الەم كوشباسشىلارىنان قازاقستانعا ىزگى تىلەك: توقايەۆقا قۇتتىقتاۋ جەدەلحاتتارى كەلدى

رەسەي پرەزيدەنتى ۆلاديمير پۋتين جەدەلحاتتا قازاقستاننىڭ ەكونوميكالىق جانە الەۋمەتتىك سالالاردا قول جەتكىزگەن تابىستارىنا توقتالىپ، ەلىمىزدىڭ حالىقارالىق قارىم-قاتىناستا سالماقتى ءارى سىندارلى ءرول اتقاراتىنىن، سونداي-اق الەمدە ابىروي-بەدەلى بيىك ەكەنىن اتاپ وتكەن.

— رەسەي مەن قازاقستان اراسىنداعى بايلانىستار ستراتەگيالىق سەرىكتەستىك پەن وداقتاستىق رۋحىندا جەمىستى ىلگەرىلەپ كەلەدى. بارلىق باعىتتاعى ءوزارا ءتيىمدى ىنتىماقتاستىعىمىزدى دوستاس حالىقتارىمىزدىڭ يگىلىگى ءۇشىن، سونداي-اق ەۋرازيا كەڭىستىگىندەگى قاۋىپسىزدىك پەن تۇراقتىلىقتى نىعايتۋ جولىندا دايەكتى تۇردە تەرەڭدەتە بەرەمىز دەپ سەنەمىن، — دەپ جازدى ۆلاديمير پۋتين.

قىتاي حالىق رەسپۋبليكاسىنىڭ ءتوراعاسى شي جينپيڭ قازاقستاندا اۋقىمدى ساياسي رەفورمالار ىسكە اسىرىلعانىن اتاپ ءوتىپ، قوعامدىق تۇراقتىلىقتى قامتاماسىز ەتۋ، ەكونوميكالىق ءوسىمنىڭ ورنىقتىلىعىن ساقتاۋ، حالىقتىڭ ءال-اۋقاتىن كوتەرۋ، ەلدىڭ وڭىرلىك جانە حالىقارالىق پوزيتسياسىن نىعايتۋ باعىتىندا قارقىندى جۇمىس جۇرگىزىلىپ جاتقانىنا نازار اۋدارعان.

— قازاق- قىتاي قارىم- قاتىناسىن ىلگەرىلەتۋگە ەرەكشە ءمان بەرەمىن. ەكىجاقتى ىنتىماقتاستىقتى ودان ءارى تەرەڭدەتۋ ماقساتىندا بىرلەسە كۇش جۇمىلدىرۋعا، سونداي- اق حالىقتارىمىزدىڭ يگىلىگى ءۇشىن ىقپالداستىق مازمۇنىن بايىتۋعا ءازىرمىن، — دەدى شي جينپيڭ.

بۇعان دەيىن مەملەكەت باسشىسىنىڭ اتىنا قۇتتىقتاۋ حاتىن ا ق ش پرەزيدەنتى دونالد ترامپ تا جولداعان بولاتىن.

— مەملەكەتتەرىمىز اراسىنداعى كەڭەيتىلگەن ستراتەگيالىق سەرىكتەستىكتى جوعارى باعالايمىن جانە مەن پرەزيدەنتتىك لاۋازىمدى اتقارعان ەكى مەرزىمدە قالىپتاسقان بەرىك بايلانىستى ودان ءارى نىعايتامىز دەپ سەنەمىن. وسى قۋانىشتى ءساتتى سىزدەرمەن ءبولىسۋ — مەن ءۇشىن زور مارتەبە، — دەپ جازعان دونالد ترامپ.

وزبەكستان پرەزيدەنتى شاۆكات ميرزيەۆ كەيىنگى جىلدارى ەكى ەل باسشىلارىنىڭ بىرلەسكەن ەرىك- جىگەرىنىڭ ارقاسىندا قازاقستان مەن وزبەكستان اراسىندا ورناعان ستراتەگيالىق سەرىكتەستىككە جانە وداقتاستىق قارىم- قاتىناسقا كوڭىلى تولاتىنىن جەتكىزگەن. بۇل تاتۋ كورشىلىك پەن تىعىز دوستىق قاعيداتتارىنا نەگىزدەلگەن بايلانىستارىمىزدىڭ سونى سيپاتقا يە بولعانىن كورسەتەدى.

قىرعىزستان پرەزيدەنتى سادىر جاپاروۆ 1990 -جىلى 25 -قازاندا مەملەكەتتىك ەگەمەندىك تۋرالى دەكلاراتسيانىڭ قابىلدانۋى قازاقستاننىڭ تاۋەلسىزدىگىنە جول اشقانىن، سونداي- اق ەلدىڭ تاريحي مۇراعا ادالدىعىن جانە حالىقتىڭ دەربەس ەل بولاشاعىنىڭ ىرگەسىن قالاۋ جونىندە باتىل شەشىم قابىلداعانىن پاش ەتكەنىن اتاپ وتكەن.

تاجىكستان پرەزيدەنتى ەمومالي راحمون قازاقستانمەن اراداعى تاريحي ءداستۇردى، ءوزارا قۇرمەتتى جانە سەنىمدى ارقاۋ ەتكەن دوستىق قارىم- قاتىناس پەن ىنتىماقتاستىقتى جوعارى باعالايتىنىن جازعان.

تۇرىكمەنستان پرەزيدەنتى سەردار بەردىمۇحامەدوۆ قۇتتىقتاۋىندا قازاقستان ەگەمەندىك جىلدارىندا مەملەكەتتىلىكتى نىعايتۋدا، حالىقتىڭ ءال-اۋقاتىن جاقسارتۋدا جانە ەلدىڭ حالىقارالىق ارەناداعى بەدەلىن ارتتىرۋدا ايتارلىقتاي تابىسقا جەتكەنىنە نازار اۋدارعان.

تۇركيا پرەزيدەنتى رەجەپ تايپ ەردوعان تاريحي جانە مادەني تامىرى بىتە قايناسقان ەكى ەلدىڭ ەرەكشە قارىم-قاتىناسى قوس حالىقتىڭ يگىلىگى ءۇشىن كەڭەيتىلگەن ستراتەگيالىق سەرىكتەستىك رۋحىندا تەرەڭدەي بەرەتىنىنە سەنىم بىلدىرگەن.

— بيىل 14- مامىردا استانادا وتكەن قازاقستان مەن تۇركيانىڭ جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ التىنشى وتىرىسى، سونداي- اق تۇركىستاندا ۇيىمداستىرىلعان تۇركى مەملەكەتتەرى ۇيىمىنىڭ بەيرەسمي سامميتى ستراتەگيالىق سەرىكتەستىگىمىزدىڭ بەرىكتىگىن ايقىن كورسەتتى، — دەدى رەجەپ تاييپ ەردوعان.

ازەربايجان پرەزيدەنتى يلحام اليەۆ ازەربايجان حالقى باۋىرلاس ەل رەتىندە قازاقستاننىڭ ەلەۋلى تابىستارىنا رياسىز قۋاناتىنىن جازدى.

— ءوزارا تۇراقتى ساپارلارىمىز، كەزدەسۋلەرىمىز بەن جوعارى دەڭگەيدەگى بەلسەندى ديالوگ ەكىجاقتى قارىم- قاتىناستاردى اناعۇرلىم قارقىندى دامىتىپ، ستراتەگيالىق سەرىكتەستىكتى، سونداي- اق وداقتاستىقتى نىعايتۋ جانە ونى جاڭا مازمۇنمەن بايىتۋ ىسىندە ماڭىزدى ءرول اتقارادى. ءسىزدىڭ جۋىردا اوسشك جەتىنشى سامميتىنە قاتىسۋ ءۇشىن ازەربايجانعا ساپارمەن كەلگەنىڭىزدى جوعارى باعالايمىن، — دەدى يلحام اليەۆ.

فرانسيا پرەزيدەنتى ەممانيۋەل ماكرون جەدەلحاتتا ىزگى تىلەگى مەن ىقىلاسىن ءبىلدىردى.

— قازاقستان جۇرتشىلىعىنا فرانسۋز حالقىنىڭ شىنايى دوستىق نيەتىن جەتكىزۋىڭىزدى وتىنەمىن. ديپلوماتيالىق بايلانىستاردىڭ 35 جىلدىعى اياسىندا جانە قازاقستان تاۋەلسىزدىك العان ساتتەن بەرى ەلدەرىمىز ەكىجاقتى ىنتىماقتاستىقتى دايەكتى تۇردە نىعايتىپ، بەيبىت، وركەندەگەن جانە ورنىقتى الەم قۇرۋ جولىندا ءوزارا كۇش- جىگەر بىرىكتىرىپ كەلە جاتقانىن، كوپتەگەن حالىقارالىق ماسەلە بويىنشا ۇستانىمدارى ۇقساس ەكەنىن اتاپ وتكىم كەلەدى، — دەلىنگەن جەدەلحاتتا.

ۇلى بريتانيا جانە سولتۇستىك يرلانديا بىرىككەن كورولدىگىنىڭ كورولى 3-چارلز قاسىم-جومارت توقايەۆقا جانە قازاقستان ازاماتتارىنا جىلى لەبىزىن جولدادى. كورول 3 چارلز ەكى ەل اراسىنداعى بەرىك دوستىققا جوعارى باعا بەرىپ، ەكىجاقتى بايلانىستاردىڭ بەكي تۇسكەنىن جانە الداعى جىلدارى ءوزارا ءتيىمدى ىنتىماقتاستىق اياسىن ودان ءارى كەڭەيتۋگە بەيىل ەكەنىن راستاعان.

كورەيا پرەزيدەنتى لي چيجە مڭ قازاقستان مەملەكەتتىلىكتىڭ باي داستۇرىنە، قوعامداعى تۇراقتىلىققا جانە ۇلتتىق بىرلىككە ارقا سۇيەي وتىرىپ، جاسامپازدىق پەن جارقىن كەلەشەك جولىندا نىق قادام باسا بەرەتىنىنە سەنىم ءبىلدىردى.

— بيىل قىركۇيەك ايىندا سەۋلگە جاساعان مەملەكەتتىك ساپارىڭىزدىڭ قورىتىندىسى بويىنشا قازاقستان مەن كورەيا رەسپۋبليكالارى اراسىندا بولاشاققا باعدارلانعان جان- جاقتى ستراتەگيالىق سەرىكتەستىك قارىم- قاتىناس ورناعانىن ايرىقشا اتاپ وتكىم كەلەدى، — دەلىنگەن جەدەلحاتتا.

سونداي-اق قۇتتىقتاۋ لەبىزدەرىن گەرمانيا پرەزيدەنتى فرانك-ۆالتەر شتاينمايەر، يتاليا پرەزيدەنتى سەردجو ماتتارەللا، اۋستريا پرەزيدەنتى الەكساندر ۆان دەر بەللەن، شۆەيتساريا پرەزيدەنتى گي پارمەلان، بەلارۋس پرەزيدەنتى الەكساندر لۋكاشەنكو، ارمەنيا پرەمەر- ءمينيسترى نيكول پاشينيان، ب ا ءا پرەزيدەنتى، شەيح مۇحاممەد بەن زايد ءال ناھايان، ب ا ءا ۆيتسە-پرەزيدەنتى، پرەمەر- ءمينيسترى، دۋباي ءامىرشىسى، شەيح مۇحاممەد بەن راشيد ءال ماكتۋم، ب ا ءا ۆيتسە-پرەزيدەنتى، پرەمەر-ءمينيستردىڭ ورىنباسارى، پرەزيدەنت اكىمشىلىگىنىڭ جەتەكشىسى، شەيح مانسۇر بەن زايد ءال ناھايان، ومان سۇلتانى حايسام بەن تاريق، قوس كيەنىڭ ساقشىسى، ساۋد ارابياسىنىڭ كورولى سالمان بەن ابدەلازيز ءال ساۋد، ساۋد ارابياسىنىڭ تاق مۇراگەرى، پرەمەر-ءمينيسترى مۇحاممەد بەن سالمان بەن ابدەلازيز ءال ساۋد، بەلگيالىقتار كورولى فيليپپ، يسپانيا كورولى 4 فەليپە، شۆەتسيا كورولى XVI كارل گۋستاۆ، موناكو كنيازى 2 البەر، باحرەين كورولى حاماد بەن يسا ءال حاليفا، جاپونيا يمپەراتورى نارۋحيتو، تايلاند كورولى ماحا ۆاچيرالونگكورن، ريم پاپاسى XIV لەو، سەربيا پرەزيدەنتىنىڭ مىندەتىن اتقارۋشى انا برنابيچ، يران پرەزيدەنتى ماسۋد پەزەشكيان، پاكىستان پرەزيدەنتى اسيف الي زارداري، پاكىستان پرەمەر-ءمينيسترى شاحباز شاريف، پالەستينا پرەزيدەنتى ماحمۇد ابباس، يندونەزيا پرەزيدەنتى پرابوۆو سۋبيانتو، ميانما پرەزيدەنتى مين اۋن حلاين، سينگاپۋر پرەزيدەنتى تارمان شانمۋگاراتنام، ۆەتنام پرەزيدەنتى تو لام، لاوس پرەزيدەنتى تحونگلۋن سيسۋليت، چەحيا پرەزيدەنتى پەتر پاۆەل، رۋمىنيا پرەزيدەنتى نيكۋشور دان، سلوۆەنيا پرەزيدەنتى ناتاشا پيرتس-مۋسار، ليتۆا پرەزيدەنتى گيتاناس ناۋسەدا، مالتا پرەزيدەنتى ميريام سپيتەري دەبونو، بولگاريا پرەزيدەنتى يليانا يوتوۆا، ەفيوپيا پرەزيدەنتى تايە اسكە-سەلاسسيە، نيكاراگۋا تەڭ پرەزيدەنتتەرى دانيەل ورتەگا مەن روساريو مۋريلو، ب ۇ ۇ باس حاتشىسى انتونيۋ گۋتەرريش، ەۋروپالىق كەڭەس ءتوراعاسى انتونيۋ كوشتا، يۋنەسكو باس ديرەكتورى حالەد ءال-اناني، ت م د باس حاتشىسى سەرگەي لەبەديەۆ جانە باسقا دا رەسمي تۇلعالار جولدادى.

قۇتتىقتاۋ جەدەلحاتتارى ءالى دە كەلىپ ءتۇسىپ جاتىر.

بۇعان دەيىن پرەزيدەنت قاسىم- جومارت توقايەۆ مەملەكەتتىك تۋ كوتەرۋ راسىمىنە قاتىسقانىن جازدىق.