پاۆەل دۋروۆقا 12 ءتۇرلى ايىپ تاعىلدى

پاريج. KAZINFORM - فرانسيا پروكۋراتۋراسى Telegram نەگىزىن قالاۋشى پاۆەل دۋروۆتىڭ وتكەن سەنبىدە پاريجدە ۇستالۋىنا بايلانىستى باسپا ءسوز مالىمدەمەسىن تاراتتى. وندا دۋروۆ ءبىرقاتار قىلمىس جاسادى دەگەن كۇدىككە ىلىنگەنى جانە تەرگەۋ اياسىندا جاۋاپ الىنىپ جاتقانى ايتىلعان. بۇل تۋرالى BBC جازدى.

پاريج پروكۋراتۋراسى پاۆەل دۋروۆقا تاعىلۋى مۇمكىن 12 ايىپتى ءتىزىپ ايتقان، ونىڭ ىشىندە قۇزىرلى ورگاندارعا اقپارات بەرۋدەن باس تارتۋ، الاياقتىق پەن ەسىرتكى ساتۋعا قاتىسىنىڭ بولۋى، بالالاردىڭ پورنوگرافيالىق ۆيدەولارىن ساقتاۋعا، كيبەرقىلمىستارعا، اقشا جىلىستاتۋعا قاتىسۋى جانە ت. ب. بار.

پروكۋراتۋرا 8-شىلدەدە اشىلعان ءىستى كيبەرقىلمىسپەن كۇرەس ورتالىعى مەن ۇلتتىق الاياقتىقپەن كۇرەس باسقارماسى (ONAF) تەرگەپ جاتقانىن ايتتى.

دۋروۆتى قاماۋ مەرزىمى 28-تامىزدا اياقتالادى.

- ۇستاۋ مەرزىمىن تەرگەۋ سۋدياسى 25-تامىزدا ۇزارتتى جانە ۇيىمداسقان قىلمىسقا قاتىستى قىلمىستارعا قولدانىلاتىن ءتارتىپتى ەسكەرە وتىرىپ، 96 ساعاتقا دەيىن (ياعني 28-تامىزعا دەيىن) سوزىلۋى مۇمكىن، - دەلىنگەن حابارلامادا.

دۇيسەنبى كۇنى فرانسيا پرەزيدەنتى ەممانۋەل ماكرون دۋروۆتىڭ ۇستالۋى «ساياسي شەشىم» ەمەس دەپ مالىمدەدى.

- مەن پاۆەل دۋروۆ قاماۋعا الىنعاننان كەيىن فرانسيا تۋرالى جالعان اقپاراتتى وقىپ جاتىرمىن. فرانسيا ءسوز جانە كوممۋنيكاتسيا بوستاندىعىنا، يننوۆاتسيا مەن كاسىپكەرلىككە بۇرىنعىدان دا كوبىرەك ەركىندىك بەرگەن. سولاي بولىپ قالا بەرەدى، - دەپ جازدى ماكرون X الەۋمەتتىك جەلىسىندە.

بۇل - فرانسۋز بيلىگىنىڭ سەنبىدەن بەرگى العاشقى رەسمي تۇسىنىكتەمەسى بولدى.

دۋروۆتىڭ فرانسيادا لە-بۋرجە اۋەجايىندا ۇستالعانى 25-تامىزدا بەلگىلى بولدى. دۋروۆ سەنبى كۇنى باكۋدەن فرانسياعا جەكە ۇشاقپەن ۇشىپ كەلگەن.

پروكۋراتۋرانىڭ مالىمەتىنشە، بۇل وقيعا كەشكى ساعات 8-دە بولعان.

اۆتور
جاراسقان نۇرىبايەۆ