احمەت جۇبانوۆ اتىنداعى مۋزىكا مەكتەبى 60 جىلدا مىڭنان استام ونەر يەسىن تۇلەتتى

الماتى. KAZINFORM - الماتى قالاسىنىڭ وڭىرلىك كوممۋنيكاتسيالار قىزمەتىنىڭ الاڭىندا احمەت جۇبانوۆ اتىنداعى دارىندى بالالارعا ارنالعان رەسپۋبليكالىق مامانداندىرىلعان قازاق مۋزىكالىق مەكتەپ-ينتەرناتىنىڭ 60 جىلدىعىنا ارنالعان بريفينگ ءوتتى.

سپيكەرلەردىڭ سوزىنشە، مەرەيتويعا ارنالعان سالتاناتتى گالا-كونسەرت 2-جەلتوقسان كۇنى الماتى تەاتر سارايىندا وتەدى.

وعان مادەنيەت جانە اقپارات ءمينيسترى ايدا بالايەۆا، قازاقستاننىڭ بەلگىلى ونەر قايراتكەرلەرى مەن قوعامدىق كوشباسشىلارى قاتىسادى دەپ كۇتىلۋدە.

كەشتىڭ باستى قاتىسۋشىلارى - مەكتەپتىڭ تالانتتى وقۋشىلارى بولماق.

«1964-جىلى كورنەكتى كومپوزيتور احمەت جۇبانوۆتىڭ باستاماسىمەن قۇرىلعان مەكتەپ اۋىلدىق جەرلەردەگى دارىندى بالالارعا ەۋروپالىق جانە الەمدىك مۋزىكا ونەرىمەن تانىسۋعا مۇمكىندىك بەرۋ ماقساتىندا ەسىگىن ايقارا اشتى»، - دەدى مەكتەپ ديرەكتورى نۇركەن ءاشىروۆ.

ايتۋىنشا، ارتتا قالعان التى ونجىلدىقتا مەكتەپتەن 1000 نان استام مۋزىكانت تۇلەپ ۇشتى، ولاردىڭ كوپشىلىگى الەمدىك ساحنالاردا تانىمادىلىققا يە.

«ا. رايىمقۇلوۆا، ب. دەمەۋوۆ، ت. زابيروۆا، ا. ەڭگەپوۆ سياقتى مەكتەپ تۇلەكتەرى قازاقستاندى حالىقارالىق ارەنادا تانىستىرىپ قانا قويماي، ۇلتتىق مادەنيەتتىڭ دامۋىنا دا ۇلەس قوسىپ ءجۇر»، - دەدى ول.

وسىعان دەيىن، رەسپۋبليكا سارايىندا ش. ءۋاليحانوۆ اتىنداعى 12-مامانداندىرىلعان گيمنازيانىڭ 100 جىلدىق مەرەيتويىنا وراي «عاسىر مەكتەبى» اتتى مەرەكەلىك كونسەرت وتكەن بولاتىن.