پاكىستاندا وتكەن جارىستا قازاقستان اسكەري قىزمەتشىلەرى جەڭىمپاز اتاندى
استانا. KAZINFORM – ق ر قارۋلى كۇشتەرى قۇرلىق اسكەرلەرىنىڭ اسكەري قىزمەتشىلەرى «پاكىستان ارمياسىنىڭ كوماندالىق رۋحى-2024» حالىقارالىق جارىسىندا توپ جاردى، دەپ حابارلايدى قورعانىس مينيسترلىگىنىڭ باسپا ءسوز قىزمەتى.
جارىس پاكىستاننىڭ استاناسى يسلاماباد ماڭىنداعى ەجەلگى راۆالپيندي قالاسىندا ءوتتى. اسكەري-سپورتتىق تۋرنير «قارسىلاستىڭ نىساندارىن انىقتاۋ»، «توسقاۋىلداعى ءىس-قيمىل»، «ارتيللەريا اتىسىن رەتتەۋ»، «جەدەل مەديتسينالىق كومەك كورسەتۋ جانە جارالىلاردى ەۆاكۋاتسيالاۋ»، «ۋچاسكەنى مينادان تازارتۋ»، «تۇندە سۋ بوگەتتەرىن ەڭسەرۋ» جانە كالاشنيكوۆ اۆتوماتىنان اتۋ كەزەڭدەرىنەن تۇردى.
جارىستىڭ كۇردەلىلىگى تاپسىرمالار شارتتى قارسىلاس باسىپ العان تاۋلى جەرلەردە ورىندالۋىندا ەدى. مىقتى دەنە شىنىقتىرۋ جاتتىعۋلارى، ءىس-قيمىل ۇيلەسىمدىلىگى، شىدامدىلىق پەن كوماندالىق رۋح قازاقستاندىق جاۋىنگەرلەردىڭ ءساتتى ونەر كورسەتۋىنىڭ كەپىلى بولدى.
- ءبىزدىڭ پسيحولوگيالىق دايىندىعىمىز بەن قانشالىقتى شىمىر ەكەنىمىزدى ۇرىسقا بارىنشا جاقىنداتىلعان جاعدايدا كۇردەلى، ءارى بەيتانىس جەردە سىناپ كورۋگە تاماشا مۇمكىندىك تۋدى. ەڭ باستىسى - جاقسى تاجىريبە الدىق، - دەپ قورىتىندىلادى كوماندانىڭ جەتەكشىسى پودپولكوۆنيك ەربول سەرعازين.
«پاكىستان ارمياسىنىڭ كوماندالىق رۋحى-2024» حالىقارالىق جارىسى 2016-جىلدان باستاپ تۇراقتى تۇردە وتكىزىلىپ كەلەدى. بيىل قازاقستاندىق اسكەري قىزمەتشىلەر ءۇشىنشى رەت قاتىسىپ وتىر. 2021-جىلى اسكەري باقىلاۋشىلار رەتىندە بارسا، 2023-جىلدان باستاپ تولىققاندى قاتىسۋشىلار بولىپ كەلەدى.
ەستەرىڭىزگە سالا كەتەيىك، بۇل جارىستارعا باحرەين، يوردانيا، يراك، قازاقستان، كاتار، ساۋد ارابياسى كورولدىگى، مالديۆ، ماروككو، پاكىستان، ا ق ش، تايلاند، تۇركيا، وزبەكستان جانە شري-لانكا اسكەري قىزمەتشىلەرى قاتىستى.
