اۋەجايدا جىنىس مۇشەسىنە التىن جاسىرعان 6 ايەل ۇستالدى

استانا. KAZINFORM - ايەلدەردى تەكسەرۋ كەزىندە ولاردىڭ جىنىس مۇشەلەرىنە جاسىرىلعان ءارقايسىسىنىڭ سالماعى 110 گرام بولاتىن 84 التىن قۇيماسى بار ەكەنى انىقتالعان.

تۇركيانىڭ يزمير قالاسىنىڭ اۋەجايىندا جۇرگىزىلگەن وپەراتسيا بارىسىندا وزبەك ۇلتىنا ءتان 6 جولاۋشى ايەل مەن ولاردى قارسى الۋعا كەلگەن ادامدار تەكسەرىلگەن. ناتيجەسىندە ولاردا 166 قۇيما التىن مەن 18 ويىن پريستاۆكاسى بار ەكەنى انىقتالدى. Airline Haber اگەنتتىگى كونتراباندامەن اينالىسقان 7 ادامنىڭ ۇستالعانىن حابارلادى.

بەلگىلى بولعانداي، 2-قازان كۇنى وپەراتسيا كەزىندە كۇدىكتى جولاۋشى ايەل مەن ولاردى قارسى الۋعا شىققان ەكى كولىكتى پوليتسەيلەر اۋەجاي الدىندا توقتاتقان. العاشقى ءتىنتۋ كەزىندە ءارقايسىسىنىڭ سالماعى 110 گرام بولاتىن 82 دانا قۇيما التىن، 18 ويىن پريستاۆكاسى مەن 3 سمارتفون تاركىلەندى.

سوت قاۋلىسىمەن كۇدىكتىلەردىڭ دەنەسىن تەكسەرۋ كەزىندە ايەلدەردىڭ جىنىس مۇشەلەرىندە جاسىرىلعان ءارقايسىسىنىڭ سالماعى 110 گرام بولاتىن تاعى 84 التىن قۇيماسى بار ەكەنى انىقتالدى. ولار حيرۋرگيالىق جولمەن الىنىپ تاستالدى. 166 قۇيما التىننىڭ جالپى سالماعى 18 كەلى 500 گرام، نارىقتىق قۇنى شامامەن 55 ميلليون تۇرىك ليراسى (شامامەن 1604630 دوللار) ەكەنى جاريالاندى.

وپەراتسيا بارىسىندا 6 جولاۋشى ايەل مەن ولارعا كومەكتەسكەن كۇدىكتى قولعا ءتۇستى. سوت ولاردى قاماۋعا الۋ تۋرالى شەشىم شىعارعان.