنىڭ ەكولوگيا دەپارتامەنتى بۇل ماسەلەگە قاتىستى بىرنەشە رەت جەرگىلىكتى اتقارۋشى ورگانعا حات جولداپ، شارا قولدانۋىن سۇراعان.

الايدا ناتيجە جوق. قالدىقتار جايىلىپ، پوليگون كولەمى ءارى قاراي ۇلعايىپ جاتىر.

- 25 -شىلدەدە دەپارتامەنت قىزمەتكەرلەرى كولدىڭ جاعالاۋىندا رەيد جۇرگىزدى. كولدەن 12 ك م قاشىقتا ورنالاسقان جەر ۋچاسكەسىندە قاتتى تۇرمىستىق قالدىقتار زاڭسىز ساقتالعان. بۇل - ەكولوگيا كودەكسىنىڭ تالاپتارىنا قايشى. سونىمەن قاتار، دەپارتامەنت قىزمەتكەرلەرى الاكولدەگى كاسىپكەرلەرمەن كەزدەسۋ وتكىزدى. ولارعا قوقىستى الاكول اۋماعىندا جيناۋعا رۇقسات ەتىلمەيتىنى ءتۇسىندىرىلدى، - دەيدى مەكەمەدەن.

دەپارتامەنت مالىمەتىنشە، زاڭبۇزۋشىلىق انىقتالعان ساتتەن باستاپ جەرگىلىكتى اتقارۋشى ورگانعا بىرنەشە حات جولدانعان، الايدا وسى ۋاقىتقا دەيىن اكىمدىك كەمشىلىكتى جويۋ جونىندە ءتيىستى شارا قابىلداعان جوق.

— الاكول جاعالاۋىنداعى تۋريستىك ايماقتى دامىتۋ جول كارتاسىنا سايكەس، قاتتى تۇرمىستىق قالدىقتار پوليگونىنىڭ جوبالاۋ- سمەتالىق قۇجاتتاماسى دەپارتامەنتپەن كەلىسىلۋى ءتيىس ەدى. الايدا بۇگىنگى كۇنگە دەيىن مۇنداي قۇجات بىزگە كەلىپ تۇسكەن جوق، — دەلىنگەن حابارلامادا.

Kazinform ءتىلشىسى وسى ماسەلەگە قاتىستى ماقانشى اۋداندىق اكىمدىگىنە رەسمي ساۋال جولدادى.

ايتا كەتەيىك، وسىعان دەيىن مەملەكەت باسشىسىنىڭ تاپسىرماسى اياسىندا تۋريزم جانە سپورت ءمينيسترى ەربول مىرزابوسىنوۆ باستاعان ۇكىمەت دەلەگاتسياسى الاكولگە ارنايى بارىپ، جاعدايمەن تانىسقان بولاتىن. تەكسەرۋ ناتيجەسىندە ءبىرقاتار ناقتى تاپسىرما بەرىلىپ، جەرگىلىكتى اتقارۋشى ورگاندارعا كەمشىلىكتەردى جويۋ ءۇشىن ناقتى مەرزىم بەلگىلەنگەن.