اكىمدىكتەرگە عىلىمدى قارجىلاندىرۋ قۇقىعى بەرىلمەك
استانا. KAZINFORM - اكىمدىكتەرگە عىلىمدى قارجىلاندىرۋ قۇقىعى بەرىلمەك. مۇنداي جاڭاشىلدىق «قازاقستان رەسپۋبليكاسىنىڭ كەيبىر زاڭنامالىق اكتىلەرىنە عىلىم ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا كوزدەلگەن.
«اكىمدىكتەرگە عىلىمدى قارجىلاندىرۋ قۇقىعىن بەرۋ ۇسىنىلادى. زاڭ جوباسى اياسىندا جەرگىلىكتى اتقارۋشى ورگانداردىڭ عىلىم جانە عىلىمي- تەحنيكالىق قىزمەت سالاسىنداعى قۇزىرەتتەرىن كەڭەيتۋگە قاتىستى ماڭىزدى جاڭالىق ۇسىنىلدى. مۇنداي شەشىم وڭىرلەردە عىلىمي الەۋەتتى نەعۇرلىم ءتيىمدى پايدالانۋعا ىقپال ەتە وتىرىپ، عىلىمنىڭ دامۋىنداعى وڭىرلىك ەرەكشەلىكتەر مەن قاجەتتىلىكتەردى بارىنشا ەسكەرۋگە مۇمكىندىك بەرەدى»، - دەدى زاڭ جوباسى تۋرالى بايانداما جاساعان الەۋمەتتىك-مادەني دامۋ كوميتەتىنىڭ ءتوراعاسى اسحات ايماعامبەتوۆ.
ونىڭ اتاپ وتۋىنشە، وسىعان وراي اكىمدىكتەر وڭىرلەردەگى پروبلەمالاردى شەشۋدە عىلىمي زەرتتەۋلەردى پايدالانۋعا مۇمكىندىك الادى.
«زاڭ جوباسىنا «عىلىمي ەتيكا» ۇعىمى ەنگىزىلىپ وتىر. بۇل نورما عىلىمي زەرتتەۋلەردىڭ ساپاسى مەن جاۋاپكەرشىلىگىن ارتتىرۋعا، اكادەميالىق ادالدىق قاعاداتتارىن ساقتاۋعا باعىتتالىپ وتىر»، - دەدى ءماجىلىس دەپۋتاتى.
