الاكول جاعالاۋىنداعى كەمشىلىكتەر انىقتالىپ، ناقتى تاپسىرمالار بەرىلدى
استانا. KAZINFORM - مەملەكەت باسشىسىنىڭ تاپسىرماسىن ورىنداۋ اياسىندا تۋريزم جانە سپورت ءمينيسترى ەربول مىرزابوسىنوۆ پرەمەر-ءمينيستردىڭ ورىنباسارى ەرمەك كوشەربايەۆ باستاعان ۇكىمەت دەلەگاتسياسى قۇرامىندا اباي جانە جەتىسۋ وبلىستارىنداعى الاكول كولىنىڭ كۋرورتتى وڭىرىنە باردى.
جۇمىس ساپارىنىڭ ماقساتى - ينفراقۇرىلىمنىڭ قازىرگى جاي- كۇيى مەن دەمالىس جاعدايىن باعالاۋ، سونداي-اق تۋريستىك سالانى دامىتۋ جونىندەگى تاپسىرمالاردىڭ ورىندالۋىن قاداعالاۋ. كولدىڭ ەكى جاعالاۋىنا دا تەكسەرىس جۇمىستارى جۇرگىزىلىپ، جەرگىلىكتى اتقارۋشى ورگاندار جانە بيزنەس وكىلدەرىمەن كەزدەسۋ ءوتتى.
تەكسەرۋ بارىسىندا ءبىرقاتار جۇيەلى ماسەلە انىقتالدى. اتاپ ايتقاندا، كەيبىر جاعاجايلاردا سانيتاريالىق- گيگيەنالىق توراپتار، دۋش كابينالارى، قوقىس جاشىكتەرى، ارنايى بەلگىلەر مەن قورشاۋلار جوق؛ سۋ كولىكتەرىنە باقىلاۋ جەتكىلىكسىز؛ قۇتقارۋ مۇنارالارى مەن اقپاراتتىق قۇرالدار تاپشى. قاۋىپسىزدىككە قويىلاتىن نەگىزگى تالاپتار ساقتالماي وتىر.
- تۋريستىك قىزمەتتەردىڭ ساپاسىن ارتتىرۋ - سالانى دامىتۋدىڭ باستى مىندەتتەرىنىڭ ءبىرى. تۋريستەر اعىنىنىڭ ارتۋىنا قاراماستان، ءبىرقاتار كۋرورتتى وڭىردە قىزمەت كورسەتۋ دەڭگەيى زامان تالاپتارىنا ساي كەلمەيدى. مينيسترلىك «تۋريستىك قىزمەت تۋرالى» زاڭعا مىندەتتى ستاندارتتار ەنگىزۋ، وكىلەتتىكتەردى كەڭەيتۋ جانە ينفراقۇرىلىمدى دامىتۋعا باعىتتالعان تۇزەتۋلەر ازىرلەۋدە. بۇل قاۋىپسىزدىك، جايلىلىق پەن جوعارى دەڭگەيدەگى قىزمەتتى جۇيەلى تۇردە قامتاماسىز ەتۋگە مۇمكىندىك بەرەدى. باستى ماقساتىمىز - وتاندىق تۋريستەردىڭ دەمالىسىن ساپالى ءارى قاۋىپسىز ەتۋ، - دەدى ەربول مىرزابوسىنوۆ.
تەكسەرۋ ناتيجەسى بويىنشا ءبىرقاتار ناقتى تاپسىرما بەرىلدى:
جاعاجاي اۋماعىنداعى سانيتاريالىق جابدىقتاۋدى كۇشەيتۋ؛
قوسىمشا قوقىس كونتەينەرلەرىن ساتىپ الۋ؛
ءقاۋىپسىز شومىلۋ ايماقتارىن ناقتى بەلگىلەپ، ارنايى بەلگىلەر جەلىسىن ۇزارتۋ؛
كيىم اۋىستىراتىن ورىندار، دۋش كابينالارى جانە باسقا دا اباتتاندىرۋ ەلەمەنتتەرىن ورناتۋ مۇمكىندىگىن قاراستىرۋ؛
بەلسەندى دەمالىس ايماقتارىن ۇيىمداستىرىپ، كولەڭكە تەنتتەر ورناتۋ؛
قۇتقارۋ مۇنارالارى مەن سۋعا ءقاۋىپسىز كىرۋگە ارنالعان باسپالداقتار سانىن كوبەيتۋ؛
جاعاجاي اۋماعىنا اقپاراتتىق ستەندتەر مەن سىزبالى كارتالار ورناتۋ.
انىقتالعان كەمشىلىكتەردى جويۋ بويىنشا جەرگىلىكتى اتقارۋشى ورگاندارعا ناقتى مەرزىم بەلگىلەندى. مينيسترلىك بۇل تاپسىرمالاردىڭ ورىندالۋىن قايتا تەكسەرۋدى جوسپارلاپ وتىر. تۋريستىك دەمالىستىڭ ساپاسى مەن قاۋىپسىزدىگى - ۇكىمەت پەن مينيسترلىكتىڭ ۇدايى باقىلاۋىندا.
