پاكىستان مەن ءۇندىستان اراسىندا سوعىس باستالۋ قاۋپى بار
استانا. KAZINFORM - پاكىستاننىڭ قورعانىس ءمينيسترى حاۆادجا اسيف الداعى 2-4-كۇن ىشىندە ۇندىستانمەن سوعىس باستالۋ قاۋپى بار ەكەنىن مالىمدەدى. بۇل تۋرالى پاكىستاندىق Dawn گازەتى حابارلادى، دەپ جازادى ت ا س س.
- ءبىز مورالدىق تۇرعىدان دايىن بولۋىمىز كەرەك، الدىدا سوعىس قاۋپى ءتونىپ تۇر. ول ءتىپتى الداعى ءبىر- ەكى، ءۇش نەمەسە ءتورت كۇن ىشىندە باستالۋى مۇمكىن دەگەن قاۋىپ بار، - دەدى مينيستر.
الايدا ول ءوز مالىمدەمەسىن سوعىستىڭ مىندەتتى تۇردە باستالاتىنى تۋرالى بولجام دەپ قابىلداماۋ كەرەك ەكەنىن، تەك الداعى كۇندەردىڭ شەشۋشى بولاتىنىن ەسكەرتكەنىن ءتۇسىندىردى.
حاۆادجا اسيفتىڭ ايتۋىنشا، ەگەر پاكىستاننىڭ ەگەمەندىگىنە قاۋىپ تونسە نەمەسە ەلگە اسكەري ەمبارگو قويىلسا، پاكىستان كەز كەلگەن اسكەري ارەكەتكە %100 دايىن.
مينيستر سونداي-اق وڭىردەگى باسقا ەلدەر داۋلى جاعدايلاردى بولدىرماۋعا جانە شيەلەنىستى ازايتۋعا كۇش سالىپ جاتقانىن اتاپ ءوتتى.
22 -ءساۋىر كۇنى قارۋلى ادامدار دجاممۋ مەن كاشمير وداعى اۋماعىنداعى ايگىلى تۋريستىك قالا - پاحالگامدا تەررورلىق شابۋىل جاساعان بولاتىن. اسكەري كيىم كيگەن ادامدار اۆتوماتتارمەن وق جاۋدىرعان، 25 ءۇندى ازاماتى مەن 1 نەپالدىق قازا تاپتى. قىلمىسكەرلەر وقيعا ورنىنان قاشىپ ۇلگەرگەن.
كوپتەگەن ادام جارالاندى. شابۋىلدى «قارسىلىق مايدانى» اتتى توپ ءوز موينىنا الدى. بۇل توپتىڭ پاكىستاندا تىيىم سالىنعان «لاشكار- ي- تاييبا» ۇيىمىنا قاتىسى بار. وسى وقيعادان كەيىن ءۇندىستان پاكىستانمەن سۋ تۋرالى كەلىسىمدى توقتاتىپ، نيۋ- دەليدەگى پاكىستاندىق كەڭەسشىلەردىڭ ەلدەن كەتۋىن تالاپ ەتتى. سونداي-اق پاكىستاندىقتارعا بەرىلگەن ۆيزالار دا جويىلدى.
بۇعان دەيىن پاكىستان اسكەريلەرى سەنبىدەن جەكسەنبىگە قاراعان ءتۇنى ءۇندىستاننىڭ دجاممۋ جانە كاشمير وداقتىق اۋماعىنداعى باقىلاۋ سىزىعىندا وق جاۋدىرعانىن جازدىق.
