الاكولدە 300 دەن استام زاڭبۇزۋشىلىق تىركەلىپ، پوليتسيا كۇشەيتىلگەن رەجيمگە كوشتى
سەمەي. KAZINFORM - الاكولدىڭ اباي وبلىسىنداعى جاعالاۋىندا پوليسيا كۇشەيتىلگەن جۇمىس رەجيمىنە كوشتى.
تۋريستىك ماۋسىم باستالعالى باستى كۇش قوعامدىق ءتارتىپتى ساقتاپ، سانيتارلىق قاۋىپسىزدىك پەن كوپشىلىكتىڭ جايلى دەمالىسىن قامتاماسىز ەتۋگە جۇمىلدىرىلعان بولاتىن.
پوليتسيا قىزمەتكەرلەرى سانيتارلىق- ەپيدەميولوگيالىق قىزمەت وكىلدەرىمەن بىرلەسىپ، تۇراقتى تۇردە رەيد جۇرگىزىپ كەلەدى. بۇل رەتتە باستى باسىمدىق - زاڭ بۇزۋ ارەكەتتەرىنىڭ الدىن الۋ، زاڭسىز ساۋدامەن كۇرەس جانە جاعالاۋدى لاستاۋ ارەكەتتەرىنىڭ جولىن كەسۋ بولدى.
- جاز ايى باستالعالى 300 دەن استام قۇقىقبۇزۋشىلىق تىركەلگەن. ولاردىڭ ەڭ كوبى، ياعني 141 جاعداي قوعامدىق ورىندى لاستاۋمەن بايلانىستى، - دەپ حابارلادى اباي وبلىسى پوليتسيا دەپارتامەنتىنىڭ باسپا ءسوز قىزمەتى.
سونىمەن قاتار تىيىم سالىنعان اۋماقتا مال جايۋدىڭ 74 جاعدايى، رۇقسات ەتىلمەگەن جەردە ساۋدا جاساۋدىڭ 22 فاكتىسى انىقتالدى، 15 جاعدايدا ايماقتى اباتتاندىرۋ ءتارتىبى بۇزىلعان. سونداي-اق ىشىمدىك ءىشىپ كولىك جۇرگىزگەن 13 جۇرگىزۋشى ۇستالسا، 7 ادام كولىكتى ەشقانداي قۇجاتتارسىز باسقارعان، جاياۋ جۇرگىنشىلەر 8 رەت ءتارتىپ بۇزعان.
- دەمالۋشىلارمەن قوعامدىق ءتارتىپتى ساقتاپ، قورشاعان ورتاعا قامقورلىق تانىتۋ تۋرالى ءتۇسىندىرۋ جۇمىستارى جۇرگىزىلىپ جاتىر، - دەپ قوستى ۆەدومستۆو وكىلدەرى.
پوليسيا ازاماتتاردى الاكولدىڭ ەرەكشە تابيعاتىن قالپىندا ساقتاپ، دەمالۋشىلاردىڭ قاۋىپسىزدىگىن قامتاماسىز ەتۋ ءۇشىن كوپشىلىك ورتادا ءوزىن دۇرىس ۇستاپ، تازالىق ساقتاۋعا شاقىرىپ وتىر.
وسىعان دەيىن الاكول جاعالاۋىنداعى كەمشىلىكتەر انىقتالىپ، ناقتى تاپسىرمالار بەرىلگەنى تۋرالى جازدىق.
