پاۆەل دۋروۆ ارتىندا قالاتىن مۇراسىن 100 دەن استام بالاسىنا تەڭ ءبولىپ بەرمەكشى
استانا. قازاقپارات - 40 جاستاعى پاۆەل دۋروۆ وزىنەن كەيىن التى رەسمي بالاسى مەن دونورلىق ۇرىق ارقىلى دۇنيەگە كەلگەن قالعان بالالارى مۇرا ءۇشىن ءبىر-بىرىمەن جاۋلاسقانىن قالامايدى. سول ءۇشىن بايلىعىن تەڭ بولەتىنىن مالىمدەدى، دەپ جازدى Euronews.
Telegram مەسسەندجەرىنىڭ نەگىزىن قالاۋشى ءارى جالعىز يەسى سانالاتىن رەسەيلىك تەحنولوگيالىق كاسىپكەر پاۆەل دۋروۆ ءوزىنىڭ ميللياردتاعان دوللارلىق بايلىعىن 100-دەن استام بالاسىنىڭ اراسىندا تەڭ ءبولىپ بەرۋدى جوسپارلاپ وتىرعانىن ايتتى. بۇل تۋرالى ول فرانسۋزدىڭ Le Point جۋرنالىنا بەرگەن سۇحباتىندا بايانداعان.
- مەن قايتىس بولعاننان كەيىن ولار ءبىر-بىرىمەن قىرىق پىشاق بولىپ قىرلىسپاسىن دەيمىن، - دەدى دۋروۆ.
ونىڭ ايتۋىنشا، دونورلىق ۇرىق ارقىلى 12 ەلدە 100-دەن استام بالا دۇنيەگە كەلگەن، ال تاعى التاۋى -ءۇش ءتۇرلى ايەلدەن تۋعان رەسمي مويىندالعان بالالار.
دۋروۆتىڭ ايتۋىنشا، ەشبىر بالاسى 30 جىل بويى مۇرا الا المايدى. ول مۇنى بالالاردىڭ ءوز ءومىرىن ءوزى قۇرىپ، تاۋەلسىز تۇلعا بولىپ قالىپتاسۋى ءۇشىن جاساپ وتىرعانىن جەتكىزدى.
- مەن ولاردىڭ قاراپايىم ادامدار سەكىلدى ءومىر سۇرگەنىن، ءوز جولىن ءوزى تاپقانىن، سەنىمدى بولۋىن جانە شىعارماشىلىقپەن اينالىسقانىن قالايمىن. ولار بانكتەگى ەسەپشوتقا قاراپ ءومىر سۇرمەۋى ءتيىس، - دەدى ول.
ميللياردەر جۋىردا ءوز وسيەتىن جازىپ بىتىرگەنىن دە ايتتى. بۇل قادامعا نە سەبەپتى بارعانىن ءتۇسىندىرىپ:
- بوستاندىقتى قورعاۋ - وزىڭە جاۋ تابۋدىڭ ەڭ جىلدام جولى. ونىڭ ىشىندە كۇشتى مەملەكەتتەردە»، - دەدى دۋروۆ.
قازىر دۋبايدا تۇراتىن 40 جاستاعى ميللياردەر وتكەن جىلى فرانسيادا ۇستالعان. وعان Telegram پلاتفورماسىندا قىلمىسپەن كۇرەستە جەتكىلىكتى شارا قولدانبادى دەگەن ايىپ تاعىلعان. دۋروۆ بۇل ايىپتاۋلاردى بىرنەشە رەت جوققا شىعارىپ، ولاردى «ابسۋرد» دەپ اتادى.
- قىلمىسكەرلەر ءبىزدىڭ مەسسەندجەردى باسقالارمەن قاتار قولدانعانى ءۇشىن ءبىزدى دە قىلمىسكەر دەۋگە بولمايدى، - دەپ مالىمدەدى ول.
ەسكە سالا كەتسەك، دۋروۆ نەگىزىن قالاعان Telegram قوسىمشاسىن 2013 -جىلى ىسكە قوسقان. بۇگىندە ونىڭ اي سايىنعى بەلسەندى پايدالانۋشىلارى 1 ميللياردتان اسادى.
جاقىندا فرانسيا بيلىگى پاۆەل دۋروۆتىڭ ەلدەن شىعۋ شەكتەۋلەرىن جەڭىلدەتتى.
