پاكىستاننىڭ 5 دوللارلىق قۇرالىن دەلدال ەلدەردەن 50 دوللارعا ساتىپ الامىز - ەلشى
اراداعى ىسكەرلىك بايلانىستىڭ السىزدىگىنەن پاكىستاندا وندىرىلەتىن تاۋارلاردى ءوز باعاسىنان ونداعان ەسە قىمباتقا ساتىپ الۋعا ءماجبۇرمىز.
قازاقستاننىڭ پاكىستان يسلام رەسپۋبليكاسىنداعى توتەنشە جانە وكىلەتتى ەلشىسى ەرجان قىستافين وسىنداي مالىمەت بەردى، دەپ حابارلايدى Kazinform.
«پاكىستاندا 2,5 جىل جۇمىس ىستەگەندە بايقاعانىم، بۇل ەلدىڭ ءوندىرىس- ونەركاسىپتىك الەۋەتى وتە اۋقىمدى. بۇل مەملەكەت تۋرالى وتە از بىلەمىز. وكىنىشكە قاراي، پاكىستان تۋرالى بۇرمالانعان قاساڭ قاعيدالار قالىپتاسقان. قازاقستاندا عانا ەمەس، جالپى الەمدە سونداي تۇسىنىك بار. كىمنەن سۇراساڭىز دا ءۇش دۇنيەنى ايتادى. ءبىرىنشىسى - تەرروريزم، ەكىنشىسى - ەكونوميكاداعى پروبلەمالارى، ءۇشىنشىسى - بىلتىر بولعان سۋ اپاتى. نەگىزى پاكىستاننىڭ ءوندىرىس پەن ونەركاسىپتەگى الەۋەتى بىزگە وتە ماڭىزدى. الەم كارتاسىندا قازاقستان مەن پاكىستان ءبىر- بىرىنە جاقىن ورنالاسقان. ءبىراق دامىعان كولىك- لوگيستيكا ءدالىزىنىڭ بولماۋى بۇگىنگە دەيىن ساۋدا- ەكونوميكالىق بايلانىستاردى الەۋەتىمىزگە ساي دامىتا الماي كەلدىك»، - دەدى قازاقستان ەلشىسى.
ديپلومات بۇل سوزىنە مىسال دا كەلتىردى.
«پاكىستان حيرۋرگيالىق قۇرالدار ءوندىرىسى جونىنەن الەمدە ءبىرىنشى ورىندا تۇر. ولار حيرۋرگيالىق قۇرالداردى ەۋروپا ەلدەرىنە، ا ق ش- قا، جاپونياعا، باسقا دا ەلدەرگە ەكسپورتتاپ وتىر. ال ءبىز سول حيرۋرگيالىق قۇرالداردى اتالعان ەلدەردەن ساتىپ الامىز. پاكىستانداعى حيرۋرگيالىق قۇرال وندىرۋشىلەردىڭ قاۋىمداستىعى بىزگە بەرگەن ورتاشا اريفمەتيكا مىنانداي: ولار 5 دوللارعا وندىرگەن قۇرالدى ءبىز سىرتتاعى نارىقتاردان 50 دوللارعا ساتىپ الامىز. حيرۋرگيالىق قۇرالدار نارىعىنداعى احۋالدىڭ اريفمەتيكاسى وسىعان سايادى.
توقىم يندۋسترياسىن الساق، الەمدەگى ۇزدىك وندىقتا تۇر. مىسالى، دجينس بۇيىمدارىنىڭ وزىندىك قۇنى 5-10 دوللاردىڭ اينالاسىندا. ال ونى قازىر قانداي باعامەن وزگە نارىقتاردان يمپورتتاپ وتىرعانىمىزدى جاقسى بىلەسىزدەر. بۇلاردا فارماتسيەۆتيكا يندۋسترياسى دا قاتتى دامىعان»، - دەيدى ول.
سونداي- اق ديپلومات پاكىستان الەمنىڭ ءار تۇكپىرىنە مانگو، كارتوپ، كۇرىش، سيترۋس داقىلدارىن مولىنان ەكسپورتتايتىنىن ەسكە سالدى.
«ءبىز پاكىستانداعى وندىرۋشىلەرگە قازاقستان اۋماعىندا بىرلەسكەن ءوندىرىستى جولعا قويۋ مۇمكىندىكتەرىن ۇسىنۋعا دايىنبىز. بىزدەگى حالىق سانى 20 ميلليون بولسا، پاكىستاندا 242 ميلليون ادام بار. كاراچي قالاسىندا عانا 30 ميلليون ادام تۇرادى. وسى تۇرعىدان العاندا قازاقستان نارىعى پاكىستان ءۇشىن سونشالىق اۋقىمدى ەمەس بولىپ كورىنۋى مۇمكىن. ءبىراق قازاقستان ەۋرازيا نارىعىنا جول اشاتىن الاڭ بولا الادى. پاكىستاننىڭ ءوز نارىعى وتە اۋقىمدى بولعاندىقتان قازاقستانعا وسى جاعىمەن قىزىقتى. ءبىز اراب تەڭىزىندەگى پاكىستاننىڭ كاراچي جانە لاحور پورتتارى ارقىلى افريكا مەن وڭتۇستىك- شىعىس ازيا ەلدەرىنىڭ نارىعىنا جول اشا الامىز. بۇل ايماقتار بۇگىندە الەمدەگى ەڭ ءبىر حالقى تىعىز قونىستانعان وڭىرلەردىڭ بىرىنە اينالىپ وتىر. سوندىقتان ەكى مەملەكەت ءبىر- بىرىنە كورشى نارىقتارعا كىرەتىن قاقپا بولا الادى. ونىڭ سىرتىندا ەكىجاقتى ارىپتەستىكتىڭ الەۋەتى دە زور»، - دەيدى ەرجان قىستافين.
ەلشى اراداعى ساۋدا- ساتتىقتىڭ لوگيستيكاسىنا دا توقتالدى.
«ەكى ارادا ىسكەرلىك، اكادەميالىق اقپارات الماسۋ جاعى كەنجە قالعان. ودان كەيىن ءتيىمدى كولىك- لوگيستيكالىق مارشرۋت جوق. بۇگىنگى تاڭدا ءۇش نەگىزگى باعىت بار. ءبىرىنشىسى - پاكىستان، قىتاي، قىرعىزستان، قازاقستان اۋماعىن كوكتەپ جاتقان قاراقورىم تاسجولى. بۇل - ەڭ قىسقا ءارى ەڭ ارزان مارشرۋت. اۋعانستان اۋماعى ارقىلى وتەتىن ەكى باعىت بار. ولارعا نە وزبەكستان ارقىلى، نە تۇرىكمەنستان ارقىلى شىعۋعا بولادى. ءۇشىنشى باعىت - يران. يران اۋماعىمەن كاسپي ارقىلى اقتاۋ پورتىنان اميرابادقا، اميرابادتان بەندەر- ابباسقا، بەندەر- ابباستان ءارى گۆادارا جانە كاراچي پورتتارىنا وتۋىمىزگە بولادى. بۇل باعىتتىڭ ارتىقشىلىعى - تولىقتاي تەمىرجولى تارماعى تۇزىلگەن. كەمشىلىگى - ەڭ ۇزاق، ەڭ قىمبات مارشرۋت بولىپ تۇر. وسى ايدىڭ اياعىندا ەكى ەلدىڭ ساۋدا مينيسترلەرىنىڭ ونلاين كەزدەسۋى وتەدى. سول كەزدەسۋدە لوگيستيكا ماسەلەلەرىن تالقىلاساق دەپ وتىرمىز. ويتكەنى لوگيستيكاسىز ساۋدا-ساتتىقتى دامىتۋ مۇمكىن ەمەس»، - دەدى ە. قىستافين.
اۆتور
ەسىمجان ناقتىباي
