اجىراسۋ ءتارتىبى وزگەرەدى: نەنى ءبىلۋ كەرەك

استانا. KAZINFORM - بيىل 16-قىركۇيەكتەن باستاپ ەلىمىزدە نەكە بۇزۋ ءتارتىبى وزگەرەدى.

2011 -جىلعى 26-جەلتوقسانداعى «نەكە (ەرلى-زايىپتىلىق) جانە وتباسى تۋرالى» قازاقستان رەسپۋبليكاسىنىڭ كودەكسىنە وزگەرىستەر مەن تولىقتىرۋلار ەنگىزىلدى. قۇجات جوباسى «اشىق ن ق ا» پورتالىندا جاريالاندى.

اتاپ ايتقاندا، اتالعان كودەكستىڭ 17-بابىنىڭ 2-تارماعىنا جاڭا تارماقشا ەنگىزىلدى:

- ەگەر ەرلى-زايىپتىنىڭ بىرىنە قۇزىرلى ورگاندار حالىقارالىق ىزدەۋگە جاريالاسا، سوت سانكسياسىمەن حالىقارالىق ىزدەۋ مەرزىمى 3 جىل تولعاننان كەيىن نەكە بۇزىلادى، - دەلىنگەن قۇجاتتا.

وسىعان ۇقساس تولىقتىرۋ نەكەنى سوت ارقىلى بۇزۋ ءتارتىبىن رەتتەيتىن كودەكستىڭ 238 جانە 241-بابىنا دا ەنگىزىلگەن.

- بۇل دەگەنىمىز، ەگەر جۇبايى ۇزاق ۋاقىت بويى جاسىرىن ءجۇرىپ، حالىقارالىق ىزدەۋدە بولسا، ەكىنشى تاراپ ونىڭ قاتىسۋىنسىز سوتقا جۇگىنىپ، نەكەنى رەسمي تۇردە بۇزا الادى، - دەپ تۇسىندىرىلگەن.

ايتا كەتەيىك، ەلىمىزدە اجىراسۋ ءۇردىسىن تەرەڭىرەك زەرتتەۋ ءۇشىن كەشەندى بايانداما ازىرلەنەدى.

سونداي-اق الەۋمەتتانۋشى اجىراسۋدىڭ كوبەيۋ سەبەبىن اتاعان ەدى.