اكىمدىكتەر دەرەكتەردى بۇرمالاۋعا بەيىم - اگەنتتىك رەسمي ستاتيستيكانىڭ شىنايى جاعدايمەن سايكەسپەيتىنىن ايتتى
استانا. KAZINFORM - ستراتەگيالىق جوسپارلاۋ جانە رەفورمالار اگەنتتىگى Kazinform ساۋالىنا جولداعان جاۋابىندا رەسمي ستاتيستيكانى قالىپتاستىرۋ كەزىندە مۇددەلەر قاقتىعىسى كەزدەسەتىنىن ءمالىم ەتتى.
«دەگەنمەن، ستاتيستيكادا مۇددەلەر قاقتىعىسى بار ەكەنىن جوققا شىعارا المايمىز. سەبەبى جەرگىلىكتى اتقارۋشى ورگاندار وزدەرىنىڭ ەلدى مەكەندەرى نەمەسە ايماعىنىڭ شىنايى ستاتيستيكاسىن بۇرمالاۋعا، دەرەكتەردى جوعارىلاتۋعا، جاسىرۋعا بەيىم. سوندىقتان، مالىمەتتەردىڭ دالدىگى مەن سەنىمدىلىگىن قامتاماسىز ەتۋ ءۇشىن بيۋرو قوسىمشا باقىلاۋ تەتىكتەرىن ەنگىزدى.
ماسەلەن، 2023 -جىلى رەسپوندەنتتەردىڭ باستاپقى دەرەكتەرى اۋىل شارۋاشىلىعى جانۋارلارىن سايكەستەندىرۋ بويىنشا ۆەتەريناريالىق قاداعالاۋ جانە باقىلاۋ كوميتەتى دەرەكتەرىمەن، ەگىس القابى بويىنشا عارىشتان مونيتورينگتەۋ جانە شارۋاشىلىق ەسەپ دەرەكتەرىمەن سايكەستىگى تەكسەرىلدى. باقىلاۋ قورىتىندىسى بويىنشا، ءتيىستى ورگاندارعا بۇزۋشىلىقتاردى جويۋ تۋرالى قورىتىندىلار جولداندى»، - دەپ جازىلعان جاۋاپتا.
اگەنتتىكتەگىلەردىڭ پايىمداۋىنشا، بۇل قورىتىندىلار رەسمي ستاتيستيكانىڭ ساپاسىن ارتتىرۋعا ىقپال ەتەدى.
«بيۋرو ءوز قىزمەتىندە ستاتيستيكالىق دەرەكتەردىڭ اشىقتىعى مەن سەنىمدىلىگىن ارتتىرۋعا باسىمدىق بەرەدى»، - دەپ جازىلعان رەسمي مالىمەتتە.
اۆتور
ەسىمجان ناقتىباي
