اكادەميك تورەگەلدى شارمانوۆ دۇنيەدەن ءوتتى
استانا. KAZINFORM - قازاقستان تاعامتانۋ اكادەمياسىنىڭ پرەزيدەنتى، الەمدىك دەنساۋلىق ساقتاۋدىڭ اڭىزى جانە قازاقستاندىق مەديتسينانىڭ ماقتانىشى، اكادەميك تورەگەلدى شارمانوۆ 93 جاسىندا ومىردەن وزدى.
«الەۋمەتتىك- گۋمانيتارلىق سالاداعى ۇزدىك جەتىستىكتەرى جانە دەنساۋلىق ساقتاۋ سالاسىن دامىتۋعا قوسقان زور ۇلەسى ءۇشىن ماراپاتتالعان، قازاقستان رەسپۋبليكاسىنىڭ جوعارى دارەجەلى «ەڭبەك ەرى» بەلگىسىنىڭ يەگەرى، اكادەميك تورەگەلدى شارمانوۆ ومىردەن ءوتتى»، - دەپ حابارلادى س. د. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ باسپا ءسوز قىزمەتى.
تورەگەلدى شارمان ۇلى رەسپۋبليكانىڭ دەنساۋلىق ساقتاۋ مينيسترلىگىن 12 جىل باسقارىپ، العاشقى مەديتسينالىق-سانيتارلىق كومەكتىڭ تەڭدەسى جوق جۇيەسىن قۇردى. 1974 -جىلدان باستاپ رەسپۋبليكاداعى جەتەكشى عىلىمي ۇيىمداردىڭ ءبىرى - قازاق تاعامتانۋ اكادەمياسىنىڭ تۇراقتى مەڭگەرۋشىسى.
2005 -جىلى اكادەميك شارمانوۆقا دۇنيەجۇزىلىك دەنساۋلىق ساقتاۋ ۇيىمىنىڭ جوعارى ەرەكشەلىك دارەجەسى - لەون بەرنارد سىيلىعى بەرىلدى، ونىڭ يەگەرى بۇكىل الەم تاريحىندا نەبارى 29 ادام بولعان. بۇل دەنساۋلىق ساقتاۋ سالاسىنداعى نوبەل سىيلىعىنىڭ ءبىر ءتۇرى سانالادى.
«تورەگەلدى شارمان ۇلى قازاقستاننىڭ مەديتسينا قاۋىمى اراسىندا عانا ەمەس، زيالى قاۋىم، شىعارماشىل جاستار، كوپتەگەن ساياساتكەر، رەسپۋبليكانىڭ باسقا دا ازاماتتارى اراسىندا ۇلكەن بەدەلگە يە بولدى. اكادەميك شارمانوۆ 93 جىل ىشىندە ەلگە، الەمگە كوپ ەڭبەك ءسىڭىردى»، - دەپ تولىقتىردى ق ا ز ۇ م ۋ.
