الاڭدا قولىما تۇسىرگەن فوتواپپارات وبەكتيۆىن 37 جىلدان سوڭ مۋزەيگە تاپسىردىم - التاي جانجىگىتوۆ

اقتوبەلىك التاي جانجىگىتوۆ 1986 -جىلى بەيبىت شەرۋگە شىعىپ، ءوز ويىن اشىق جەتكىزگەن جاستاردىڭ ءبىرى. ستۋدەنتتىك شاقتا بەلسەندى بولعان ول سول كەزدە ورتالىق الاڭدا فوتوعا ءتۇسىرىپ جۇرگەن ادامنىڭ فوتواپپاراتىن تارتىپ الىپ، وبەكتيۆىن بۇگىنگە دەيىن ساقتاعان. جەلتوقسان وقيعاسىنا قاتىسۋشى 37 جىل ساقتاعان دۇنيەسىن مۋزەيگە تاپسىردى، دەپ حابارلايدى Kazinform.

التاي جانجىگىتوۆ اقتوبە وبلىسىنىڭ تۋماسى. 1986 -جىلى الماتىداعى مال دارىگەرلىك ينستيتۋتىندا ءبىلىم العان. ءبىرىنشى كۋرس ستۋدەنتى 15-جەلتوقسان كۇنى وقۋ عيماراتىنان جاتاقحاناعا ورالادى. سول ساتتە الدىنان قازاق جىگىتتەرى شىعىپ، بەيبىت شەرۋ تۋرالى بىلەدى.

«ەرتەڭىنە ساعات 8-دە ساباققا بارۋىمىز كەرەك ەدى. 8-گە 15 مينۋت قالعاندا وقىتۋشىلارىمىز «ساباققا بارىڭدار» دەپ ەسىك قاقتى. ءبىز ەسىكتى اشپادىق. ءسويتىپ جۇرگەندە ءبىزدى مۇلدە شىعىرماي قويدى. امالىن تاپقاندار اپاتتى جاعدايعا ارنالعان ەسىك ارقىلى شىعىپ ۇلگەرگەن. ال ءبىز ەكىنشى قاباتتاعى اسحانا بالكونىنا الاشا بايلاپ، سىرتقا شىقتىق. الاڭعا بارساق، ادام از ەكەن. الدىمەن ءبىزدىڭ ينستيتۋتتىڭ بالالارى جەتكەن. كەيىن جانىمىزدا تۇرعان جاتاقحانا ستۋدەنتتەرى كەلدى. جينالا باستاعاندا ميليتسيا قىزمەتكەرلەرى: «قازاقتىڭ جىگىتتەرى، نەگە جينالىپ تۇرسىڭدار؟ زاڭ سولاي، تاراڭدار!» - دەپ ايتتى. ءبىز كەتپەدىك. جان-جاقتان ستۋدەنتتەر كەلىپ، الاڭ تولا باستادى. سول كەزدە ميليتسيا ىشكە كىرگىزبەۋ، الاڭعا جاقىنداتپاۋ ءۇشىن قورشاۋ جاسادى. كەلۋشىلەردىڭ الدىن كەس-كەستەدى. ادام كوپ، وعان قاراپ جاتقان ەشكىم جوق. بۇزىپ، جينالا بەردى. ءبىر كەزدە الاڭ تولدى. اركىم سويلەپ جاتىر. تۇسكە جاقىن «قاز پ ي-دىڭ قىزدارىن شىعارماي جاتىر ەكەن» دەگەن حابار كەلدى. سولاي قاراي بەتتەدىك. جولدا فوتوگرافتاردى كوردىك. ولار سۋرەتكە ءتۇسىرىپ تۇر ەكەن. ءبىز ولاردى قۋىپ جەتىپ، فوتواپپاراتىن تارتىپ الدىق. پلەنكاسىن تاستاپ، اعىزىپ جىبەردىك. سول تارتىپ العان فوتواپپاراتتىڭ وبەكتيۆىن 37 جىل ساقتاپ، مۋزەيگە تاپسىردىم»، - دەدى التاي جانجىگىتوۆ.

ونىڭ ايتۋىنشا، سول كەزدە فوتواپپاراتتى تارتىپ الماعاندا، كوپ جاستاردى قۋدالايتىن ايعاق زات رەتىندە قولدانىلار ەدى.

«ارادا 20 كۇن وتكەن سوڭ ينستيتۋتقا البوم الىپ كەلدى. باسشىلارىن شاقىرىپ، كىمدى تانيتاندارىن سۇرادى. كەشكىسىن جاتاقحانا كوممەندانتى كەلىپ تۇر. «مەن ءبىزدىڭ ستۋدەنتتەر جوق دەپ ايتتىم»، - دەدى. سول كەزدە كۋرستاسىم ەرلان بەيسەمبايەۆ فوتو ارقىلى سوتتالدى. پلاكات ۇستاپ تۇرعان فوتوسى تابىلعان ەكەن. كەيىن اقتالىپ شىقتى. سونىمەن بىرگە كلاستاسىم تالعات جۇبايەۆ فوتو ارقىلى قۋدالاۋعا ءتۇستى. وبەكتيۆتى تارتىپ العان سوڭ چەمودانىمدا جاتتى. سودان ۇيگە اكەلىپ، ساندىققا سالدىم»، - دەدى ول.

التاي جانجىگىتوۆ ءۇش كۇن الاڭدا بولعان. الاڭداعى تولقۋ، جاستاردىڭ اۋىزبىرشىلىگى ءبارى-ءبارى كوز الدىندا.

«مەنى ەشكىم ۇستاعان جوق. سول ءۇشىن دە جاتاقحانا كوممەندانتىنا العىس ايتامىن. ول فوتودان كورسە دە تانىمايمىن، مەنىڭ ستۋدەنتىم ەمەس دەپ امان قالدىم»، - دەدى جەلتوقسانشى.